దట్టమైన వానమబ్బు వంటి దేహఛాయతో  కూడి ,చక్కని మంచి గంధపు పూతతో అద్దబడి , పీతాంబరములను ధరించిన కృష్ణుడు తులసీమాలను ధరించి ఆటలయందు కదులాడుచున్న  రత్న కుండలాల కాంతితో ప్రకాశిస్తున్న చెక్కిళ్లతో శుక్లపక్షపు చవితి నాటి  చంద్రరేఖను  మరిపించు  చిరునగవుతో  రాధతో కూడియున్న ముగ్ధ మనోహరులగు గోపకాంతల నడుమ విలాసవంతుడై

వెలిగిపోవుచున్నాడు

  

ఒక గోపిక మోహ పారవశ్యం తో ఎగసిపడుతున్న తన ఎదను కృష్ణుని దేహానికి

అదిమిపట్టి మిక్కిలి ప్రేమతో కృష్ణుని వేణుగానానికి అనుగుణంగా హెచ్చుస్వరంతో

పంచమరాగం లో రాగాలాపన చేయుచున్నది

 

విలాసవంతంగా అటునిటు త్రిప్పుతూ శృంగార సరసోల్లాస భావనలను పలికిస్తున్న కనులతో కూడిన

మదనుడిని జనిమ్పచేస్తున్న  కృష్ణుని ముఖసౌందర్యాన్ని చూసి ఆశ్చర్యంతో నిశ్చేష్ట అయిన ఒక  ముగ్ధ  మదురమైన తేనెను చిందించు నవకమలం వంటి కృష్ణుని ముఖకమలాన్నే  ధ్యానిస్తూ   ఉండిపోయింది

  

చక్కనైన పిరుదుల బరువుతో వేగంగా కదులజాలని ఒక యువతి ఏదో ఒక రహస్యాన్ని చెవిలో   చెప్పబోవు వంకతో కృష్ణుని ముఖారవిందానికి దగ్గరగా తన ముఖాన్నినిలిపి , తన ముఖపు   తాకిడికి గగుర్పాటునొందిన  కృష్ణుని బుగ్గలను చుంబించి తన ఆశను తెలివిగా  నెరవేర్చుకుంటున్నది  

 

ఒక పిల్ల కృష్ణునితో  కూడి జలక్రీడలయందు ఆసక్తితో  యమునానది తీరంలో ప్రబ్బ పొదరింటియందు    విహరిస్తున్న  శ్రీకృష్ణుని పట్టు వస్త్రాన్ని తన చేతితో పట్టుకుని లాగుచున్నది  

 

ఒక జవరాలు రాసక్రీడయందు కృష్ణునితో నృత్యము చేయుచు పాటకు తగినవిధంగా అరచేతులతో   తాళము వేయుచుండగా , ఆ కదలికలకు చేతి గాజులు చేయుచున్న సవ్వడి వేణునాదంతో  కలసి   మరింత  మదుర ధ్వనులను పలికించుచుండగా ఆ చిత్రమునకు కృష్ణుడు ఆమెను మంచి నేర్పరివే అని  ప్రశంసించుచున్నాడు  

  

ఆ కృష్ణుడు ఒక కోమలిని కౌగిలించుకునుచున్నాడు  ఒక చామంతిని చుమ్బించుచున్నాడు  ఒక  రమణీమణితో రమించుచున్నాడు చిరునగవులు చిన్దించుచున్న ఒక  చిత్రాంగిని  తదేకంగా   చూస్తున్నాడు ఒక మదవతి ముందు నడుచుచుండగా  కృష్ణుడామెను అనుసరించి పోవుచున్నాడు

 

కీర్తిని కలిగించునది బృందావన సుందర వనములయందు పరమాత్ముని

అధ్బుత  రహస్య క్రీడా విన్యాసాలను తెలియజేయునది అగు జయదేవుని సూక్తం

మనకు  మంగళమును  కలిగించును

 

 

చందన చర్చిత నీలకళేబర పీత వసన వనమాలీ

కేళి చలన్మణికుండల మండిత గండయుగళ స్మితశాలీ

హరిరిహ ముగ్ధ వధూనికరే  - విలాసిని విలసతి కేళిపరే  

 

పీన పయోధర భారభరేణ హరిం పరిరభ్య సరాగం

గోపవధూ రను గాయతి కాచి దుదుఇజ్చత పంచమరాగం

హరిరిహ............

 

కాపి  విలాసవిలోలవిలోచన ఖేలన జనిత  మనోజం

ధ్యాయతి ముగ్ధ వధూరధికం మధుసూదన వదనసరోజం

హరిరిహ............

 

కాపి  కపోలతలే మిళితా లపితుం కామపి శ్రుతిమూలే

కాపి చుచుమ్బ నితంబవతి దయితం పులకై రనుకూలే  

 హరిరిహ............

 

కేళికళాకుతకేన చ కాచి దముం యమునాజలకూలే  

మంజులవంజులకుంజగతం  విచకర్ష కరేణ దుకూలే  

హరిరిహ............

 

కరతల తాళతరళవలయావళి కలితకలస్వనవంశే  

రాసరసే సహనృత్య పరా హరిణా యువతి:  ప్రససంసే      

హరిరిహ............

 

శ్లిష్యతి  కామపిచుమ్బతి కామపి రమయతి  కామపిరామా

పశ్యతి సస్మిత చామపరా మనుగచ్చతి  వామామ్

హరిరిహ............ 

 

శ్రీ జయదేవ భణిత మిద  మద్భుత కేశవ  కేళి రహస్యం

బృన్దావనవిపినే లలితం  వితనోతు  శుభానియసస్యం   

హరిరిహ............ 

--
OM NAMO BHAGAVATE VAASUDEVAAYA

హృదయ మధ్యమున పద్మపత్రంలో

ఓ మనసా ! నారాయణుని కీర్తించు

ఓ శిరమా ! ఆయన పాదాల మోకరిల్లు

ఓ హస్తములార ! ప్రేమతో అంజలి ఘటింపుడు  

ఓ ఆత్మా! పుండరీకాక్షుడు నాగాచలం పై

శయనించివున్నవాడు , పురుషోత్తముడు

పరమసత్యమైనట్టి  నారాయణుని శరణాగతి కోరుము

 

ప్రభు జనార్ధనుని లీలామయగాధలు విను తరుణాన

దేహం రోమాంచితం కానిచో , నయనాలు ఆనంద

భాష్పములనే సుమాలను రాల్చకున్నచో మనసు  పరవసించకున్నచో

అట్టి  నా జీవితం  వ్యర్ధమే కదా

 

ఈ శరీరం అనేక మార్పులకు లోనవుతుంది

కండరాలు అరిగి నొప్పికి గురి అవుతాయి

ఏదో ఒకరోజు పండుటాకులా రాలిపోతుంది

ఓ  అమాయకుడా ! నయం చేయలేని నానా రకాల మందుల

వెదుకులాట మానుకో  దివ్యమైన అమృతమయమైన  

శ్రీకృష్ణ  నామౌషధాన్ని  మనసారా  త్రాగుము

 

 మనుష్యులెంత  చిత్రమైనవారు

అమృతాన్ని వదిలి  విషాన్ని  పానం చేస్తున్నారు

నారాయణ నామస్మరణ  మాని  నానారకముల

వ్యర్ధ పలుకులను ఆసక్తి  తో  చెప్పుచున్నారు

 

బంధు మిత్రులు  నన్ను  త్యజించినారు

పెద్దలు గురువులు  నన్ను నిరాకరించినారు

అయినప్పటికీ  పరమానందా  గోవిందా  !

నీవే  నాకు  జీవితము

 

ఓ  మనుజులారా ! ఎలుగెత్తి  సత్యం  చాటుతున్న

ఎవరు అనుదినం  రణం లోను మరణం లోను

ముకుందా  నరసింహా  జనార్ధనా  అని  నిరంతరం

ధ్యానిస్తువుంటారో  వారు  తమ  స్వకోర్కెల  గూర్చి

చింతించటం  రాయి  వలె  ఎండుచెక్క  వలె  వ్యర్ధం

 

చేతులెత్తి  బలమైన  గొంతుకతో  చెబుతున్న

ఎవరు  నల్లని  గరళము  వంటి  జీవితము  నుండి

తప్పించుకోజూస్తారో   అట్టి  జ్ఞానులు  ఈ  భవసాగరాన్ని

తిరస్కరించుటకు నిత్యం  ఓం నమో నారాయణాయ  అను 

 మంత్రం వినటమే  తగిన  ఔషధం  

 

ఎట్టి  కారణం చేతనైనను  ఒక్క  నిమిషమైనను

కృష్ణుని  దివ్య పాదారవిందాల స్మరణ మానిన

అట్టి  క్షణమే  ప్రియ మిత్రుల బంధువుల గురువుల

పిల్లల ఆక్షేపణలతోను, నీచపు ఆలోచనల విహారంతోను

గాలి వార్తలతోను మనసు  విష పూరితమగును  

కనుక  కృష్ణా  నీ  ప్రేమామృతం  చాలు

 

కృష్ణుడు జగద్గురువు  కృష్ణుడు  సర్వలోక రక్షకుడు

కనుక ఎల్లప్పుడూ కృష్ణుని పాదాలని ఆశ్రయించేదను  

లోకం లోని మన శత్రువులను నిర్జించి కృష్ణుడు మనలను  

కాపాడును .కృష్ణా  నీకు నమస్కారము

కృష్ణుని నుండే అన్ని  జగములు పుట్టుచున్నవి

జగములన్నియు  క్రిష్ణునిలోనే  ఇమిడియున్నవి

కృష్ణా ! నేను  నీ  దాసుడను

ఎల్లప్పుడూ  నా  రక్షణాభారం వహించు

 

హే  గోపాలక  ,హే  కృపా జలనిదే ,హే  సింధు కన్యా పతే
హే  కంసాంతక  ,హే  గజేంద్ర  కరుణాపారీణా , హే  మాధవ
హే  రామానుజ  ,హే  జగత్త్రయ గురో  ,హే  పుండరీకాక్ష

హే  గోపీజన వల్లభా  నాకు  తెలుసు నీవు తక్క వేరెవ్వరు లేరు

కనుక ఎల్లప్పుడూ నన్ను రక్షించు

 

క్షీర సాగరుని కుమార్తె నీ అర్ధాంగి

ముల్లోకాలు సృష్టించు బ్రహ్మ నీ కుమారుడు

నిన్ను గూర్చిన స్తుతులే  పవిత్ర వేదాలు

సకల దేవతా సమూహము నీ సేవక పరివారము

ముక్తి  నోసగుటయే నీవు  ఆడు  ఆట

దేవకీ  నీ  తల్లి

శత్రువులకు అభేద్యుడగు అర్జునుడు నీ మిత్రుడు

ఇంత  మాత్రమే నాకు తెలుసు  ( నీవు తప్ప తెలుసుకోదగినది వేరేది  లేదు కదా )

 

 ముకుందునకు  ప్రణమిల్లుటయే  శిరస్సు యొక్క ఉత్తమ కర్తవ్యము

పూవులతో అర్చించుటయే  ప్రాణశ్వాస యొక్క  కర్తవ్యము

దామోదరుని  తత్వ చింతనమే మనసు యొక్క  కర్తవ్యము

కేశవుని కీర్తనమే  వాక్కు యొక్క  కర్తవ్యము

 

