అంతా క్రిష్ణమయం

 అంతా  క్రిష్ణమయం  నా  ఒడలెల్ల  క్రిష్ణమయం

 
కనుల  నిండుగా  గోవింద  రూపం
నాలుక  పండించే   వాసుదేవ  మంత్రం 
కర్ణముల  కింపయ్యనే  క్రిష్ణ  లీలలు
నాసిక  శ్వాసించే  గోపి  లోలుని  వనమాలికా  గంధం
 
అంతా  క్రిష్ణమయం  నా  ఒడలెల్ల  క్రిష్ణమయం
 
హృదయ  కమలమున  కోరి  నిల్పితి  కమల  నాభుని
కరముల  పురిగొల్పితి  కరి  వరదుని  సేవకు
ఉదరం  వాసమయ్యే  దామోదరునకు
పాదములు  నర్తించే  రాదా  ప్రియ  మురళీ  రవముకు
 
అంతా  క్రిష్ణమయం  నా  ఒడలెల్ల  క్రిష్ణమయం
 
శిరము  నుండి  కొనగోటి  వరకు   నర  నరముల
నలు  చెరగులా  నడుచు  చుండె  నీల  మేఘ  శ్యాముడు
తనువుకు  చైతన్యమై , కార్యములకు  కర్తయై
సుఖ  దుఖంబుల  భోక్తయై    నా  ప్రభువై  నిలిచేనే  గోవిందుడు
 
అంతా  క్రిష్ణమయం  నా  ఒడలెల్ల  క్రిష్ణమయం

వారాహీ నవరాత్రులు

 శ్రీ గణేశాయ నమః 

                              శ్రీ శ్యామలాయై నమః 

                              శ్రీ లలితాయై నమః 

                              శ్రీ వారాహీ దేవ్యై నమః 

ఆషాఢ పాఢ్యమి నుండి ఆషాఢ నవమి వరకు వారాహీ నవరాత్రులుగా ప్రసిద్ది 

వారాహీ స్వరూపం ఉగ్రదేవత గా ప్రసిద్ధి . ఆ అమ్మ వారిని సాధారణంగా గృహాలలో 

పండితుల యొక్క ఆధ్వర్యం లో మాత్రమే పూజించటం ఉత్తమమైన మార్గం . 

ఆ తల్లి ని అందరూ ధ్యానించటానికి అనువుగా దూర్వాస మహర్షి అమ్మ వారి లోకాన్ని అమ్మ వారి రూపాన్ని తానూ దర్శించి మనకు దర్శింప చేశారు . 

 

 ఆయన చూపిన మార్గంలో మనమూ ధ్యానం చేసి అమ్మ వారి కృపకు పాతృలమవుదాం . ముందుగా అమ్మ వారి లోకాన్ని దర్శిద్దాం 

 వారాహీ  దేవి నివశించే లోకం చుట్టూ ఉన్న ప్రాకారం లేలేత పచ్చగడ్డి కాంతులతో

ప్రకాశించు మరకత మణులతో నిర్మితమై ఉంటుంది.     

ఆ ప్రాకారాన్ని ధ్యానించటం ద్వారా స్థిరమైన సంపద శ్రేయస్సు పుష్టి పొందగలం . 

ఆ ప్రాకారం లోపల బంగారు తాటి చెట్ల వనం . ఆ వనం పచ్చని కాంతులతో ప్రకాశిస్తుంది . ఆ వనం లో మరకత మణులతో నిర్మితమై రెప రెప లాడుతున్న 

జెండాలతో కూడిన నివాస గృహంలో 

నూఱు బంగారు స్తంభాలతో కూడిన బంగారు వేదికపై , ఒక బంగారు పీఠం 

ఆ పీఠం పై బంగారు రెక్కలతో కూడిన పద్మం . ఆ పద్మం యొక్క నడిమి భాగాన 

కరుగుతున్న బంగారపు కాంతులతో మెరిసిపోవు కర్ణిక (పూల పుప్పొడి ఉండే ప్రాంతము )

ఆ కర్ణిక పై బిందు ఆవరణం దాని చుట్టూ త్రికోణం దాని చుట్టూ వర్తులాకార ఆవరణం దాని చుట్టూ వేయి దళాలతో కూడిన పద్మం ఆ పద్మం చుట్టూ  రెండు 

వృత్తాకార ఆవరణలు 

ఆ ప్రదేశంలో నూట పది అక్షరాల సమూహంతో సేవించబడు ఆ కలహంసి యగు 

వారాహీ దేవి సంచరిస్తున్నది 

   

