చూచితిలె అజ్ఞాతవాసి

చిలిప చూపులు చిలకరించు చక్రాల చిన్ని కన్నులు

చేప కనులలో చూచితిలె అజ్ఞాతవాసి  చూచితిలె

 బంగారు పుడకతో నొప్పారు నాసిక 

సంపెంగ సోయగాలలో చూచితిలె అజ్ఞాతవాసి  చూచితిలె

 సిగ్గుబంతులు బూయించే బూరెల బుగ్గలు 

 ముద్దా బంతులలో చూచితిలె అజ్ఞాతవాసి  చూచితిలె

  

పూతరేకుల పై పెదవి పూచే ముత్యపు బిందువులు 

మంచుకాలాన గులాబీ రెక్కపై నిలిచే మంచు బిందువులో చూచితిలె అజ్ఞాతవాసి  చూచితిలె

 ఎర్రని దొండ పండు వంటి పెదవులు చిందించు చిరు దరహాసం వెన్నెలలు కురిపించు 

వెన్నెల రేడు కాంతులలో చూచితిలె అజ్ఞాతవాసి  చూచితిలె

 

అలక పూనిన వేళ ముని వేళ్ళ  స్పర్శతో పులకితమౌ చిరు చుబకం 

అరవంక నెలవంకలొ చూచితిలె అజ్ఞాతవాసి  చూచితిలె

 మృదు మదురమగు కోమలి కంటసీమ 

 శంఖు శోభలలో చూచితిలె అజ్ఞాతవాసి  చూచితిలె  

 నీ సౌందర్య రూపం మమతల మణి దీపం ప్రేమాప్యాయతల ప్రతిరూపం

 నా హృదయ సీమలో భాసిల్లుతుండగా చూచితిలె అజ్ఞాతవాసి  చూచితిలె

ఓ అజ్ఞాతవాసి

నేనొక ఆప్యాయతల అన్వేషిని

నీవేమో ఆప్యాయతల రూపధారివి 

 

నేనొక ప్రేమ పిపాసిని

 నీవేమో ప్రేమకు ప్రతిరూపానివి 

 

 నేనొక ఆశావాదిని 

నీవేమో ఆశకు ఆలంబనవు 

 

 నేనేమో మమతకు దాసోహం 

నీవేమో మమతల మణిదీపం 

 

నేనొక ఆనంద విహారి 

నీవేమో ఆనందాలకు ఆటపట్టు 

 

నేనేమో వినయానికి విధేయుడిని 

నీవేమో వినయ భూషణవు 

 

నాదేమో చక్కని పలకరింతకై ఎదురుచూపు 

నీవేమో  సరస మధుర భాషణవు 

 

 సర్వ సుగుణాల రాశి  లలిత లావణ్య భాసి 

ఓ అజ్ఞాతవాసి

 

ఏనాటికి ఫలించునో ఈ ఎదురుచూపు 

ఎన్నటికి లభించునో ఆప్తుని ఆదరం 

వేచి చూచెదగాక జన్మ జన్మాంతరాలదాక

తెలిమబ్బు తెరల చాటు

తెలిమబ్బు తెరల చాటు దాగితివో 

పూల మకరందం మాటు చేరితివో 

కోయిల కుహు కుహు స్వరాల ఒదిగితివొ 

సెలయేటి గలగల ల ఇమిడితివో 

అగుపడవో అజ్ఞాత వాసి అగుపడవో 

 

 

 

 

 

 

నెమలి నడకలో ఒప్పితివో 

రాజహంస హొయలలొ రాజిల్లితివో 

మల్లెల పరిమళాల  గుబాళించితివో 

పూలతల కోమలత్వాన నిలిచితివో 

అగుపడవో అజ్ఞాత వాసి అగుపడవో

 

 

 

 

 

 

 

 

 

మెరుపువై మెరిసేవో విరిజల్లువై కురిసేవో 

తడి ఆరని పెదవులపై చిరునవ్వువై చిగురించేవో  

హృదిని మీటి అలజడులు రేపి అదృశ్యమైతివో 
అగుపడవో అజ్ఞాత వాసి అగుపడవో

ఈశ్వరా మహేశ్వరా నా మాయను చేకొనరా మాయా సోమరి రేపు మాపనుచు నీ మానస పూజను మరపు చేస్తున్నది అదును చూసిన మాయ కాముడు మనసును మురిపించి నిన్నే మరిపిస్తున్నాడు బుద్ది విబ్రాంతి తో నీదారిని వీడి పలుదారుల పరుగిడిచున్నది

గమ్యమెరుగని గమనంతో హృదయం అలజడితో అలసిపోతుంది క్షణమాగని కాలం ఈ కట్టె ను పడగొట్టుటకై పరుగులు తీస్తున్నది విరామమెరుగని ఆరాటం ఆనందాన్ని ఆవిరిచేస్తున్నది ఈ అగమ్య స్తితిలో దొరికేరా హర నీ నామ సంకీర్తనమనే దివ్యాస్త్రమొకటి ఓం నమో నారాయణాయ నలిగిన నవనాడులుప్పొంగెర నిను తలచి తలచి ఇక నీమాయను నీవే చేకొనర ఈశ్వరా మహేశ్వరా!