ఓం నమో నారాయణా అని స్మరించినంత మాత్రాన

పాపులు కూడా ఉద్దరించబడుతున్నారు  . అట్టిది

పూర్వ  జన్మలలో  ఎన్నడు  నారాయణుని  నామ స్మరణ  

చేయకుంటినేమో  ఇప్పుడు  గర్భావాసపు  దుఖాన్ని భరించవలసివచ్చే

హృదయ మధ్యమున  పద్మపత్రంలో  

అవ్యయుడు అనంతుడు అయిన విష్ణువు ని నిలిపి

సదా ధ్యానించు వారలకు సకల భయాలు

తొలగి విష్ణుపదం సన్నిహితమవుతున్నది

 

ఓ  హరీ ! ఓ పురుషోత్తమా ! ఓ విష్ణు

నీవు దయా సముద్రుడవు

పాపులకు మరల మరల ఈ  భవసాగరమే  గతి అగుచున్నది

నీ దయావర్షం  నాపై కురిపించి

నన్ను ఉద్దరించు ముకుందా

  

పాల కడలిలో అలల తుంపరలు దేహాన్ని తాకుతూ

నీలాకాశాన తారకలు వలె మెరుయుచుండగా

శేషతల్పం మీద సుఖాసీనుడవైన  మాధవా

మధుసంహారీ నీకివే నా మనఃపూర్వక  ప్రణామములు

 

కృష్ణ  కృష్ణ  అన్న నామాలు చాలు  

జీవిత కర్మఫలాలు దూరంగా నెట్టి వేయబడటానికి

ముకుందుడి  పై ఎనలేని ప్రేమభావమున్న

సిరి సంపదలు  మోక్ష ద్వారం  అందుబాటులో వుంటాయి

 

నా  మిత్రులు జ్ఞాన మూర్తులు

కవిత్వ సామ్రాజ్యంలో రారాజులు

ద్విజోత్తములు . నేను కులశేఖర చక్రవర్తి  ని

ఈ  పద్య  కుసుమాలు  పద్మాక్షుని  చరణాంబుజములకు  

భక్తి ప్రపత్తులతో  సమర్పితం

--
OM NAMO BHAGAVATE VAASUDEVAAYA

Fwd: nenemi kOravale

నేనేమి  కోరవలెను

 అవును నారాయణా  నేనేమి  కోరగలను

 నీ  పాదాల చెంత చోటడుగునందునా

 మహా జ్ఞానులు మహా భక్తులు అయిన కులశేఖర ఆళ్వారు , పోతన మహాకవి  

లాంటి వారు  ఇప్పటికే వాటిని ఆశ్రయించి వున్నారు

మరి వారి సరసన చోటు కోరేంతటి వాడనా నేను

 

నా హృదయం లో నిలచిపోమ్మందునా

గోప కాంతలు నన్ను చూచి ఫక్కున నవ్వుతున్నారు

నిజమే కదా వారికున్న నిష్కళంకమైన అమాయకపు ప్రేమ నాకు లేదు కదా

 

ఎల్లప్పుడూ  నిన్నే తలచు  మనసిమ్మందునా

 కష్టాలలో  తప్ప సుఖాలలో  నిన్ను  గుర్తించమాయే

అయినా నేనేమి నీ మేనత్త కుంతీ ని కాదు కదా

ఎల్లప్పుడూ మాకు భాధలనే కలిగించు .ఆ విధంగా నైనా ఎల్లప్పుడూ నీ చింతన

చేయగల అదృష్టం మాకు కలుగుతుంది అని ప్రార్ధించ

అంతటి మనో నిబ్బరం మాకు లేదుకదా

 

అనన్య శరణాగతి కోరుదునా

కలడు కలండను వాడు కలడో లేడో అన్న సంశయమే తప్ప

 అందుగలడిందులేడను సందేహము వలదు చక్రి సర్వోపగతుడన్న  

ప్రహ్లాదుని నిశ్చల బుద్ది కాని

 నీవే తప్ప ఇహపరంబెరుగనన్న గజేంద్రుని దీక్ష కాని

నాకు లేవు కదా

 

ప్రేమగా  పిలిచి  నైవేద్యం స్వీకరించమందునా  

 మడి ఆచారాలంటూ తర్జన భర్జనలు , వాటిని సక్రమంగా

చేయలేక మనసంతా ఆందోళనలే తక్క

 బ్రతుకు తెరువుకోసం మట్టికుండలు చేస్తూ , చేతికంటిన బంకమట్టి తోనే

మట్టిపూలు సమర్పించిన కురువరతి నంబి వలె

ప్రేమ ప్రపత్తులు లేవు కదా

 

ఇన్ని లేమిలతో  సతమవుతున్న నాకు నీ చెలిమి అనే కలిమిని ప్రసాదించి

ఈ జీవన కురుక్షేత్రంలో పార్దుడిని నడపించినటుల నన్ను నడిపించు

నారాయణా శ్రీమన్నారాయణ  హరే  

 

 

 

 

 

 

 

 

 

 

 

 

 

 

 

 

 

 

 

 

 

--
OM NAMO BHAGAVATE VAASUDEVAAYA

--
OM NAMO BHAGAVATE VAASUDEVAAYA

నాకు నీ చెలిమి అనే కలిమిని

అవును నారాయణా నేనేమి కోరగలను

నీ పాదాల చెంత చోటడుగునందునా

మహా జ్ఞానులు మహా భక్తులు అయిన కులశేఖర ఆళ్వారు , పోతన మహాకవి

లాంటి వారు ఇప్పటికే వాటిని ఆశ్రయించి వున్నారు

మరి వారి సరసన చోటు కోరేంతటి వాడనా నేను



నా హృదయం లో నిలచిపోమ్మందునా

గోప కాంతలు నన్ను చూచి ఫక్కున నవ్వుతున్నారు

నిజమే కదా వారికున్న నిష్కళంకమైన అమాయకపు ప్రేమ నాకు లేదు కదా



ఎల్లప్పుడూ నిన్నే తలచు మనసిమ్మందునా

కష్టాలలో తప్ప సుఖాలలో నిన్ను గుర్తించమాయే

అయినా నేనేమి నీ మేనత్త కుంతీ ని కాదు కదా

ఎల్లప్పుడూ మాకు భాధలనే కలిగించు .ఆ విధంగా నైనా ఎల్లప్పుడూ నీ చింతన

చేయగల అదృష్టం మాకు కలుగుతుంది అని ప్రార్ధించ

అంతటి మనో నిబ్బరం మాకు లేదుకదా


అనన్య శరణాగతి కోరుదునా
కలడు కలండను వాడు కలడో లేడో అన్న సంశయమే తప్ప
అందుగలడిందులేడను సందేహము వలదు చక్రి సర్వోపగతుడన్న

ప్రహ్లాదుని నిశ్చల బుద్ది కాని

నీవే తప్ప ఇహపరంబెరుగనన్న గజేంద్రుని దీక్ష కాని

నాకు లేవు కదా


ప్రేమగా పిలిచి నైవేద్యం స్వీకరించమందునా
మడి ఆచారాలంటూ తర్జన భర్జనలు , వాటిని సక్రమంగా

చేయలేక మనసంతా ఆందోళనలే తక్క

బ్రతుకు తెరువుకోసం మట్టికుండలు చేస్తూ , చేతికంటిన బంకమట్టి తోనే

మట్టిపూలు సమర్పించిన కురువరతి నంబి వలె

ప్రేమ ప్రపత్తులు లేవు కదా


ఇన్ని లేమిలతో సతమవుతున్న నాకు నీ చెలిమి అనే కలిమిని ప్రసాదించి
ఈ జీవన కురుక్షేత్రంలో పార్దుడిని నడపించినటుల నన్ను నడిపించు

నారాయణా శ్రీమన్నారాయణ హరే

పండు వెన్నెల వలె , పాంచజన్యపు తెల్లదనం వలె

కృష్ణా నీ పాదధూళి తో పునీతమైన

శిరము జ్ఞానదీపమై ప్రకాశించుచున్నది

హరిని కాంచిన కనులు మాయ పొరలు వీడి

తారలవలె కాంతులీనుతున్నవి

మాధవుని చరణారవిందాలపై లగ్నమైన మది

పండు వెన్నెల వలె , పాంచజన్యపు తెల్లదనం వలె స్వచ్ఛమై ఉన్నది


నారాయణుని గుణగణాల కీర్తన తో తడిసిన నాలుక

సుధారస ధారలు కురిపించుచున్నది



ఓ నాలుకా ! కేశవుని కీర్తనలు ఆలాపించు

ఓ మనసా ! మురారి స్మరణలో మునకలేయుము

ఓ చేతులారా ! శ్రీధరుని సేవలో నిమగ్నమవ్వుడు

ఓ చెవులారా ! అచ్యుతుని లీలలను ఆలకింపుడు

ఓ కనులార ! కృష్ణుని సౌందర్య వీక్షణలో రెప్పపాటు మరచిపోండి

ఓ పాదములారా ! ఎల్లప్పుడూ హరి ఆలయమునకే నను గోనిపొండి

ఓ నాశికా ! ముకుందుని పాద ద్వయంపై నిలచిన పవిత్ర తులసి సువాసనలను

ఆస్వాదించు

ఓ శిరమా ! అధోక్షజుని పాదాల ముందు మోకరిల్లు



ముకుందా ! నీ పాదస్మరణ లేని

పవిత్ర నామ ఉచ్చారణ అడవిలో రోదన వంటిది

వేదకార్యాల నిర్వహణ శారీరిక శ్రమను మాత్రమే మిగుల్చును

యజ్ఞాయాగాదులు బూడిదలో నేయి కలిపిన చందము

పుణ్యనది స్నానం గజస్నానం వలె నిష్ఫలము

కనుక నారాయణా నీకు జయము జయము



మురారి పాదాలకు పీటమైనట్టి నా మదిని

మన్మధుడా ! వీడి మరలి పొమ్ము

హరుని కంటిచుపులో కాలిపోయిన నీకు

హరి చక్రపు మహోగ్ర తీక్ష్ణత తెలియకున్నది



శేషతల్పం పై పవళించు నారాయణుడు మాధవుడు

దేవకీ దేవి ముద్దుబిడ్డ దేవతా సముహలచే

నిత్యం కొలవబడువాడు సుదర్శన చక్రమును

సారంగమను వింటిని ధరించినట్టివాడు

లీలచే జగత్తును ఆడించువాడు జగత్ప్రభువు

శ్రీధరుడు గోవిందుడు అగు హరి స్మరణ మనసా

ఎన్నటికి మరువకు . స్థిరంగా హరిని సేవించుటకన్నను

నీకు మేలు కలిగించు దారి మరేదిలేదు



మాధవా ! నీ పాదపద్మాలపై నమ్మిక లేనివారి వైపు

నా చూపులు తిప్పనివ్వకు

నీ కమనీయ గాధా విశేషాలు తప్ప ఇతరములేవి నా చెవి చేరనియకు

నిన్ను గూర్చిన ఆలోచన లేనివారి తలంపు నాకు రానీయకు

నీ సేవా భాగ్యమునుండి ఎన్ని జన్మలెత్తినా నను దూరం చేయకు
-- (mukunda maala)
ఓం నమో భగవతే వాసుదేవాయ

ఓ సరోజ పత్ర నేత్రా

కోరి వరించిన భార్య తత్ఫల సంతానం
సంపదలనే మూడు భంధనాలపై మదనుడి
మోహబాణపు తాకిడికి పెంచుకున్న వ్యామోహంతో
జనన , జీవన మరణాలనే మూడు సరస్సులలో పలుమార్లు
మునకలేస్తున్న నాకు ముకుందా నీ భక్తి అనే పడవలో
కొద్ది చోటు కల్పించు