ఈ విధంగా అమ్మవారిలోకాన్ని ధ్యానించి ఆ తదుపరి అమ్మ వారి రూపాన్ని దర్శిద్దామిలా 

వరాహ ముఖం తో విరాజిల్లుతూ  పద్మముల  వంటి కనులతో 

ఆ పద్మములకు శత్రువైన చంద్రుని శిరము పై అలంకారంగా 

చేసుకుని  లేత బంగారు కాంతులీను దేహంతో   సంధ్యా సమయపు 

సూర్యుని ఎఱుపు రంగుతో శోభిల్లు వస్త్రములు ధరియించి 

తన  చేతులలో హల (నాగలి ) ముసల (రోకలి) శంఖ ,చక్ర, పాశం,

అంకుశం ధరించి  ఒక చేతితో అభయ ముద్ర ను మరొక చేతితో 

వర ముద్ర ను ప్రదర్శిస్తూ 

సంపూర్ణమైన దయతో నిండిన కనులు కలిగి , సమస్త దేవతా స్త్రీల చేత   అర్చించబడి 

హృదయంపై కుంకుమ కాంతులతో ప్రకాశిస్తూ అతి సుకుమారమైన సన్నని నడుముతో ఆ తల్లి ఒప్పారుతుంటుంది . 

ఆ తల్లి మూఢులకు దూరముగా వుంటూ , ఆర్తులకు శుభములు కలిగించు ఆర్తాలి 

కోరుకున్న కోరికలు ప్రసాదించు వార్తాలి . 

 ఆ అమ్మ వారికి నాలుగు దిక్కులలో ఉన్మత్త భైరవి , స్వప్న భైరవి , తిరస్కరిణి దేవి, కిరిపదా అనే నలుగురు  ప్రధాన శక్తులు వుంటారు 

అలాగే అష్ట భైరవులు , పదిమంది హేతుకులు సంచరిస్తూ వుంటారు . 

అలా ఆ తల్లి పరివారాన్ని తలచుకుని అమ్మ వారిని ద్వాదశ నామాలతో స్మరించుకుంటూ 

ఈ స్తోత్రం తో ధ్యానం చేసుకుందాం 

శ్రీ మాత్రే నమః 

 పంచమీ  

దండనాథా  

సంకేతా   

సమయేశ్వరి 

 సమయసంకేతా 

వారాహీ 

 పోత్రిణీ 
 శివా  

వార్తాలి  

మహాసేనా 

ఆజ్ఞాచక్రేశ్వరి 

 అరిఘ్ని

 శ్రీ మాత్రే నమః  

సదనే తత్ర హరిన్మణి-
-సంఘటితే మండపే శతస్తంభే ।
కార్తస్వరమయపీఠే
కనకమయాంబురుహకర్ణికామధ్యే ॥

బిందుత్రికోణవర్తుల-
-షడస్రవృత్తద్వయాన్వితే చక్రే ।
సంచారిణీ దశోత్తర-
శతార్ణమనురాజకమలకలహంసీ ॥ 

కోలవదనా కుశేశయ-
-నయనా కోకారిమండితశిఖండా ।
సంతప్తకాంచనాభా
సంధ్యారుణచేలసంవృతనితంబా ॥ 

హలముసలశంఖచక్రా-
-ఽంకుశపాశాభయవరస్ఫురితహస్తా ।
కూలంకషానుకంపా
కుంకుమజంబాలితస్తనాభోగా ॥

ధూర్తానామతిదూరా-
-వార్తాశేషావలగ్నకమనీయా ।
ఆర్తాలీశుభదాత్రీ
వార్తాలీ భవతు వాంఛితార్థాయ ॥ 

తస్యాః పరితో దేవీః
స్వప్నేశ్యున్మత్తభైరవీముఖ్యాః ।
ప్రణమత జంభిన్యాద్యాః
భైరవవర్గాంశ్చ హేతుకప్రముఖాన్ ॥ 