మెరుపు వాన కావి చీర చుట్టుకున్న ఆకాశ కాంత నడుముకు చుట్టుకున్న వడ్డాణపు కాంతి మెరుపు చెలి నగుమోము పై పూచే చిరు దరహాస చంద్రిక మెరుపు దొండ పండు వంటి పెదవులపై పూచే ముత్యపు బిందువులను తాకిన సూర్య కాంతి స్పందన మెరుపు విచ్చుకున్న పెదవుల నడుమ తళుకు మంటున్న ముత్యాల పలువరుస పూయించే కాంతి మెరుపు గులాబీ రెక్కల వంటి చెలి బుగ్గల సిగ్గు మరక మెరుపు నల్లని సిగలో తురుముకున్న మల్లెల సొబగు మెరుపు నెచ్చెలి ఆలోచనలతో హృదయాకాశం లో వెల్లివిరిసే ఆనందాతిశయమ్ మెరుపు

హర నీ కనులతో కాంచిన హరి వైభవం పోతన మనసును తాకి భాగవత కధా సుధగా జాలు వారే కద శివ నీ స్మరణలో నలిగిన రామ నామ రసం తులసీదాసు హృదిని చేరి రామ చరిత మానస మయ్యే కద భవ హరి భక్తుల వైభవమెరిగిన నీ మానసం హనుమ గా మారి భక్త జనులపాలిట కామదేనువయ్యే కదా శంకర విష్ణు స్మరణ ఫలిత మెరిగిన నీ జ్ఞానం ఆది శంకరులు గా మారి గోవింద నామ ప్రవాహ మొనర్చె కదా సాంబ సదా శివ నారాయణ హృదయమెరిగిన మీ హృదయం గరళాన్ని పానం చేసి లోక రక్షకుడివై నిలిచే కదా క్రిష్ణ శివుని సామర్ధ్య మెరిగిన నీ మేధస్సు అర్జునుడి అమ్ముల పొదిలో పాశుపతమై నిలిచే కదా నారాయణా మన్మధ వైరి మనస్సేరింగిన మీరు నారాయణి ని హరుని అర్ధాంగి ని చేసి మురిసితిరి కదా హరి హర ఒకరిపట్ల నొకరు కడు ఆత్మీయ భావంతో మీరుండ వీరు గొప్పంటే కాదు వారు గొప్పని భేధ భావం చూపే మా మనస్సుల మాయ పొరలు తొలగించుమా హరిహరా

హేమాచల నృసింహ

హేమాచల నృసింహ హేమాచల నృసింహ క్షేత్రం వరంగల్ జిల్లా లోని మంగపేట సమీపంలోని మల్లూరు గ్రామంలో ఉన్న హేమాచల శిఖరం మీద చెంచులక్ష్మీ ఆదిలక్ష్మి సమేతుడైన నరసింహ క్షేత్రం భగవంతునిపై ప్రేమ ఉన్న ప్రతిఒక్కరు సందర్శించాల్సిన పవిత్ర ప్రదేశం చుట్టూ అడవులతో అలరారే అందాల దివ్య ధామం . మొదటిసారి హైదరాబాద్ నుండి బయలుదేరి హన్మకొండ చేరుకొని అక్కడనుండి మంగపేట బస్సు ప్రయాణం (హన్మకొండ నుండి భద్రాచలం వెళ్ళే కొన్ని బస్సులు నేరుగా మల్లూరు గుట్ట వెళ్ళే దారి దగ్గర మనలను వదులుతాయి. అక్కడ నుండి 3 కి మీ , ఆటోలు వుంటాయి ,200 అడుగుతారు) ములుగు దాటగానే ఎటూరునాగారం అటవీ ప్రాంతంలోకి అడుగేడతాం . కేవలం బస్సులో వెళుతూ చూసిన మాత్రానికే మనసు ఎంతో ఉల్లాసం గా మారిపోతుంది అలా అందమైన ప్రకృతికి పరవశించి పోతూ హేమాచాలాన్ని చేరుకుంటే అదో ఆద్భుతమైన వనాంచలమ్ మండిపోతున్న ఎండల్లో సైతం కంటికి నిండుగా పచ్చదనం తో ఫరిడవిల్లె అందాల కొండ ఎటుచూసినా ఇనుము ఇటుక తప్ప మరేమీ చూడలేని కనులు కనువిప్పు పొందాయనిపించింది ఆ కొండను చూసి ఆఫీసులో కంప్యూటర్ తెరకి , ఇంటికొచ్చి టీ వీ తెరకు కంటిని అంకితం చేసి సొల్లు ఫోనులకు చెవిని బానిసను చేసి , సంపాదన కోసం బ్రతుకుని బాసులకు తాకట్టు పెట్టి గడిపేస్తున్న ఈ జీవితం ఎంత హేయమైనదో , హేమాచల దర్శనం తెలియచేస్తుంది జీవితం ఎంత గొప్పదో , ఎందుకు పూర్వీకులు పల్లె భారతాన్ని నిర్మించారో , భూమికి భారంగాను జనాభా లెక్కింపుకు భారంగాను తప్ప మరెందుకు కొరగాని మన బస్తీ బ్రతుకులు కొల్పొతున్నదేమిటొ హేమాచల దర్శనం తో తెలిసిపోతుంది అది భగవంతుని లీలా విలాసాలకు ఒక దర్పణం . కొండలో స్వయం వ్యక్తమైన ఆ శ్రీ లక్ష్మి నృసింహుని నాభి ప్రాంతం లలిత లావణ్యమై మెత్తగా మానవుని నాభి వున్నట్లు వుంటుంది అక్కడే పారే చింతామణి జలపాతపు నీరు ఒక్కసారి మన నోటిలో పోసుకుంటే , మనం త్రాగుతున్న జలం గుర్తుకువచ్చి ఇక్కడే ఈ నీరు త్రాగుతూ వుండిపోవాలనిపిస్తుంది పాహి పాహి అరుణాచల శివ శరణు శరణు హేమాచల నృసింహ