ముకుందా! నీ కడగంటి చూపు తో
పృథ్వి ధూళి రేణువు సమమవ్వును
అనంత జలధి ఒక్క బిందు పరిమాణమయ్యే
బడబాగ్ని చిన్న అగ్నికణం గా గోచరిస్తుంది
ప్రచండమైన వాయువు చిరుగాలి లా ఆహ్లాదపరుస్తుంది
అంచులేరుగని ఆకాశం చిన్న రంధ్రమై చిక్కపడుతుంది
సమస్త దేవతా సమూహం బృంగ సమూహాలను మరిపిస్తుంది
కృష్ణా సమస్తము నీ పాద ధూళి లోనే ఇమిడియున్నది కదా


యాజ్ఞావల్క్యాది మహర్షులచే తెలియజేయబడిన
జరా వ్యాధి మరణాల నుండి ముక్తి కలిగించు
దివ్యోషధం జనులారా మన హృదయాలలో అంతర్జ్యోతి
వలె , కృష్ణ నామం తో ఒప్పారుచున్నది . ఆ నామామృతాన్ని
త్రావి పరమపదం పొందుదాం

దురదృష్టమనే అలలతో కూడిన సంసార సాగరంలో
అటునిటు త్రోయబడుచున్న నరులార! చిరుమాట వినండి
జ్ఞానఫలం కోసం నిష్ఫల యత్నాలు వీడి
ఓం నారాయణా నామజపం తో ముకుందుని పాదాల మోకరిల్లండి

ఎంత అవివేకులము సుమీ !
పురుషోత్తముడు ముల్లోకాలకు అధిపతి
శ్వాసను నియంత్రించిన మాత్రాన అధినుడగునట్టివాడు
స్వయంగా మన చెంతకు రానుండగా ,
తనవన్ని మనకు పంచనుండగా
అధములైనట్టి రాజులను యజమానులను
అల్పమైన కోర్కెల కోసం ఆశ్రయించుచున్నాము


ముకుళిత హస్తాలతో వినమ్రతతో వంగిన శిరస్సుతో
రోమాంచిత దేహంతో గద్గద స్వరంతో కృష్ణ నామాన్ని
పదే పదే స్మరిద్దాం సజల నేత్రాలతో నారాయణుని వేడుకుందాం
ఓ సరోజ పత్ర నేత్రా …..ఎర్ర తామరలను బోలిన నీ పాదద్వయం నుండి
జాలువారు అమృతం సేవించుచు మా జీవనం కొనసాగించు భాగ్యం కలిగించు

(mukunda maala)

ఆగు …..నన్ను వెంబడించకు

మనసా తుళ్ళి పడకే ……..
అతిగా ఆశ పడకే …….
ధర్మం మీరి ప్రవర్తించకే

ఎన్నిసార్లు నచ్చచెప్ప ప్రయత్నించిన వినకున్నది మనసు
అది మన మాట వింటే మనకిన్ని సమస్యలెందుకు

అయినా మనం మాత్రం …….మన అంతరాత్మ ఘోషిస్తూనే వుంటుంది
వలదు వలదని మన బుద్ది వింటుందా

మరి నిలకడలేని మన బుద్ది సలహా మనసెలా వింటుంది .

అంతరాత్మ రూపంలో ఆ పరమాత్మ చెప్పేదానినే పెడచెవిన పెడుతున్నాం
అందుకే ఇన్ని సమస్యల సహవాసం మనకు లభిస్తుంది

మన బుద్దిని ప్రక్కదారి పట్టించే వాటినే ముద్దుగా అరిషడ్వర్గాలు అంటాం
వాటన్నిటికి రారాజు ….మోహం
ఇదే అన్నిటికి మూలం ….
దీనికి ..కామం అనేది మంత్రి
క్రోధం …….సేనాధిపతి
లోభ మద మాత్సర్యాలు ……సైనికుల్లాంటివి

అందుకే దేనిపైన కూడా మోహం …వ్యామోహం కూడదని పెద్దలు సుద్దులు చెబుతారు

అలా వ్యామోహం లేని స్థితినే నిర్వికారం అంటాం . అది యోగుల స్థితి . మనకు చెల్లుబాటు కాదు
మరి మనం ఏమి చేయాలి
మన మోహాన్ని కనీసపు స్తాయికి తగ్గించుకోవతానికైనా ప్రయత్నించాలి
లేదా దానిని సక్రమ మార్గంలోకన్న మళ్ళించాలి

అనవచ్చు ..అందరు నిర్వికారం గా వుంటే సమాజం ఎలా నడుస్తుందని
శుబ్రం గా నడుస్తుంది . నిర్వికారమంటే ఎ పని చేయకుండా నీరసించి వుండటం కాదు
అన్ని పనులు చేసుకుంటూనే దేనిపైన వ్యామోహం లేకుండా వుండటం .
అలాంటి వారే ఆనందం చవి చూడగలరు

ఏమో ఇవన్ని చెప్పుకోవటానికి బాగానే వుంటాయి . ఆచరించటం
బహు కష్టం
ఓ వ్యామోహమా ఆగు నన్ను వెంబడించకు
హే కృష్ణా
ఈ గోలంతా నాకెందుకు …………
నన్ను వీడని ……నా మనసును కల్లోలం చేస్తున్న ఈ మోహపు సుడిగుండం
దారి మళ్ళించు

లౌకిక విషయాల పట్ల , కృశించి నశించి పోయే సౌందర్యాల పట్ల
తీయని అనుబంధాల పట్ల నాకున్న వ్యామోహాన్ని నీ వైపుకు మళ్ళించు

ఓ గోవిందా ………
జనన మరణ సమయాల్లో నాతోడు రాని , ఆ రెంటి నడుమ కాలం లో అందీ అందక అందుబాటు లోకి రాని , మనసుకు శాంతి నోసగని సంపదలపై నాకున్న వ్యామోహం తొలగించు

ఎల్లప్పుడూ నీ హృదయం పై నిలిచి వుండే వెల లేని సంపద శ్రీవత్స చిహ్నం పై
నాకు ఎనలేని వ్యామోహం కలిగించు

ఓ గోవర్ధన గిరిధారి

రక్త మాంసాలతో కూడి , నానావిధ మలభుయిష్టమైన శరీరాల పట్ల వ్యామోహం తొలగించు

మన్మధుడిని దగ్ధం చేసిన ముక్కంటి కే మదనతాపం కలిగించిన
సత్యము నిత్యమూ అయిన నీ రూప లావణ్యాల పట్ల వ్యామోహం కలిగించు

ఓ యశోద నందనా
తొలుత ఆనందాన్ని తుదకు విచారాన్ని మాత్రమే మిగిల్చే అనుబంధాల
భంధనాలపై వ్యామోహం తొలగించు

ఎంత గ్రోలినా తనవి తీరని మకరందామృతం వంటి నీ లీలా విన్యాసాల
గాధల పట్ల ఎడతెగని వ్యామోహం కలిగించు

నా మోహం …..వ్యామోహం అంతా నీపైనే కృష్ణా

తుమ్మెదలను ఆకర్షింపచేయు పూల మకరందం వోలె

తుమ్మెదలను ఆకర్షింపచేయు పూల మకరందం వోలె
మా మనస్సులను రంజింపజేయు మందస్మిత వదనార విందా
పరమ సత్యమైనట్టివాడ నంద గోప తనయా నారదాది
మునింద్రులచే కీర్తించబడు హరీ ఎల్లప్పుడూ నిన్నే తలచెదను

నీ కర చరణాలనే పద్మాలతో నిండి
చల్లని వెన్నల బోలు చూపులను ప్రసరించు నీ
చక్షువులే చేప పిల్లలుగా కల హరిరూపమనే
సరోవరం లో కొద్ది జలాన్ని త్రాగి జీవనయానపు
బడలిక నుండి పూర్తిగా సేద తీరెదను

కలువ పూల వంటి కనులతో , శంఖు చక్రాల తో
విరాజిల్లు మురారి స్మరణ ఓ మనసా ! ఎన్నటికి
మరువకు అమృతతుల్యమగు హరి పాద పద్మాలను
తలచుటకన్నను తీయని తలంపు మరి లేదు కదా

ఓ అవివేకపూరితమైన మనసా ! నీ స్వామి శ్రీధరుడు చెంత నుండగా
మృత్యువు గూర్చి నీవొనరించిన పాపకర్మల ఫలితాన్ని గూర్చిన చింత ఏల ?.
ఇంకను ఆలస్యమేల? తొందరపడు అత్యంత సులభుడైన నారాయణుని
పాదాలను నీ భక్తి తో బంధించు నీ బంధనాలు తెంచుకో


జనన మరణాలనే రెండు ఒడ్డుల కూడిన సాగరం లో
వచ్చిపోయే కెరటాల వలె నానా జన్మల పాలై
రాగ ద్వేషాలనే సుడిగుండంలో చిక్కుకుని
భార్యా పుత్రులు , సంపదలనే వ్యామోహపు మకరాల
కోరలకు చిక్కి చితికిపోతున్న నాకు మత్స్యరూపధారి హరీ నీవే దిక్కు .

దాటశక్యం కాని సంసార సాగరం చూసి
దిగులు చెందకు ఆందోళన విడుము
నిర్మల ఏకాగ్రచిత్తంతో ధ్యానించు
నరకాసుర సంహారి నావలా మారి నిన్నావలి తీరం చేర్చగలడు

(Mukunda maala ku P S Ramachander garu vrasina aangla anuvada sahaayamto

krishnudu palikinchina bhavala kurpu)

ముకుంద మాల

ఓ ముకుందా
శ్రీవల్లభ వరదా భక్తప్రియా దయాసాగరా
నాధా , జగన్నివాసా , శేషశయనా
ప్రతి దినం అమృతమయమైన ని నామాలను
స్మరించు వివేచన కలిగించు

దేవకీనందన దేవాధిదేవ జయము జయము
వృష్టి వంశ ప్రదీప జయము జయము
నీల మేఘశ్యామ జయము జయము
ధర్మ రక్షక జయము జయము

ఓ ముకుందా
శిరము వంచి ప్రణమిల్లి మిమ్ములను యాచిస్తున్నాను
నా రాబోవు జన్మలెట్టివైనను మి పాద పద్మములను
మరువకుండునటుల మి దయావర్షం నాపై అనుగ్రహించుము

ఓ హరి !

కుంభిపాక నరకములనుండి , జీవితపు ద్వంద్వముల నుండి
రక్షించమనో ,
మృదువైన లతల వంటి శరీరంతో కూడిన రమణీమణుల పొందుకోరి
నిన్ను ఆశ్రయించలేదు
చావు పుట్టుకల చక్రబంధం లో చిక్కుకున్న నా మదిలో
జన్మ జన్మకు ని పాదపద్మములు స్థిరంగా వుండునట్లు
అనుగ్రహించుము చాలు

ఓ దేవాధి దేవా !
నేనెంత నిరాసక్తుడైనప్పటికి పూర్వ కర్మల వాసనా బలం చేత
ధర్మాచరణ , భోగ భాగ్యాల అనురక్తి నను విడకున్నవి
కాని నేను నిన్ను కోరే గొప్పదైన వరం ఒక్కటే , జన్మ జన్మలకు
కూడా ని చరణారవిన్దాలు సేవించుకునే భాగ్యం కల్పించు .

ఓ నరకాసుర సంహార !