యదునందనా

 చిలకరింపుమా దయాజలధి మాపై ఘనశ్యామా

మానస తరంగాల మధురభక్తి మొలకెత్తి మాధవా

సంసారజలధి దాటి మోక్షఫలమొంద ముకుందా

హరిని చేరనివ్వని అరివర్గమును ఛేదించి మురారీ

నిర్మల నిరతిశయ ప్రేమభావనతోడ రాధామాధవా

విశ్వవీక్షణలో సర్వము నిన్ను కాంచ వాసుదేవా

 గోలోకం నుండి  గోకులం చేరితివా యదునందనా

అక్షరలక్ష్మి

 అత్యద్భుత రమణీయ దీప్తిలక్ష్మీ
అనర్ఘ్యరమణీయ కాంతిలక్ష్మీ

మణిదీప్త విలాసహాసలక్ష్మీ

హృదయరాగ రంజిత మనోజ్ఞలక్ష్మీ

ఆకాశరాజు కంఠహారమౌ హరివిల్లులా

భూకాంత సిగ లో పూచిన హసితచంద్రలక్ష్మీ

అందుకో మీకై అల్లిన అభినందన చందన అక్షరలక్ష్మి

క్రిష్ణ నామము

 క్రిష్ణ  నామము  క్రిష్ణ  నామము
రమ్య  మైనది  క్రిష్ణ  నామము
 

భీతి యై  కంసుడు 

 ప్రీతితో  పార్ధుడు
అంగవించిన  నామము
భక్తి  తోడ  ఉద్దవుడు 

 రక్తి  కూడి  గోపికలు
రమించిన  నామము         \\ క్రిష్ణ  నామము //
 ద్వెషియై  శిశుపాలుడు  

ప్రేమ  మీరగ  రుక్మిణి
సంగవించిన  నామము
వాత్సల్యమున  యశోద  

సోదర  భావంబున  కృష్ణ
చేకొన్న  నామము        \\ క్రిష్ణ  నామము //
 పలుక  పరవశంబై    , 

పలు  రుచుల  సమ్మిళితమై

 లక్ష్మీకిరణుల
జీవన  పయనమున  

తోడు  వచ్చు  నామము  \\ క్రిష్ణ  నామము//

గోవిందా దామోదరా

 కలహమునకు కాలు దువ్వించు కుజుని కట్టడి చేయలేక

కమల సదృశములగు నీపాదముల నాశ్రయించితి సహన
కంకణం కంఠసీమ నిలిపి మృదు వచనములు పలికించవే

లక్ష్మీకిరణు హృదయ నివాసీ  గోవిందా   దామోదరా 

చిరాకు ప్రేరేపించు సౌమ్య రూపుడగు   బుధుని తాళలేక
శాంతము కోరి  నీ పాదముల శరణు  జొచ్చితి  శాంతమూర్తీ
 నీ చూపుల చల్లదనంతో హృది చల్లబరిచి  శాంతత నొసగవే

లక్ష్మీకిరణు హృదయ  నివాసీ  గోవిందా   దామోదరా     

నీ దారి నడవనెంచిన నా పాదములను పెడదారి పట్టించ
సద్గురుడు బృహస్పతి పూనిన వేళ దిక్కుతోచక నీ పాద
పద్మముల పై  దృష్టి నిలిపితి దయాళు నీ దారి చూపవే   

లక్ష్మీకిరణు హృదయ నివాసీ  గోవిందా   దామోదరా 

భాగ్యముల నొసగు భార్గవుడు నను అభాగ్యుడిగా
చేయ నెంచినవేళ శ్రీయ:పతీ నా శిరము శ్రీ కరముల
నిత్య  సేవఁలొందు నీ పాదముల నిలుపు భాగ్యమొసగవే

లక్ష్మీకిరణు హృదయ నివాసీ  గోవిందా   దామోదరా 

చేసిన చేష్టలు ఛాయలా వెన్నంటి ఛాయానందనుడు 
 ప్రతిక్రియల రూపంబున ఇచ్చు ఫలములు పరితపింప
చేయ చల్లని నీ పాదంబుల పడితి  చిత్తస్థైర్య మొసగవె

  లక్ష్మీకిరణు హృదయ నివాసీ  గోవిందా   దామోదరా

  

ఆరోగ్యమొసగు దినకరుడు ప్రతికూల భావనలతో తనువును
తపింపచేయు వేళ తానే నీవని తలచిన మాత్రమున శతకోటి 

సూర్యప్రభల వెలుగు నీ పాదముల పై  నా భావనలు నిలుపవే

  లక్ష్మీకిరణు హృదయ నివాసీ  గోవిందా   దామోదరా  

ఆహ్లాదమిచ్చు చందురుడు మనఃసంద్రమును ఆటుపోట్ల
కల్లోలపరచువేళ విశ్వ మోహనుఁడా మా మనంబుల నీ
పాదరేణువుల స్పర్శతో కదలికలు లేని క్షీరాబ్ధి  చేయవే   
  లక్ష్మీకిరణు హృదయ నివాసీ 