దివి , భువి లేక నరకం నీవు నాకు ప్రసాదించే
నివాసమేదైనప్పటికిని , మరణ సమయంలో
శరత్కాలపు నిర్మల సరోవరంలో వికసించిన నవ కమలములవంటి ని పాదములు నా మనో నేత్రంలో నిలుపు చాలు

మహా జ్ఞాని , భక్తి సామ్రాజ్యపు మహారాజు చేర (కేరళ) సామ్రాజ్యాదీసుడు కులశేఖర ఆళ్వార్ ముకుందునకు సమర్పించిన పూమాల లోని మొదటి ఆరు పూలకు భక్తి వేదాంత స్వామి వ్రాసిన ఆంగ్ల అనువాద ఆధారంగా

నేను గీత

ఎవరా గీత ఏమా గాధ
పక్కింటి అమ్మాయో లేక మరొకరో కాదు
మన రాత మార్చేందుకు భగవానుడు చెప్పిన గీత
అదే భగవద్ గీత

చిన్నప్పటి నుండి వింటూనే వున్నాం ….ఘంటసాల గళమాదుర్యం లో గీతను
కాని దానిని అధ్యయనం చేసి ఫలం పొందగలిగినది మాత్రం ఆరేడు సంవత్సరాల
క్రితం
ఎప్పటిలానే తెల్లవారినా , పొద్దు మాత్రం అనుకోని రీతిలో గ్రున్కింది
మన అనుకున్న వారి నుండి ఎదురైన వూహించని పరాభవం
మనసును మెలి తిప్పుతుంటే
మనసు గతి ఇంతే మనిషి బ్రతుకింతే అని విషాద గీతం
పాడుకుంటూ గది తలుపులు బిగించుకుని మనసు తలపులు తెరచి
విలపించెంతలో
గూటిలో ఎప్పుడో కొనిపడేసిన భగవద్ గీత ఓరి అమాయకుడా
నన్ను చూడరా అని పిలుస్తున్నట్లున్నది

చేతిలోకి తీసుకుని పేజి త్రిప్పగానే అర్జున విషాదయోగం …….
అది చూసి విషాదం గా నవ్వుకుంటూ చదవటం మొదలెట్టాను

కాలం గడుస్తున్నది …….అర్ధం చేసుకునే కొద్ది మోహపు
మాయ వీడి జీవితపు మర్మం తెలియరాసాగింది
దానితో పాటే గుండెల్లో గూడు కట్టిన భాద ఆవిరైపోసాగింది
చివరకు మిగిలింది ……
అందమే ఆనందం
ఆనందమే జీవిత మకరందం

అంతలా నన్ను ప్రభావితం చేసిన భగవద్ గీత నేడు ఎంతలా నాతొ కలసిపోయిందంటే
ఎక్కడైతే తొలి విషాదాన్ని చవి చూసానో తిరిగి అక్కడే మరో ఇబ్బందికరమైన వార్త
వినరావల్సివచ్చింది .
విశేషం …….అప్పుడు ఇప్పుడు కార్తిక మాసమే

గురు దశ మొదలవుతున్నదని , గురువు యొక్క శాపానికి గురి అయ్యానని , ఇది 18 సంవత్సరాలు కొనసాగుతుందని , ఉపసమించటానికి వైడూర్యము , కనక పుష్యరాగము ధరించమని దాని సారాంశం
మళ్ళి మొదలు …..అర్జున విషాదయోగం
మనసును మధిస్తే చివరకు దక్కిన సమాధానం ……..
నా పుట్టిన రోజు …18
భగవద్గీత లో అధ్యాయాలు …..18
అ కురుక్షేత్రం జరిగినది ……..18
ఈ గురుదశ నన్ను వెన్నంటి వుండే సంవత్సరాలు …18

మనస్సనే కురుక్షేత్రం లో మంచి చెడుల మద్య జరిగే పోరాటం లో
ధర్మాన్ని ఆలంబనగా చేసుకోమని , అందుకు తన పాద పద్మాలను
ఆశ్రయించమని , గురు శాపమనే వంకతో భగవానుడు నాకు అనుక్షణం
తెలియచేస్తున్నట్లు లేదూ

కంసుడు ప్రాణ భయంతో ఎక్కడ చూసిన కృష్ణుడిని కాంచినట్లు , ప్రతి
పనిని ఆరంభించబోయేముందు , తన పాద పద్మాలను ఆశ్రయించమని
గురు శాపమనే నెపం తో కృష్ణుడు నాకు తెలియచేస్తున్నాడు

గీత లో ఆయనే స్వయం గా పేర్కొన్నాడు … గురువులలో దేవగురువు బృహస్పతి
తానేనని . అట్టి నారాయణుని చే ఇవ్వబడిన శాపం నా పాలి వరం కావటం లో
వింతేమున్నది .

అన్నమాచార్యుల వారు కిర్తించినట్లు

శంఖ చక్రాల నడుమ సందుల వైడూర్యమై తానుండగా

కాళిన్దుని తలలపై కప్పిన పుష్యరాగమై తాను ప్రకాసిస్తుండగా

ఇక వేరే రాళ్ళు రత్నాలతో నాకు పని ఏమి
ఇంతటి జ్ఞానాన్ని ప్రసాదించిన భగవద్గీతకు వందనాలతో

ఆకాశా దేశాన

ఆకాశా దేశాన అనంతకాలపు

పయనం సాగించే ఓ మేఘమాలిక

కనుగొని విన్నవించు నా ప్రియ సఖి కి నా మేఘ సందేశం

ఘడియ ఘడియ శిలగా మారి కరగకున్నది లచ్చి

ఎద కోవెలలో ని మూర్తి తిష్టవేసినది లచ్చి

తెల్లవారు తరుణాన ని ముఖ కమలం

చిరునవ్వుల రెక్కలతో విప్పారుతున్నది లచ్చి

నాలో నవచైతన్యం నింపుతున్నది లచ్చి

అపరాహ్ణవేళ ని తలంపే

అమృత తోయమై ఆకలి తీర్చుచున్నది లచ్చి

నాలో నవచైతన్యం నింపుతున్నది లచ్చి

చీకటి పడిన వేళ కలువబాల ను

మరిపించు ని పసిడి మేని సోయగం

విరహతాపం పెంచుతున్నది లచ్చి

నాలో నవచైతన్యం నింపుతున్నది లచ్చి

ఓ మేఘ మాలికా నా ముద్దుల లచ్చి

గురుతు తెల్పెద .జాడ పట్టుకో

ఎ ఇంట అనురాగవర్షం కురుస్తున్నదో

ఎక్కడ ఆనందం వెల్లివిరుస్తుందో

ఎక్కడ ఆప్యాయత పొంగిపోరలుతుందో

ఎక్కడ మమతల మణిదీపమ్ వెలుగులు విరజిమ్ముతుందో

అదే అదే నా ముద్దుల లచ్చి చరించు తావు

jIvitam

జీవితం ఈ రోజుల్లో సాధారణంగా అందరి నోట విన బడే భారీ డైలాగ్ .జీవితం బోర్ కొట్టేస్తుందోయ్ ఏమిటో ఈ జీవితం .లేవటం ఆఫీసులకు పరుగెత్తటం ఇంటికి చేరటం ……కంటికి కునుకు పట్టిందనుకునేలోపే తెల్లారటం .మళ్ళి చక్రం మొదలు ఈ రోజంతా భారం గా గడిచిందోయ్ రేపన్న కాస్త సంతోషం ‘గా వుండాలని పెద్ద నిర్ణయం తీసుకుంటాం ఈ లోపు ఆ రేపు రాను వస్తుంది పోను పోతుంది కోరుకున్న సంతోషం మాత్రం కనుచూపుమేరలో కానరాదు నిజానికి ప్రతి మనిషి కోరుకునేది సంతోషం . అది ఎంత మంది పొందగలుగుతున్నారు చెప్పటం కష్టమే నాకు డబ్బుల్లేవ్ కాని వుంటే చాలా సంతోషం గా గడిపేవాడిని చాలా అమాయకపు మాట అంబాని సోదరులను తీసుకోండి .డబ్బు కుప్పలు గా మూలుగుతుంది తమ్ముడిని ఎదగనియకుండా ఎలా అడ్డుకోవాలో అని నిరంతరం అన్న ఆలోచన అన్న ఎప్పుడు ఎ విధం గా దెబ్బ తీస్తాడో తమ్ముడి తంటాలు ఆనందం అంటే వీక్ఎండ్ మందు పార్టీ లలోను , అవకాసమున్నంతకాలం విచ్చలవిడి జీవితాన్ని గడిపి తరువాత ప్రేమ గా పలుకరించేవారు కరువై మానసికం గా ఒంటరి గా మారి విషాదాంతాలు తెచ్చుకోవటం కాదు అందరికి కనువిప్పు మైఖేల్ జాక్సన్ ………కుప్పలు తెప్పలుగా సంపద , జనాల్లో పేరు కాని వ్యక్తిగతజీవితమ్ …అబ్బో పరమ దారుణం .శరీరం శిధిలమై , ఒక్క ముద్దా కడుపార తినలేక మరి ఆనందం అంటే ..సత్యాన్ని గ్రహించటం ……నిత్యమైన సత్యం కోసం అన్వేషించటం మనం గడిపే జీవితాన్ని ఒకసారి పరిశిలించి చూడండి …..మన చుట్టూ వున్న జీవజాలానికి మనకు ఎమన్నా తేడా వుందేమో వుంది ఒక్కటే ……..మనం వుండటానికి సిమెంట్ గోడలు , నాలుగు మెతుకుల కోసం పరుల వద్ద సేవ, బాంక్ బాలన్సులు వాటికి రేపటి ఆలోచన లేదు …….ఎక్కడ వీలైతే అక్కడ తలదాచుకుంటాయి వాటికి నిర్దేశించిన జీవితాన్ని క్రమం తప్పకుండా గడుపుతాయి . సమయం వచ్చినపుడే సంభోగిస్తాయి మనం ఎప్పుడు సంపాదన కోసం , ఇంద్రియ సుఖాల కోసం , ఆకలి తీర్చుకోవటం కోసం ..వీటికోసమే జీవిస్తున్నాం .కాకపొతే ఎవరికి చేతనైన పని వారు చేస్తున్నారు మరి మనం పశు పక్ష్యాదులకన్న ఎ విధం గా గొప్ప ఇలాంటి జీవితం లో ఆనందం ఎక్కడ దొరుకుతుంది అందుకే మానవ జన్మ పరమార్ధమైన సత్యాన్వేషణ చేసే వారే ఆనందపు అంచులు చూడగలరు సత్యం అంటే భగవంతుడు ………. ఆయన గూర్చి అన్వేషణ , ఆయన గాధలు వినటం ఆయన నామాన్ని నిత్యం స్మరించటం , ఆయన గుణాలను కిర్తించటం భగవంతుని సాలోక్య , సారూప్య , సామీప్య , సాయుజ్యాన్ని పొందటానికి ప్రయత్నించటం అదే మనిషి కర్తవ్యమ్ . అదే నిజమైన ఆనందానుభూతి ని అందించే గొప్ప మార్గం సత్యాన్ని అన్వేషించాతానికి గురువు తోడు అవసరం అయితే ఈ రోజుల్లో .గురువుల పేరిట మనిషి బలహినతలతో ఆడుకునే మాయగాళ్ళు అధికమైపోయారు . కనుక సద్గురువును పట్టుకోవటం మనవల్ల కాదు కనుక చక్కగా భగవంతుని గుణగణాలను మనోహరం గా వర్నిచిన పోతన భాగవతం , మహా భారతం రామాయణాలను రోజు ఒక 10 నిమిషాలు చదవటం , అన్నమయ్య , రామదాసు వంటి మహానుభావుల కీర్తనలు ఒక్కటైనా మనకు చేతనైన విధంగా పాడుకోవటం , మన నాలుక తేలిగ్గా పట్టుకోగల భగవన్నామం ఏదైనా ఒకటి ఎంచుకుని పదే పదే దానిని స్మరించటం రోజు వారి క్రమబద్దం గా చేస్తుంటే అప్పుడు మాత్రమే ఆనందపు అసలు రుచి చూడగలరు . లేకుంటే మేము చాలా ఆనదంగా వున్నమన్న భ్రమలో పాతాళానికి దిగాజారిపోగలం ఆలోచించుకోండి .ఎవరి జీవన విధానం వారిది కాదనగల వారెవ్వరూ

భువన మోహన

భువన మోహన

ఆకాశం నుండి జాలు వారుచున్న పూల ధార వలె , శివుని వింటి నుండి దూసుకు వస్తున్న బాణ పరంపరవలె మదనుని చెరకు వింటిని తలపింపచేయు కనుబోమలతో అర్ధ నిమీలిత నేత్రాలనుండి ఎడతెరపి లేని , ప్రేమతో నిండిన , చీకట్లు తొలగితే తమను వీడిపోతాడన్న భయం తక్క మరే బెరుకు లేని నిశితమైన చూపులతో ఆ గోపకాంతలు ఆ జగన్మోహనా కారుడి సౌందర్య మధువును ఆస్వాదిస్తున్నారు . ఎర్రని దొండపండు వంటి , తేనెలూరు పెదవుల నుండి వెలువడుచున్న కాంతితో వెలుగుచున్న ఆ కృష్ణుని ముఖ సౌందర్యం చూపులను ప్రక్కకు తిప్పనీయకున్నది ఎర్ర తామర రెక్కలను పోలిన అరచేతులలో వున్న వేణువు , పెదవుల తీయదనాన్ని తన వేణుగాన తరంగాలలో నింపుకుని కర్ణ పుటాలను సోకి మనసులో మదుర భావనలు రేకెత్తిన్చుచున్నది గోపికల నుదుటి కుంకుమతో నిండిన కృష్ణుని దేహం అరుణ వర్ణపు భానుని వలె శోబిల్లుతుంది . భహుశా ఇట్టి లోకైక నిత్య సత్య సౌందర్యాన్ని చూచే కాబోలు రుక్మిణి ఇలా భావించింది .

ప్రాణేస ని మంజు భాషణలు వినలేని

రంద్రముల కలిమి యేల !

పురుష రత్నమా ! నీవు భోగింపగా లేని

తనులత వలని సౌందర్యమేల

మోహన ! నిన్ను పొడగానగా లేని

చక్షురింద్రియముల సత్వమేల !

దయిత ! ని యధరామృతం బానగా లేని

జిహ్వకు ఫల రస సిద్ది యేల !

నీరజాత నయన ! ని వనమాలికా

గంధ మబ్బలేని ఘ్రాణమేల !

ధన్య చరిత ! నీకు దాస్యంబు సేయని

జన్మ యేల ? ఎన్ని జన్మములకు ?

(పోతన భాగవతం )

aarOgya sUtram

ఈ రోజుల్లో అతి సాధారణ సమస్య ఆరోగ్యం వారి వారి సమస్యలకు తగు రీతి లో చికిత్స పొందలేని వారు ఎందఱో అందులో భగవంతుని పై నమ్మిక వున్న వారి కోసమే ఇది . వాస్తవానికి ఆరోగ్య సమస్యలు అనేవి మనం చేసే తప్పులకు బదులుగా మనకు లభించే , తిరస్కరించలేని బహుమానాలు ఇవి మనకు ఇబ్బంది నే తప్ప , సంతోషాన్ని ఇవ్వలేవు
అందుకోసం ఒక పని చేద్దాం ప్రతి రోజు ఉదయం ప్రశాంతం గా విష్ణు ధ్యానం లో గడుపుదాము ఈ విధంగా ధ్యానం చేద్దాం మన దేహం లో 70 శాతం నీరే వుంటుంది నీరు నారాయణుని వీర్యం నుండి ఉద్భవించింది వీర్యం తేజో వంతమైనది , చైతన్య స్వరూపం అందుకే నీరు మనకు ప్రాణాధారమైనది (మనలో చెడు భావాలు , కోపోద్రేకాలు వచ్చినపుడు కొన్ని రకాల ఆమ్లాలు (రసాయనాలు ) ప్రేరేపితమవుతాయి అవే మన శరీరం లో పేరుకుని రోగకారక క్రిమి ఉత్పాదనకు కారణమవుతాయి కనుక రోగాలు రాకుదదంటే మనం మన ఆలోచనలు నియంత్రించుకోవాలి . అది కుదరదు కనుక ఈ చిట్కాలు పాటిద్దాం ) ప్రళయకాలం లో వటపత్ర సాయి గా సమస్త లోకాన్ని రక్షించే నారాయణుని మనసులో భావన చేసుకుందాం ఎ విధంగా అంటే మర్రి ఆకు మీద , చిన్ని శిశువు రూపంలో , నోటి యందు కుడి కాలి బొటన వ్రేలు పెట్టుకుని అమాయకపు చూపులతో వున్న ఆ వెన్న దొంగ రూపాన్ని భావించుకోవాలి ముందు చెప్పుకున్నాం కదా శరీరం అంతా నీటి తో నిండి వుంటుందని కాలి వేళ్ళ నుండి మొదలు పెట్టి తల వెంట్రుకల వరకు , ప్రతి అవయవాన్ని కూడా స్పర్శిస్తూ మర్రి ఆకు అనే తెప్ప మీద శిశువు రూపం లో వైద్య నారాయణుడు సాగిపోతున్నట్లు , ఆయన స్పర్స తాకిన చోట అంతా పేరుకుపోయిన చెడు అంతా తొలగి , చక్కని ఆరోగ్యవంతమైన భాగం గా మారినట్లు భావన చేయండి ఇలా రోజు క్రమం తప్పకుండా ఒక 15 నిమిషాలు చేయండి ఆరోగ్యం మీ సొంతం అలాగే రోజు , పరగడుపున , ఏదైనా తినటానికి 40 నిమిషాలముందు 4 గ్లాసుల మంచి నీరు త్రాగండి నీరు మీ శరీరం లో పేరుకున్న వ్యర్ధ రసాయనాలు కరిగించి బయటకు నెట్టి వేస్తుంది మరి నీరే నారాయణుడు కదా

హనుమ వస్తుండు …….అవును నిజం మా ఇంటికి వస్తుండు

హనుమ వస్తుండు …….అవును నిజం మా ఇంటికి వస్తుండు నన్ను కాచుకొన ఏమిటలా చూస్తున్నారు …నమ్మశక్యం గా లేదా సరే విషయం ముందు నుండి చెబుతాను అప్పుడైనా నమ్మకం కలుగుతుందేమో అనగనగా ఒక రోజు ..ఎప్పటి లానే తెల్లారింది రోజువారి వురుకులు పరుగులతో ఆఫీస్ చేరుకుని పని మొదలెట్టాం కడుపులో పడ్డ కూడు కంటికి కునుకు తెప్పిస్తున్న వేళ మనసుకు జోల పాడే సమయం కాదు కనుక , హుశారేత్తించటం కోసం ఒకసారి అలా రేడిఫ్ఫ్ బాల్ లోకి తొంగి చూసా ముత్యాల సరాల వంటి పలు వరుసను ప్రదర్శిస్తూ , తళుకులినుతున్న చిరు నగవుతో ఓ చిలకమ్మ పలకరింపు హాయ్ అంతే , ఒక్కసారిగా మాయమయ్యింది నిదుర మబ్బు …అదే మగజాతికి పెద్ద జబ్బు రేకుల డబ్బాలో గులక రాళ్ళ కదలిక ను పోలిన శబ్దంతో కూడిన నవ్వు ఆపై బదులు పలకరింపు పరిచయాలు …..పోసుకోలు కబుర్లు చివరగా బై బై లు మళ్ళి పనిలో పడ్డాం మెరుపు తోడు లేని ఉరుములా ఓ మేఘ గర్జన ఎవరది ?మీ పేరు నా రేడిఫ్ఫ్ ఫ్రెండ్స్ లిస్టు లోకి ఎలా వచ్చింది ?నేను మీకు తెలుసా ? పార్ధుడి గాండీవం నుండి దూసుకు వస్తున్న శరాల్లా ప్రశ్నల పరంపర . హటాత్పరిణామానికి …… ముందు ఉలికిపాటు ఆ పై తత్తరపాటు సర్దుకుని , సావధానం గా చూస్తే , మధ్యాహ్నం నవ్విన చిలకమ్మే ఇప్పుడు గర్జిస్తుంది ఆశ్చర్యపడుతూ మాటా మంతి కలిపితే ఏతావాతా తేలిందేమంటే , ఆ చిలకమ్మ చెల్లి అని మేఘ గర్జన అక్కదని అక్క మెయిల్ నుండి చెల్లి పరిచయం చేసుకున్దన్నమాట విషయం మా ఇద్దరికీ అర్ధమయ్యాక , తన తొలి మాట నువ్వు మంచి అబ్బాయి వేనా ? నేను అవును అంటే , ఎక్కడో వున్నా నీవేల నిర్ణయించుకోగాలవు మంచి వాడనో కాదో ? ఒక్కోసారి ప్రశ్నకు ప్రశ్నే సమాధానం . అలా మొదలైన పరిచయం అత్మీయతకు దారితీసింది నాకు హిందీ రాదు , తనకు ఆంగ్లం రాదు . ఇక తెలుగన్నదే తెలియదు కాని భావాలూ పంచుకోటానికి భాష అడ్డం కాలేదు లంకను లంఘించి , సీతమ్మ వద్దకు రామ దూత గా వెళ్ళిన హనుమయ్య మా ఇద్దరి మద్య వారధి కట్టాడు మన నాలుక పలికే మాట లోను , ఆ మాటను పుట్టించే మనసులోనూ స్వచ్చత వున్నపుడు బంధాలు అవే బలపడతాయి .ఆ ఆత్మీయ బంధం కల కాలం నిలవటానికి ఆ భగవంతుడు కూడా సాయపడతాడు ఇది నా స్వానుభవం (ఒక్కటి మాత్రం నిజం …మగువ మనసంత నిర్మలమైనది కాదు మగవాడి మనసు .కృష్ణా ! తెలిసో , తెలియకో , లేక ని మాయాప్రభావం చేతనో ఎప్పుడైనా నా మనసు జారి వుంటే క్షమించు . ఇక ముందెన్నడూ జారనియకు ) ఇలా కొద్ది కాలం గడిచాక , మా మిత్రురాలికి వివాహం జరగటం , తానూ తన అర్ధాంగుడైన పతి తో పాటుగా వెడలిపోతూ మిత్రమా , మిమ్ము ఎన్నటికి మరచిపోను , మీకు నా బహుమతి గా హనుమంతుడిని మీ ఇంటికి పంపుతానని మాట ఇచ్చి తాత్కాలిక వీడ్కోలు పలికింది ఆ తరువాత చాలా కాలం ఎలాంటి సమాచారం లేదు . తనకు నెట్ సౌకర్యం లేకపోవటం వలన . నేను మామూలు గా నా పనిలో పడి పోయాను ఎప్పుడన్నా ఒకసారి అనుకునే వాడిని ఎలా వున్నదో మా హితురాలు అని ఓ సాయంత్రం , రేడిఫ్ఫ్ ఐ లాండ్ లో నరసింహ అనే బ్లాగ్ పెట్టటానికి , నెట్ సెంటర్ కు వెళ్లి యధాలాపం గా రేడిఫ్ఫ్ బాల్ చూసా ఆశ్చర్యం నా ఆప్తురాలు …..చాలా కాలం తరువాత కుశలం అడుగుతుంది చెప్పలేనంత సంతోషం ….అంతలోనే పట్టరాని దిగులు అప్పటికే తానూ ఆఫ్ లైన్ . సరియ సరియ మెసేజ్ చూసాను , వాటి సారాంశం హనుమంతుడు మీ వద్దకు రావటానికి సిద్దం గా వున్నాడు అః ! ఎంతటి శుభవార్త కొత్తగా వివాహమయి , పెండ్లి కళ ఇంకా మాయమవలేదు , అత్తా వారింట , అత్తా మామలకు సపర్యలు చేసుకుంటూ , అర్ధంగుడికి చక్కని మనోల్లాసాన్ని కలిగిస్తూ , తీరిక లేకుండా గడుపుతూ కూడా ,కాసింత తీరిక చేసుకుని , నా హితం కోరి , తన ప్రభువైన హనుమంతుడిని నా ఇంటికి పంపించటానికి సిద్దం చేసింది ఏమిటలా చూస్తున్నారు ….మళ్ళి ఆవిడెవరో చెప్పట మేమిటి ……హనుమానుడు రావటమేమిటనా అదే భగవంతుడి గొప్పదనం తననే , త్రికరణ శుద్ది గా నమ్మి , తన శరణాగతి పొందిన భక్తులకు ఆయన సేవ చేస్తాడు . వారు ఏమి కోరితే అది చేస్తాడు కనుకనే , తన భక్తురాలు అయిన మా మిత్రురాలి కోరిక మన్నించి మా ఇంటికి రావటానికి సంసిద్దుదయ్యాడు , తోమ్మిదేండ్ల పసి ప్రాయం లో , వచ్చిన కలను నమ్మి , నాటి నుండి నేటి వరకు తెల్లవారు ఝామున 4 గంటలకు నిదుర లేచి , ఆ రామ దూత కు హారతి ఇచ్చి సేవ చేస్తూ తల్లి తండ్రులను గౌరవిస్తూ ,సంస్కారవంతమైన నడవడిక , శరత్కాలపు చంద్రుని చల్లదనాన్ని మరపించు చల్లని మనసు కలిగి వున్న నా అత్మీయుడి , తన పాదాలనే హృదయకమలం లో నింపుకున్న తన భక్తురాలి కోరిక మేరకు హర్యానా లోని కురుక్షేత్ర సమీపాన వున్న జింద్ నుండి మన భాగ్యనగరికి ఈ అభాగ్యుడి ఇంటికి రాబోతున్నాడు హనుమాన మహా ప్రభు హే హనుమా రోజు ని చరణారవిన్దాలను దర్శించుకొని , మంగళ హారతులతో , కర్పూర నిరాజనాలిస్తూ షడ్రసోపేతమైన రుచులతో కూడిన నైవేద్యమిస్తున్న ని ముద్దుబిడ్డ వద్ద నుండి ఈ మూఢుని గృహమునకు విచ్చేయుచున్నవా నేనేమి ఈయగలవాడను నా ఆలోచనలనే అప్పాలుగా నైవేద్యమిచ్చేద నా మనసునే మందార మాల చేసెద నా ఉచ్చ్వాస నిస్స్వాసాలనే ఉయాల చేసెద నా హృదయాన్నే పిఠం చేసెద నా దేహాన్ని తివాచి గా పరచి స్వాగతం పలుకుతున్నాను ప్రభు నన్ను , నా వంశాన్ని సంరక్షింప , ని ప్రసాద ఫలం గా లభించిన నా ఆప్తులకు ఆశీస్సులోసగా వేగిరమే రమ్ము ……..వేయి కనులతో వేచి వుంటిని తండ్రి .