గోవిందా   దామోదరా    

చంచల చపలత్వముల రాహుకేతులు నన్నల్లరి పాల్చేయు వేళ
తిరుమల గిరులపై స్థిరముగా నిలచిన నీ పాదముల   నాశ్రయించితి
నీ నామస్మరణ ఎరుక తప్ప అన్యములేమి కోరని బుధ్ధినొసగుమా

  లక్ష్మీకిరణు హృదయ నివాసీ  గోవిందా   దామోదరా    
 

కమల లోచనా వేన వేల కాంతులు విరజిమ్ము నీ  

కనులు కురిపించు మాపై కారుణ్యామృత బిందువులు 

మము  దహించు కర్మఫలముల కాలాగ్నులు చల్లారగా 

  లక్ష్మీకిరణు హృదయ నివాసీ  గోవిందా   దామోదరా    

 కాలు మడతపడదాయే కనురెప్ప మూత పడదాయే కాలం

 కదిలిపోతున్నా కాయం కదలనీయక కాలచక్రంలో తిరిగాడు  

మా పై  దయావర్ష మనుగ్రహించ నిలచితివా తిరుమలగిరిపై

 లక్ష్మీకిరణు హృదయ నివాసీ  గోవిందా   దామోదరా 

ఓ మంజులవాణి

ఓ  యమ్మ ! ని  కుమారుడు ,
మా  యిండ్లను   బాలు  బెరుగు  మననీడమ్మ !
పోయెద  మెక్కడికైనను ,
మా  యన్నల  సురభులాన  మంజులవాణి !
 
ఓ  మంజులవాణి ! మీ  పిల్లవాని  ఆగడాలు  మితి  మిరిపోతున్నాయి
మా  అన్న  నందుని   గోవుల  మీద  ప్రమాణం  చేసి  చెబుతున్నాం
వేరేచటికైనను వెళ్లిపోతాము  అని  గోపికలు  మొర  పెట్టుకున్నారు
యశోదమ్మతో 
 
 
చన్ను  విడిచి  చనుదిట్టటు
నెన్నడు  బోరుగిండ్ల  త్రోవ  నెరుగడు  నేడుం
గన్నులు  దెరవని  మా  యి 
చిన్న    కుమారకుని  రవ్వ  సేయమ్దగునే
 
ఎల్లప్పుడూ  నా  ఒడిలో  నే  వుంటూ  పాలు  త్రగాటమే  తప్ప
ఇరుగు  పొరుగిండ్ల  త్రోవ  కూడా  తెలియని  నా  చిన్ని  కృష్ణుని  మీద
ఇన్ని  అభాండాలు  వేస్తారా  అంటూ  ఆ  యశోద  వారిని  కేకలు  వేస్తుంది
 
ఇది  మనకు  రోజు  నిత్యకృత్యమే  కదా ……..పిల్లలు  అల్లరి  చేయటం
ఇరుగు  పొరుగు  అమ్మలక్కలు  పంచాయితీకి  వస్తే  వారి  మీదే  మనం
అరవటం 
 
కాని  సమస్త  లోకాలకు  పోషకుడైన  ఆ  చిద్విలాసముర్తికి
పేద  గోపకుల  ఇండ్ల  లో  దూరి  కుండలు  పగులగొట్టి  వెన్న  దొంగలించాల్సిన
అవసరమేమిటి
 
తరచి  చూస్తే  తత్వం  భోదపడుతుంది
 
ఇక్కడ  కుండ  ను  మన  దేహం  తో  పోల్చుకోవచ్చు 
 
కుండ  తయారు  కావటానికి  మట్టి ,  నీరు , అగ్ని , గాలి  అవసరం  అలాగే  కుండ
లోపలి  భాగం  శూన్యం  తో  వుంటుంది
మన  శరీరం  కూడా  అవే  ధాతువులతో  నిర్మించబడుతుంది
 
కుండ  పగిలి  మట్టిలో  కలసినట్లే  ఈ  శరీరం  పగిలి  చివరకు  ఆ  మట్టిలోనే  కలసిపోతుంది
 
ఇక  కుండలోని  వెన్నను  మన  మనసుతో  పోల్చుకోవచ్చు
 
వెన్న  ప్రధానం  గా  మూడు  లక్షణాలు  కలిగి  వుంటుంది
అవి  తెలుపుదనం , మృదుత్వం , మదురత్వం
 
మనసు  మూడు  గుణాలను  కలిగి  వుంటుంది . అవి  సత్వ , రాజ తామస  గుణాలు
 సత్వగుణం  తెలుపు  రంగును  కలిగి  వుంటుంది . శాంతం , సత్ప్రవర్తన , సాదు  స్వభావం
ఇవన్ని  సత్వగుణం  లక్షణాలు
అందుకే  తెలుపును  శాంతికి  చిహ్నం  గా  వాడతాం
 
అలాగే  మృదుత్వం ………మ్రుదుత్వమంటే  తేలికగా  కరిగిపోయే  స్వభావం
అది  దయా  గుణానికి  చిహ్నం . ఇతరుల  సమస్యలను  తమవిగా  భావించి
వారి  కష్టాలను  చూసి  కరిగి  వారికి  సహాయం  చేయటానికి  సిద్దపడటం
 
ఇక  వెన్న  యొక్క  చివరి  గుణం ………పరిమళత్వం   తో  కూడిన  మదురమైన  రుచి
 
అది  మనిషి  యొక్క  మాట  తీరుతో  పోల్చవచ్చు  మనం  ఎల్లప్పుడూ
చక్కని  మాట  తీరు  కలిగి , ఇతరులను  నొప్పించక    వుంటే  మనకు  అనేక
స్నేహ  సమూహాలు  ఏర్పడతాయి
 
అట్టి  వారి  హృదయాలలో  ఆ  హృషీకేశుడు   కొలువై  వుంటాడు
 
అట్టి  మనసున్న  వారు  కనుకనే  గోపికల  మనస్సులను  దోచుకున్నాడు
ఆ  మానసచోరుడు
 
మరి  మనం  కూడా  మన  మనస్సులను  నవనీతం  చేసి  ఆ  వెన్న  దొంగకు
దోచిపెడదామా

నింగిలోని జాబిల్లి

 

నింగిలోని జాబిల్లి నేలపైన సిరిమల్లి

ఏటిలోని చేపపిల్ల అడవిలోని జింకపిల్ల

ఆలుచిప్పలో దాగిన ఆణిముత్యం

పూలతేరులో ఒదిగిన కోమలత్వం

పురి విప్పిన మయూరం 

అరవిచ్చిన మందారం

ఉక్కపోతలో తాకే పిల్లతెమ్మర

ఒంటరి నడకలో తుంటరిగా తాకే చిరుజల్లు

కలసి కలబోసి కనులముందు నిలచిన కలువబాలా నీవు నిలచిన తావు లక్ష్మీనివాసం

హసితచంద్రమా' 

అజ్ఞాతవాసి

 

అజ్ఞాతవాసి అగుపడేనిదిగో నీ ఆనవాలు

 నును సిగ్గుల ఎరుపెక్కే చెలి చెక్కిలి ఆనవాలు 

 ముద్ద మందారపు మాటున చిక్కేనిదిగో

 అజ్ఞాతవాసి అగుపడేనిదిగో నీ ఆనవాలు 

 వలపుల గాలం విసిరే నీ వాలు కనుల సోయగం మత్స్యకన్య కంటి మెరుపులో కనబడేనిదిగో 

 అజ్ఞాతవాసి అగుపడేనిదిగో నీ ఆనవాలు 

 ముత్యపు మెరుపుల వరుసను ప్రతిఫలించె నీ

 నవ్వుల కిలకిలల జాడ గలగలా సాగే సెలయేటి సవ్వడులలో దొరికేనిదిగో

అజ్ఞాతవాసి అగుపడేనిదిగో నీ ఆనవాలు 

 హొయలొలికించె నెచ్చెలి నడక వాన మబ్బుకు 

మురిసి నాట్యమాడే నెమలి నడకలో దాగేనిదిగో 

 అజ్ఞాతవాసి అగుపడేనిదిగో నీ ఆనవాలు 

 పిరుదులపై నాట్యమాడే నీలి కురుల వలపు పాశం 

 బుస కొట్టే నాగు పడగలో నవ్వేనిదిగో

 అజ్ఞాతవాసి అగుపడేనిదిగో నీ ఆనవాలు 

 చమట గంధం అలుముకున్న నీ దేహ సౌరభం 

 మల్లెల పరిమళాల లో ఒదిగెనిదిగొ 

 అజ్ఞాతవాసి అగుపడేనిదిగో నీ ఆనవాలు 

 నీ ఆనవాలుకై అచట నిచట వెదికి అలసిన మది నా గుండె గూటిలో ఒదిగిన నిన్ను చూసి సేదతీరేనిదిగో

ఆర్యా ద్విశతీ

 ఆర్యా ద్విశతీ ఇదొక సర్వోత్కృష్ఠమైన కావ్యం

దీనిని భావన చేయగలిగితే వారి శరీరమే మణిద్వీపం అవుతుంది హృదయం చింతామణి

గృహమవుతుంది వారిలోని చైతన్యమే పరదేవత అవుతుంది

 తలచిన మాత్రం చేతనే మనలను పునీతులను చేయు అత్రీ అనసూయ దంపతుల పుత్రుడు రుద్రాంశ సంభూతుడు క్రోథమే అలంకారంగా గల 