పిక్: సంజన దత్త

ప్రేయసీ

ప్రేయసీ (krishna saastri gaari.........krishna paksham nundi)
ప్రేయసీ ప్రేయసీ ప్రియుడనే ప్రేయసీ !
వేయి కన్నులు దాల్చి వెదుకుచున్ననే !

నల్ల మేఘాలలో నాయమా దాగంగ ?
తల్లడిలవో నన్ను తలచి రావో !

మెరుపు వై యోయ్యారి యెరపు వై
యరసి నంతనే మబ్బు తెరల దాగితివా !

తళుకు మని కనిపించి వలపు వెల్లువ ముంచి
వలపించి మాయమై వనట గూర్చితివా !

నల్ల మబ్బుల నింగి నా సౌధ రాజమ్ము
నల్ల మబ్బే ప్రియుడు నన్ను గోరకుమా

ఆడుచును బాడుచును హాయిగా నవ్వుచును
పాడు మేఘాలతో పరుగెత్తే మెరపు

NRUSIMHAA

ఇట్లు దానవేంద్రుండు పరిగ్రుహ్యమాణ వైరుండును, వైరానుబంధ జాజ్వల్యమాన రోషానలుండును,రోషానల జంఘన్యమాన విజ్ఞాన వినయుండును,వినయ గాంభీర్య ధైర్య జేగీయమాన హృదయుండును హృదయ చాంచల్యమాన తామసుండును ,తామస గుణ చంక్రమ్యమాణ స్థైర్యుండును నయి విస్రంభంబున హుంకరించి, బాలుని ధిక్కరించి హరి నిందు జూపుమని కనత్కనక మణిమయ కంకణ క్రేంకార శబ్దపూర్వకంబుగా దిగ్ధంతి దంత భేదన పాటవ ప్రసస్తం బగు హస్తంబున సభామండప స్థంభంబు వ్రేసిన వ్రేటు తోడన దశ దిశలును మిణుగురులు సెదర జిటిలి పెటిలి పడి బంభాజ్యమానం బగు న మ్మహాస్తంభంబు వలన ప్రళయ వేళా సంభూత సప్త స్కంద బంధుర సమీరణ సంఘటిత జోఘుష్యమాణ మహా బలాహక వర్గ నిర్గత నిబిడ నిష్టుర దుస్సహ నిర్ఘాత సంఘ నిర్ఘోష నికాసంబులైన చట చ్చట స్ఫట స్ఫట ధ్వని ప్రముఖ భయంకరారావపుంజంబులు జంజన్యమానంబులై ఎగసి యాకాస కుహరాన్తరాళమ్బు నిరవకాసంబు సేసి నిండినం బట్టు చాలక దోదూయమాన హృదయంబులై పరవసంబులైన పితామహ మహేంద్ర వరుణ వాయు శిఖి ప్రముఖ చరాచర జంతు జాలంబులతోడ బ్రహ్మాండ కటాహంబు పగిలి పరిస్ఫోటితంబుగా బ్రఫుల్ల పద్మ యుగళ సంకాశ భాసుర చక్ర చాప హల కులిశాన్కుశ జలచర రేఖాంకిత చారు చరణ తలుండును చరణ చంక్రమణ ఘన వినిమిత విశ్వ విశ్వంభరాభర దౌరేయ దిక్కుంభి కుంభీనస కుంభినిధర కూర్మ కులశేఖరుండును దుగ్ద జలధి జాత శుండాల సుండాదండ మండిత ప్రకాండ ప్రచండ మహోరు స్తంభ యుగళున్డును ఘన ఘణాయమాన మణికిన్కినీగణ ముఖరిత మేఖలావలయ వలయిత పీతాంబర శోభిత కటి ప్రదేసుండును , నిర్జర నిమ్నగా వర్త వర్తుల కమలాకర గంభీర నాభి వివరుండును ముష్టి పరిమేయ వినుత తనుతర స్నిగ్ధ మధ్యుండును , కులాచల సానుభాగ సదృశ కర్కశ విశాల వక్షుండును , దుర్జన దనుజభట ధైర్యలతికా లవిత్రయామాస , రక్షో రాజ వక్షో భాగ విసంకటక్షేత్ర విలేఖన చుంచులాంగాలాయమాన ,ప్రతాప జ్వలన జ్వాలాయమాన శరణాగత నయన చకోర చంద్ర రేఖాయమాన వజ్రాయుధ ప్రతిమాన భాసమాన నిశాత ఖరతర ముఖ నఖరుండును , శంఖ చక్ర గదా కుంత తోమర ప్రముఖ నానాయుధ మహిత మహోత్తుంగా మహీధర శృంగ సన్నిభ వీరసాగర వేలాయమాన , మాలికా విరాజమాన నిరర్గళానేక శత భుజార్గళున్డును , మంజు మంజీర మణిపుంజ రంజిత మంజుల హారకేయూర కంకణ కిరీట మకర కుండలాది భూషణ భుషితుండును , త్రివళియుత శిఖరి శిఖరాభ పరిణద్ధ బంధుర కన్ధరుండును ,ప్రకంపన కంపిత పారిజాత పాద పల్లవ ప్రతీకాశ కోపావేశా సంచలితాధరుండును . శరత్కాల మేఘజాల మధ్యమ ధగద్ధగాయమాన తటిల్లతా సమాన దేదీప్యమాన దంష్ట్రాంకురుండును , కల్పాంతకాల సకల భువన గ్రసన విలసన విజ్రుమ్భమాణ సప్తజిహ్వ జిహ్వా తులిత తరళ తరాయమాన విబ్రాజమాన జిహ్వుండును , మేరు మందర మహా గుహాన్తరాళ విస్తార విపుల వక్త్ర నాసికా వివరుండును , నాసికా వివర నిస్సర న్నిబిడ నిస్స్వాస నికర సంఘట్టన సంక్షోభిత సంతప్యమాన సప్తసాగరుండును , పూర్వ పర్వత విద్యోతమాన ఖద్యోత మండల సద్రుక్ష సమంచిత లోచనుండును , లోచనాంచల సముత్కీర్యమాణ విలోల కీలాభీల విస్ఫులింగా వితాన రోరుధ్యమాన తారకా గ్రహ మండలుండును Saక్ర చాప సురుచిరోదగ్ర మహా భ్రూలతాబంధ బంధుర భయంకర వదనుండును , ఘనతర గండ శైల తుల్య కమనీయ గండ భాగుండును , సంధ్యారాగ రక్త దారధరమాలికా ప్రతిమ మహా బ్రంకష తంతన్యమాన పటుతర సటాజాలుండును ,సటాజాల సంచాలన సంజాత వాత డోలాయమాన వైమానిక విమానుండును , నిష్కంపిత శంఖ పర్ణా మహోర్ద్వకర్ణుండును , మన్ధదండాయమాన మందర వసుంధరాధర పరిభ్రమణ వేగ సముత్పద్యమాన వియన్మండల మండిత సుధారాశి కల్లోల శికరాకార భాసుర కేసరుండును , పర్వాఖర్వ శిశిర కిరణమయూఖ గౌర తనూరుహున్డును , నిజ గర్జన నినాద నిర్దళిత కుముద సుప్రతీక వామనైరావత సార్వభౌమ ప్రముఖ ధిగిభరాజ కర్ణ కోటరుండును , ధవళ ధరాధర దీర్ఘదురవలోకనియ దేహుండును , దేహ ప్రభాపటల నిర్మధ్యమాన పరిపన్ధి యాతుదాన నికురుంబ గర్వాంధకారుండును , బ్రహ్లాద హిరణ్యకశిపు రంజన భంజన నిమిత్తాంతరంగ బహిరంగ జేగీయమాన కరుణా వీర రస సంయుతుండును , మహా ప్రభావుండును నైన శ్రీ నృసింహదేవుం డావిర్భవిన్చినమ్ గనుంగొని . (పోతన మహానుభావుని చే వివరించబడిన మహోన్నతమైన శ్రీ నృసింహ దేవుని అవతార వర్ణన మహాభాగవతం నుండి తెలుగు చదవండి దానిలోని తీయదనాన్ని ఆస్వాదించండి )

పిక్: స్టార్

brundaavana vihari

బృందావన వీదుల తిరిగేని దేవకీ సుతుడు

గోపికల మురిపించు సింగారముల తోడను

వెన్న మీగడల దొంగిలించు నొకమారు

ఆల మందల అంబా రవముల మురిసేనోకమారు బృందావన

ఆటపాటల గోపబాలకుల అలరించు నొకమారు

అల్లరి చేష్టలతో రక్కసుల దునుమార్చు నొకమారు బృందావన

గోవర్ధనమెత్తి ఇంద్రుని అహమణిచే నొకమారు

గోవత్స బృందమంతయు తానై గోకులమునకు ముదమోనర్చే నొకమారు బృందావన

కాళింది శిరమున తాండవమాడే నొకమారు

గోపికల కూడి సరస సల్లపములాడే నొకమారు బృందావన

యశోద మమతల త్రాటికి బంది అయ్యేనోకమారు

విస్వమునెల్ల నోట బంధించి చూపే నొకమారు బృందావన

వలువలు దాచి గోపికల వ్యామోహ ధనం దోచే నొకమారు

భిక్ష కోరి బ్రహ్మణ సతుల మోక్షమొసగే నొకమారు బృందావన

ఎల్లమారులు నా మనోబృందావనమున నడయాడి

రోగములను పాపములను పరిహరించే ని వాసుదేవుడు బృందావన

pic: stiphen

అల్లరి అన్వేష చిననాటి తీపి గురుతులు

బాల్యం ఒక తీయని జ్ఞాపకం.

వెనుతిరిగి చూస్తే లెక్కలేనన్ని అనుభూతులను ఆనందాలను కనులముందు కదిలిస్తుంది.

వేగం గా పరుగెడుతున్న యాంత్రిక జీవనం లో అలసిన మనసును తిరిగి వురకలు వేయించు ఓషదం.

జీవితమనే కావ్యం లో అందమైన గీతిక

అందులోని కొన్ని చరణాలను కదిపి చూస్తే , రాలిపడ్డ రాగమాలికలివి

మామూలుగా, ఇంట్లో ఒక ఆడ పిల్ల తిరుగుతుంటేనే లక్ష్మి కళ వుట్టిపడుతున్దన్టారు

అలాంటిది మువ్వురు మహా లక్ష్మిలు ఒక చోట చేరితే?

ఇంకేమన్నా ఉందా………. ఇల్లు పీకి పందిరి వేయరూ…….

అలా ఆట పాటలతో, చిలిపి చేష్టాలతో సందడిగా సాగిపోయిన నా చిననాటి జ్ఞాపకాలే నాకు నిజమైన నేస్తాలు.

వాటి లో కొన్ని

బహుశా అమ్మమ్మ ఒడిలో విన్న కథల ప్రభావమేమో,

నాతో గొడవ పడిన ప్రతీసారి మా అక్కా నన్ను శపిస్తున్డేది

చేతి లో చెంబు పట్టుకుని నీళ్ళు చిమ్ముతూ …………కుక్కవై పో…అని

బిక్కమొగమ్ వేసుకుని నేనున్టే

మా అత్త, ఎవరైనా శపిన్చినపుడు చేయి అడ్డం పెట్టుకున్టె ఆది ఫలించదని వూరడిన్చేది.

ఓ! గుట్టు తెలిసిందిగా మా అక్కా మాయాల మరాటీ ….నేను ..బాల నాగమ్మ……… ఒంటి చేత్తో శాపం తిప్పికొడతా పెద్దలు వద్డన్నది చేయటమే బాల్యం.

మా అక్కకు నాకు జీవ్వు మనిపిన్చే చింత పులుపంటే తగని మక్కువ. ఎవరు చూడకుండా ఇద్దరం పిల్లుల్ల వంటింట్లోకి దూరి డబ్బాలు వెతికి మరీ సాధించేవాళ్ళం…..చింతపండు ని.

ఏవరూ చూడలేదని , ఓ మూలకు చేరి చింత పులుపు ఆస్వాదిన్చేవేళ

అలా చింతపండు తింటే చెవుడు వస్తుందే…….నానమ్మ ప్రేమతో కూడిన బెదిరింపు

ఆ పులుపు ముందు ఈ పుల్లని మాటలు రుచించేవి కావు.

ఓ రోజు మా ఇంటికి వచ్చిన పెద్దాయన……..చెవుడు తో ఇబ్బంది పడేవాడు ఎంత అరచి చెప్పిన వినబడేది కాదు.

అంటే ఈయన కూడా చిన్నప్పుడు బాగా చింత పండు తిన్నాడన్నమాట,

ఆ క్షణం మొదలు…..చింత పండు వాడిన పదార్ధమేది మా దరి చేరనివ్వలేదు .

ఇక వానాకాలం వచ్చిందంటే ఆ సంతోషమే వేరు

కాగితపు పడవను ఇంటి ముందు నిలిచిన నీటి మదుగులో వదిలి కేరింతలు కొడుతూ, ఆది ఎక్కడ టైటానిక్ లా మునుగుతుందో అని రాత్రి పూట నిదుర కాచి ఆ కాగితపు పడవను కాచుకున్న క్షణాలు………

మేరుస్తున్న ఆకాశపు కెమెరా కు మా అక్కా నేను మెరుపు తీగల వలె ఫోజులిచ్చినా క్షణాలూ

ఈ చిన్ని గుండెలో ఇంకా పదిలం.

వెనకింటిలోకి దొంగల్లా జొరబడి నేరేడు పండ్లు తెచ్చుకున్న కాలం ఓ తీపి గుర్తు.

ఇక ముగ్గురం ఒక చోట చేరి పెద్ద ఆరిన్దాల్లా………..

సైకిల్ తొక్కతమంటే ఇష్టపడే అక్కయ్య పెద్దయ్యాక సైకిల్ కొనుక్కుంటానంటే,

తనకన్నా పైమెట్టులో వుండాలన్న పంతం కల నేను….కారు కొంటానన్నను

చిట్టి చెల్లి …………పెద్దక్క .రెండు చక్రాలు, చిన్నక్క……….నాలుగు చక్రాలు……..నేను ఏంచక్క మూడు చక్రాలున్న ఆటో కొన్టనన్నది.

ఇడ్లీ అన్న ఆటో అన్న ఇశ్టపడే తనను, అయితే ఒక డ్రమ్ములో చట్నీ, ఇంకో డ్రామ్ము లో ఇడ్లీ లేసుకుని ఆటో లో తిరగమని ఉడికించిన క్షణం.

ఇంటికి వచ్చిన ఆతిది కోసం పెద్ద గిన్నె లో టి కాస్తున్న చెల్లిని, బకెట్ నిండుగా తీసుకెళ్ళి, తాగటానికి ఒక మగ్ కూడా ఇవ్వమని ఆటపట్టిన్చిన క్షణం అన్ని నా మది లో పదిలం

ఈ అనుబందాలు ఆప్యాయతలు కలకాలం నిలిచిపోవాలని చిన్ని కృష్ణుని కోరుకుంటున్నా.

పాపం aandhrulu

మహా పాపులు ఓ తంతు ముగిసింది. మరోసారి ఆంధ్రులు ద్రుతరాశ్ట్రుడి కౌగిలి లో నలిగి పోనున్నారు మరి ఈ దుస్థితి కి కారణం ముఖ్యం గా ఇద్దరు ఒకరు …. .అమాయకులైన ప్రజలను ప్రాంతీయ భావోద్వేగాలకు గురి చేసి వారి భావోద్రెకాలను పెట్టు బడిగా తన వ్యక్తిగత ప్రయోజనాలు నెరవేర్చుకున్నవడు మరోకడు….. తనతో ఎటువంటి బన్దుత్వమ్ లేకున్నా, తమ రక్త సంబంధికులకు కూడా ఇవ్వని గౌరవాన్ని ఇస్తూ, తన కోసం ప్రాణాలివ్వటానికి సైతం వెనుకాడని అభిమానుల రక్తాన్ని, ఆత్మాభిమానాన్ని తాకట్టు పెట్టినవాడు మార్పు తెస్తా మార్పు తెస్తా నన్టు…….. బ్లాక్ లో టిక్కెట్లు అమ్ముకున్నట్లు, సీట్లు అమ్ముకుని రాజకీయాలలో ఎవరు ఊహిన్చని మార్పు తెచ్చిన చీడ పురుగు తెగులు పాకిన్దేమో, వీడిని చూసి , తెలంగానం ఆలపించిన వాడు సైతం…. వేలం గానమాలాపిన్చాడు గెలుపు ఓటములతో నిమిత్తం లేకుండా పోరాడేవాడు ……యోధుడు, నిజమైన సైన్యాధ్యక్షుడు వారిని అనుసరిన్చేవారికి గెలిస్తే రాజ్యం. ఓడితే ….వీర స్వర్గం. అలాకాక, నమ్మి వెంట నడిచేవారి జీవితాలను ఫణమ్ గా పెట్టి, వారి ఆత్మ గౌరవాన్ని వేలం కట్టే వారి వెంట నడిస్తే చివరకు మిగిలేది? అభిమానులు ఆలోచించుకోండి ఇంకా నే పట్టిన కుందేటికి మూడే కాళ్ళన్న మూర్ఖత్వమ్ విడండి విలువైన మీ జీవితాలను ఇలాంటి వారి కోసం వ్యర్ధమ్ చేసుకోకండి మీ ఉన్నతిని కోరి మీ కోసం తపిన్చే మీ వారి గురించి మాత్రమే ఆలోచించండి

వానా కాలం

అప్పటి వరకు భానుని ప్రతాపాగ్ని కి బీటలు వారి బీడు బారిన భూమి తొలకరి జల్లు స్పర్శతో పులకరించి వెలువరించే మట్టి గంధపు వాసన ఆస్వాదించాల్సిందే కానీ , వివరించటం సాధ్యం కాదు నల్లని దట్టమైన నీరుకావి రంగు పంచె కట్టిన వాన దేవుడి పలకరింతకు ప్రతిగా ,

పుడమి కాంత లేత ఆకు పచ్చ చీర తో సోయగాలు చిందిస్తుంది.

అప్పటి వరకు నీలి వర్ణం లో నిర్మలం గా ఉన్న ఆకాశం నల్లని దట్టమైన రంగు లోకి మారి మేఘ గర్జనాలతో పిడుగులు కురిపిస్తుంది

వెలిగి పోతున్న చంద్రుడు నల్ల మబ్బు చాటున దాగిన వేళ మిణుగురల కాంతి దారి చూపుతుంది

ఎండిన గొంతుకతో నోళ్ళు తెరిచిన పిల్ల కాలువలు , బిర బిరా పరుగులు

వరకు బంధు మిత్రులతోను , కళల పోషణ లోను సేద దీరిన రైతన్న తిరిగి వ్యవసాయానికి సిద్దమవుతాడు వారి నాట్ల తో పంట చేలు సందడి గా వుంటాయి

ఆ సందడి సవ్వడి విన్న ఓ సినీ కవి…..ఇలా పాడుకుంటున్నాడు

ఓరి…. ఓరి……. వారి చేలో ఒంగుని చిన్నది నాటేస్తున్టే తొంగి చూసిన సూరీడైనా డన్గై పోతడురో

అంటూ

ఇంటి ముందు కాలువ కట్టిన నీటి ని చూస్తు, కాగితపు పడవలు చేసి వాటి తో పాటుగా మనం ఆ నీటి లో షీకారు కెళితె

ఎంతటి అందమైన వానా కాలపు బాల్యమో కదా

లాహిరి ……….లాహిరి లో

చూరు నుండి కారుతున్న వర్షపు నీటి ధారలను చూస్తు, వేడి వేడి పల్లీలకు కారం అద్దుకు తింటూంటే………

వాహ్ వా ఏమీ రుచి అనరా మైమరచి

ఆకాశపు నుదితి నుండి రాలైన నీటి చుక్క చినదాని కింది పెదవి పై చేరి ముత్యపు చినుకై మురిసిపోతుంది.