మహర్షీ అగు దూర్వాసుడు తాను దర్శించిన అమ్మ లోకాన్ని అందులోని వివిధ దేవతా శక్తులను వారు నివసించే ప్రదేశ విశేషాలను అద్బుతంగా వివరించిన గ్రంధరాజమే ఆర్యా ద్విశతి

 ఆర్యా ద్విశతి భావన చేసిన వారికి  అంబ సాక్షాత్కరించునని నడిచే దైవంగా ప్రసిద్ధి చెందిన కంచి కామాక్షీ అవతారమే అయినటువంటి చంద్రశేఖరేంద్ర సరస్వతి స్వామి వారి వాక్కు

 అట్టి ఆర్యా ద్విశతిని భావనాత్మకంగా వివరించటం  ద్వార నా మనసులో ఆ  మణిద్వీపాన్ని చెరగని విధంగా చిత్రించుకుని తరించే చిరుప్రయత్నమిది

వందసార్లు చదివిన దానికన్నా ఒక్కసారి రాసిన ఫలమెక్కువ కదా

ఈ విధంగా అమ్మ యెక్క లోకపు ధ్యానం నిరంతరం చెసే ప్రయత్నం 

గీతాచార్యుడు

నాది నావారాలను మోహము వీడి నిస్సంగుడ కమ్ము

ప్రోది ఫలాశ వీడి ఫలవృక్షరాజభంగి ప్రయత్నశీలి కమ్ము

మోది జిహ్వచాంచల్యమణిచి నిస్సంశయ శరణార్ధి

కమ్ము

ఇదియే సుఖజీవన మార్గము సవ్యసాచీ అనె సర్వనిలయుడౌ గీతాచార్యుడు

సుందరి గోపిక

 సుందర వనముల హృదయ మందిరమందు  నిలచిన కడు
సుందరుడా బాల ముకుందుని ముద్దుమోవిగని విరహమునా  

సుందరి గోపిక మనసుపూదోటలో విరిసిన రస భావమాలికల 
సుందరమగు అక్షర కూర్పుతో అక్షరుని అభిషేకించసాగె  

పగడపు పెదవుల విల్లు

 పగడపు పెదవుల విల్లు విడిచిన ముత్యాల

పలువరుస చిరునగవు శరములు మదిని గుచ్చ
వజ్రపు తునక మెరయు సంపంగి నాశికా పరిమళాల మనసు మురియ
ప్రేమ కొలనులో విప్పారిన కలువ కనుల విరిచూపుల జల్లులలో మేని తడువ
పూర్ణచంద్రుని తలపించు మోములో పూయు 
నునుసిగ్గు మొగ్గల వెన్నల కాంతుల వర్షధార 

సంతతముగా నను తడపనిమ్ము నెచ్చెలి

చెంగావి కుసుమ

 కుంకుమ పరాగమలదిన గుండు మల్లియ మోముతో

మక్కువ జలజపు జల్లుల విరియు కనులతో

చక్కని చిరునగవు వెన్నల తడితో మొరయ

పగడపు పెదవులతో

ఎక్కడ పూచెనీ చెంగావి కుసుమ కోమలి కనులెదుట నిలిచెనీ మనోహరీ

మాధవుని

 కుంతలము మకరందపరిమళ పుష్పమాలిక చుట్టి 

శిఖముపై పంచెవన్నల మయూఖ  పింఛము నిలిపి
పట్టు పీతాంబరము దాల్చి విహంగ వీక్షణ చేయు 
 మాధవునిచేరె శుకములు మామిడని మాధుర్యము గ్రోల

ముద్దు ముద్దు పల్కుల ముదము గూర్చిన 

శుకముల ఖ్యాతి లోకమున ఇనుమడింప

శుకబ్రహ్మపు నోట ఒలికించె మక్కువతోడ

మధురభాగవత సుధారసధార మాధవుండు

మందార మందారా

 

గులాబి రేకుల పెదవుల చిట్టి సున్నుండ చుట్టి
కలువ కనుల మమ కారపు తేనియ జల్లుతూ
 నెలవంక నగుమోము సిగ్గు మల్లియలు పూయ
నీలపు ఛాయ దాల్చి నిలిచె ముంగిట మందారం

శుకశారీ

 హరికథాసుధ గానము చేయుచూ నొక శుకము
హరినామామృత బిందులేఖనముతో నొక శారీ
హరిత వన తరువుల ఒడిలో సంవాదుచేసె
హరిలీలావిలాసపు మర్మములెల్ల అనురక్తితో

వెన్నెల రేడు

వెన్నెల రేడు చల్లని చూపుల విప్పారిన కలువ వోలె 
వెన్నుని సంకీర్తనామృత తరంగాలు తనువెల్ల తాక
కన్నుల పారవశ్యభావమొలక హరికి కనురెప్పల 
సన్నిధి చేసే హరిణేక్షణ ఇహలోక వీక్షణ మరచి

 కలడు కలడనువాడు కలడో లేడో నని సంశయించిన గజరాజ గమనం వీడి 
కలడు కలడనువాడు లేడని చూపు 
తావే లేదని నిశ్చయాత్మక భక్తి చూపిన
ప్రహ్లదుని దారి పట్టిన జీవితంబులు
ఆహ్లదభరితంబులు చేయడే చక్రి

 భక్తాగ్రేసరుడగు భరతుని కూడి రామ పరివారమెల్ల 
అచ్చెరువొందుతూ చూచుచుండిరి  లోకపావని
ప్రేమతో నొసగిన ముత్యాలపేరులో రాముని  పేరుయు 
రూపుఁయు కానక 

తబ్బిబ్బగుచున్న పవనసుతుని 

కలువల ప్రియుని

 నిర్మలాకాశసౌధంబులో నక్షత్రమాలికాభరణముల్

  దాల్చిన కలువల ప్రియుని కులభూషణుడు బంగరు వేణియపై నిరతమాలపించు ఆనంద గమకములే  విశ్వగమనపు నిర్ధేశకంబులాయే

వెన్నుని పిల్లనగ్రోవి పిలుపుతో  విరిసిన తారకలతో తోయదమండలమెల్ల మెరియ ముకుందుని మోము పై వీచు ఆనందపారవశ్యపు తెమ్మెరలతో కలువలరేడు పసిడి కాంతులీన భావించు లక్ష్మీకిరణుల మానసాకాశంబు వహ్నిమండల వాసినీ విహారస్థలంబాయే

శ్రీమాన్

భగవన్నామ సంకీర్తన అను తపస్సు నందు , వేదములను శాస్త్రములను అధ్యయనం చేయుట  యందు అమితమైన ఆసక్తికలవాడు , తపస్వీ  జ్ఞాన సంపన్నులలో శ్రేష్ఠుడు అయినా నారద మహర్షిని వాల్మీకి ముని పుంగవుడు ఇలా ప్రశ్నించెను

 ఈ లోకంలో ఈ కాలంలో (ప్రశ్న వేసే సమయానికి లోకంలో ఉన్నటువంటి 

1 ) గుణవంతుడు 

2 ) వీర్యవంతుడు (వికారములను జయించినవాడు)

3 ) ధర్మజ్ఞుడు

4 ) కృతజ్ఞుడు

5 ) సత్యవాక్కుడు 

6) దృఢవ్రతుడు ( చేసిన సంకల్పానికి కట్టుబడి వుండేవాడు ) 

7 ) చారిత్రముతో నడుచువాడు ( ఆచార సంప్రదాయములు గౌరవించేవాడు )

 8) సర్వ భూతములకు (జీవులకు) హితము కలిగించువాడు

 9 ) విద్వాంసుడు 

10) సమర్ధుడు 

11) ఏకప్రియదర్శనుడు (ఏ సమయంలో చూసినను మనసుకు ఆహ్లాదం కలిగించువాడు )

 12 ) ఆత్మవంతుడు (ఆత్మజ్ఞానం కలిగినవాడు) 

13 ) జిత క్రోధుడు (కోపాన్ని జయించినవాడు )

14  ) ద్యుతి మంతుడు ( చక్కని కాంతి తో కూడిన రూపలావణ్యములు కలవాడు)  

15 ) అసూయ లేనివాడు  

16) యుద్ధంలో ఎవనికి కోపం కలిగితే దేవతలు కూడా భయపడుదురో  అట్టి నరుడు ఎవ్వరు?పదహారు లక్షణాలు కలిగిన పరిపూర్ణ మానవుడు ఈ సమయంలో ఎవరైనా వున్నారా అని వాల్మీకి మహర్షి ప్రశ్న

దానికి సమాధానంగా నారద మహర్షి ఇక్ష్వాకు వంశమునందు జన్మించినట్టి వాడు ప్రజలందరి మన్ననలు పొందిన రాముడను ప్రభువు కలడు అంటూ రాముని యొక్క లక్షణాలను వివరించసాగిరి