సాయంకాలం షీకారు కెళ్ళిన చిన్నది చిన్నవాడు ఒక్కసారిగా వాన జల్లు లో తడిసిపోతే

చెలి శిరము నుండి నాశిక మీదుగా, చిరు గడ్డం చేరి ఒక్క వుదుటన ఎదను తాకుతున్న జలధారలు చినవాడి గుండెల్లో గుబులు రేపుతుంటే,

దూరంగా పడిన పిడుగుపాటుకు చెలి తత్తరపాటూ తో జతగాడి ని హత్తుకుపోతే

పుట్టిన ప్రణయ కావ్యమే

చిట పట చినుకులు పడుతూ వుంటే

చెలికాదే సరసన వుంటే

చెట్టా పట్టగ చేతులు పట్టి చెట్టు నీడకై పరుగేడుతుంటే

చెప్పలేని ఆ హాయి ఎంతో వెచ్చగా వున్టున్దోయి.

వడగాడ్పులతో ఉడుకెత్తించిన వేసవినిక పొమ్మంటు

రాబోయే వర్షాకాలానికి రా రమ్మని, రా రారమ్మని ఆహ్వానం పలుకుతూ యెంతటి రొమాంటిక్ కాలమీ వర్షాకాలం

ప్రకృతిని ఆస్వాదించమని భగవంతుడు ఇచ్చాడు

కోరి వినాశనకరం గా మనిషి చేసుకుంటున్నాడు

క్రిష్ణ ఆ పేరు వినగానే మన కనుల ముందు కదులాడుతుంది ఒక సుందర రూపం.

కనురెప్ప వేయాలంటేనే, అమ్మో అంత కాలం పాటు ఆ రూపాన్ని చూడకుండా వున్డగలమా అని రెప్పపాటు కూడా మరచి చూసేన్త సమ్మోహన రూపం

శిఖీ పిన్ఛ మౌళి

పొడుగైన అందమైన వత్తైన ఉంగరాల జుట్టు దానిపై శోభాయమానంగా రీవీ గా నిలచిన నెమలి పించం

తిరుపతి లడ్డు వలె నోరూరించే తీయని వదనమ్

పద్మపు రెక్కల వంటి ఎర్రని అరచేతి యందు అందమైన వేణువు

నిత్య యవ్వనం తో ఆలరారు , లక్ష్మి కిరణుల పాలి ఘన పారిజాతం ఆ గోపాల కృష్ణుడు.

యవ్వన వతులైన గోపకాన్తలు తమను తాము మరచి ఆ నిత్య యవ్వనుడిని చూసి పరవశించి పోతున్నారు

మురళి రావం అక్కడి వాయువులను తన మదుర తరంగాలతో నింపి వేయగా ఆ గాలిని పీల్చిన గోపకాన్తలు, నాగస్వారానికి నర్తిన్చే నాగుల వలె తపిన్చిపోతున్నారు

అందుకే అన్నమయ్య అంటాడు

అదే చూడరే మోహన రూపం 1 పది కోట్లు గల భావజ రూపం

వెలయగ పదారు వేల మగువలను ! అలమిన ఘన మోహన రూపం

మదన మయూకపు ఈకలతో అలంకరించబడిన కృష్ణ వర్ణపు శిరోజాలు శంఖపు వెనుక భాగాని పోలిన మెడ ను దాటి భుజాల పై వేలాడుతూ మనోజ్ఞంగా ఉన్నాయి.

అహా! ఎంతటి మహద్భగ్యం పశు పక్ష్యాదులు కూడా ఆ పరంధామునకు సేవ చేసి తరించుటకు ఊత్సుకతను ప్రదర్శిస్తున్నాయి.

గోవిందుని స్పర్శతో గోమాతలు పాల ధారలను కురిపిస్తున్నవి

దట్టమైన వానా మబ్బు వర్ణంలో మనోహరం గా ఉన్న కృష్ణుని చూసి పరవశించిన నెమలి తన పించ్ాన్ని బహుకరించింది

నంద కిశోరునికి కస్తూరి మృగం అందమైన తిలకాన్ని అద్ది చరితార్ధమయ్యింది

పూబాలలు సుకుమారుని కంట సీమను ఆక్రమించుకుని సాఫల్యత పొందాయి.

అశ్వాలు కురుక్షేత్ర సంగ్రామం లో ఈ రధ సారధునికి సేవ చేసి తరించాయి

వికసించిన తామర బోలు ముఖారావిందం తో, తీయని నగవులు చిందించు పెదవులతో, ఆనందాన్ని కురిపించు కనులతో కూడిన ఆ బాల కృష్ణుని దివ్య మనోహర రూపం నా హృదయమంతా నిండి వుంది ఓ అల్లరి పిల్ల వాడా ఎన్నడు నా హృదయాన్ని వీడకు

మనస్సు అనే మానస సరోవరమ్లో విరబూసిన కమలం వలె కడు కమనీయమ్ గా ఉంది ఆ కమలనాభుని ముఖార విందం.

నింపారైన నునుపైన ఆయన బుగ్గలు , ఆ సరోవరమ్లో తళుకు మంటున్న అద్డం వలె మెరయుచూ, ఆ సరస్సును అద్దపు ప్రతిబింబం వలె ప్రతిఫలింప చేయుచున్నవి.

ఆ కమలాక్షుని కనులు, పద్మరాగా మణులవోలే, ఒక పెద్ద కమలంలో ఆరవిచ్చిన రెండు చిన్ని కమలాలవలే ఆకర్షించుచున్నవి.

ఆయన ముఖ కమలమన్థా కూడా, వేణువు నుండి వెలువడుచున్న అమృత స్వరాలతో పులకితమై, భక్తుల మనస్సులను, మకరన్దమ్ తేనెటిగలను ఆకర్షించినటుల ఆకర్షిస్తున్నది.

హే కృష్ణా……… విశయవాసనాసక్తిని వీడి, ని పాదపద్మముల దూళి సేవించ మనస్సు కలిగిన వాడనై ని వైపు పరుగులు తీయునటుల చేయవయ్య

పైపైనే సంసార భన్ధముల కట్టేవు

నా పలుకు చెల్లునా నారాయణా

నిగమానిగమాన్త వర్ణీత మనోహర రూప

నగరాజధరుడా నారాయణా

పండు వెన్నెల

చిరు సవ్వడులు చేస్తూ జల జలా పారుతున్న యమున

చన్దురుని కిరణాలు తాకి పసిడి వర్ణం లో మేరుస్తున్న రేణువులతో కూడిన మృదువైన ఇసుక తిన్నెలు

అట్టి అందమైన రాతిరిలో ……ఆ యమునా తీరాన

సకల గుణ రాశి, మదుర సామ్రాజ్యాధిపతి వేల పున్నమి చన్దురుల మరిపించు ముద్దు మోము వాడు

అందరూ పొన్దతగిన వాడు

ఆ మువ్వ గోపాలుడు

తన చుట్టూ నిలిచిన చంచల స్వభావాన్ని కలిగి, తమ కోరికలను కనుల భావాల ద్వారా తక్క మాటల తో వెల్లడి చేయటానికి అశక్తులైన అమాయకపు గోపికలు

వారిపై తాను కూడా శరత్కాలపు చంద్రుని చూపులవన్టి చల్లని ప్రేమ పూర్వక చూపులను ప్రసరిస్తు అదే సమయంలో తన అమృతమయమైన దృక్కులతో క్రిగంట నిత్యం తన వక్షాస్తాలంలో నివసించే ఆ మహా లక్ష్మి ని చూస్తున్న ఆ ముద్దు మోవి వాడు

ఈ లక్ష్మి కిరణుల ముంగిట ముత్యమై నిలచినట్టి వాడు

(లక్ష్మి దేవి ఎల్లప్పుడు శ్రీమన్నారాయణుని తోనే ఉంటుంది. ఆయన క్రొత్త అవతారం ధరించినపుడల్ల తాను కూడా అవతరిస్తూనే వుంటుంది. చివరకు వామానావతారం (బ్రహమాచారి) లో కూడా ఆయన హృదయం లో లక్ష్మి అలానే ఉంది. అందుకే, బలి వద్దకు దానం కోసం వచ్చినపుడు తన వక్షాస్తాలాన్ని జింకా చర్మం తో కప్పివుంచుతాడు. లేకుంటే ఆ తల్లి తన దయాపూర్వక చూపులనుబలి పై ప్రసరింప చేస్తున్నపుడు అతనీనుండీ సంపద దూరం చేయటమ్ సాధ్యం కాదు కదా) (శ్రీ లీలా శుకులు..క్రిష్ణ కర్ణామ్రుతమ్)

krishNaa

ప్రియ భగవత్ బందువులారా వేగిరమే రన్డు

ఈ లక్ష్మీ కిరణుల ముద్దు బిడ్డడిని చూడండి

స్వతరుణీమణులైన శ్రీ దేవి , భూదేవి, నీల బృందావనంలో ఉన్న ఆ మురిపాల కృష్ణుడి సమ్మోహన రూపాన్ని చూసి పులకితమైన మనస్సుతో గగన తలమ్ నుండి పారిజాతాలతోను, కోరిన కోరికలు తీర్చే కల్పతరు పుష్పాలతో అర్చిస్తున్నారు

మరో వైపు అమాయకపు పల్లె పడతులు గోపికలు మల్లీ మందారాలు, పున్నాగాలతో ఆ చిన్ని కృష్ణుడిని మున్చెత్తుతున్నరు.

వినండి

ఆ గోపాలుని వేణు నాద తరంగా ధ్వనులను

మనసులోని వ్యాకులతను తొలగించి, ప్రశాన్తతను చేకుర్చు ఆ సుమదుర వేణు గాన తరంగాలు చెవిన sOki

పాలు కుడుచుచున్న లేగదూడలు ఆకలి మరచి, అమ్మను విడచి చిన్ని కిశొరుని చెంతకు ఎలా పరుగులు తీస్తున్నయో

గడ్డి మేయు చున్న పశువులూ అంత కన్నా రుచికరమైన ఆ మదురిమలను గ్రోల వేగిరమే కృష్ణుని చెంతకు పరుగులు తీస్తున్నవి

ఆటపాటలలో నిమగ్నమైన ఆ గోప బాలూరు ఒక్కసారిగా ఆ గాన వాహినిలో తడిసి మైమరచిపోతున్నరు. మలయసమేరమ్ తో పాటుగా మంద్ర స్తాయి లో చెవిన సోకిన వేణుగాన తరంగాలు శరీరాన్ని పులకింప చేయగా, తామున్న స్టితి ని కూడా మరచి గోప కాంతలు జారిపోతున్న దుస్తులతో కొందరు, పుర్తిగాని అలంకరణాలతో కొందరు, చేస్తున్న పనులను అలాగే వదలి ఇంకొందరు కృష్ణుని చేర ఎలా పరుగులు తీస్తున్నరో చుడండి

కోరిన వారికి మొక్షాన్ని, ఆది కోర శక్తి లేని వారాలకు వారికి అవసరమైన ఇహ లోక సౌఖ్యాలను ఇవ్వగల సమర్ధుడు నిరాకారుడైనప్పటికీ, సమ్మోహనకరమైన ఈ అందాల గోప బాలుడిగా నిలచిన లక్ష్మి కిరణుల ముద్దు బిడ్డడికి ప్రణామాలతో