 1) నియతాత్ముడు (అసాధారణమైన దివ్య మంగళ విగ్రహ రూపం కలవాడు)

2) మహా వీర్యుడు (తనను మించిన వీరుడెవ్వడు లేనట్టివాఁడు )

 3) ద్యుతి మంతుడు ( చక్కని కాంతి తో కూడిన రూపలావణ్యములు కలవాడు) 

 4) ధృతిమంతుడు (తన శాసనముకు అధీనమై నడుచు లోకము కలిగి వున్నట్టివాడు )

5 ) వశీ ( తన ఇంద్రియములను తన అధీనంలో వుంచుకున్నవాడు , సర్వ జీవులను  గుణములచేత తన వశం చేసుకున్నవాడు )

6) బుద్ధిమంతుడు (అన్ని విషయములందు పరిపూర్ణ పరిజ్ఞానం కలిగినవాడు )

7) నీతిమంతుడు (సృష్టి ని క్రమ పద్దతిలో నడుపుటకు అవసరమైన నీతి మర్యాద కలిగినవాడు)

8) వాగ్మీ (ప్రశస్తమైన  మంగళకరమైన  సంతోషం కలిగించు వాక్కు కలవాడు)

9) శ్రీమాన్ (శ్రీమంతుడు, సమృద్ధము నిత్యము అయినట్టి సంపద కలిగినవాడు )

10) శత్రు నిబర్హణుడు (బాహ్య మరియు ఆంతరంగిక ( శరీరమునకు మనసుకు ఆపద కలిగించు )శత్రువులను సంహరించినవాడు)

11) విపులాంసుడు (విశాలమైన ఎత్తైన భుజములు యొక్క పై భాగం కలిగినవాడు ; చంకలు ,వక్షస్థలం , కడుపు, ముక్కు, భుజ స్కంధములు , నుదురు ఎవరి యందు విశాలంగా వుండునో వారు ఎల్లప్పుడూ సుఖములు పొందుదురు )

12) మహాబాహు (పొడవైన గొప్ప భుజములు కలవాడు, నున్నని బలమైన మోకాళ్లవరకు విస్తరించు  బాహువులు కలిగినవారు గొప్ప చక్రవర్తి అగును )

 13) కంబుగ్రీవ (శంఖము వంటి మెడ కలవాడు మూడు రేఖలతో విరాజిల్లు అందమైన మెడ  )

14) మహాహనుః ( గొప్ప దవడలు కలవాడు, చక్కని దవడలతో  నున్నవారు ఎల్లప్పుడూ మంచి ఆహరం భుజించగలరు అంతే కాక ఆయువున్నంతవరకు సుఖపడుదురు  )

15) మహోరస్కుడు (విశాలమైన వక్షస్థలం కలిగినవాడు )

16) మహేష్వాసుడు (గొప్ప విల్లు ధరించి యుండు గొప్ప విలుకాడు )

17) గూఢజత్రు: ( కనబడని మూపుల సంధులు (ఎముకలు) కలవాడు ఆరోగ్య చిహ్నం )

18) అరిందమః (శతృవులను పాపములను నశింపచేయువాడు )  

19) ఆజానుబాహు (మోకాళ్ళ వరకూ విస్తరించిన భుజములు కలవాడు )

20) స్సుశిరా  (సమమైన గుండ్రని ఛత్రము వంటి శిరము కలవాడు ; ఏకఛత్రాధిపత్యముతో భూమిని పాలించగల దీర్ఘాయువు కల లక్షణము )

21) స్సులలాట ( మంచి వెడల్పైన నుదురు కలవాడు; రాజ  చిహ్నం)

22) స్సువిక్రమః  ( సుందరమైన నడక కలవాడు ; ఎవరి నడక సింహము వృషభము ఏనుగు పెద్దపులి వీటిని పోలియుండు నో వారు అన్నిటా విజయము పొంది సుఖింతురు )

23) సమ (మిక్కిలి పొడుగు మిక్కిలి పొట్టి కాక వుండువాడు , తొంబదిఆరు అంగుళాల ఎత్తు సార్వభౌమత్వమునకు చిహ్నం )

24) స్సమవిభక్తంగుడు ( ఏ అవయవము ఎంత పరిమాణంలో వుండిన చూచుటకు అందంగా వుండునో ఆయా అవయవములు ఆయా పరిమాణంలో వున్నవాడు ; కనుబొమలు ముక్కు రంధ్రములు కనులు చెవులు పెదవులు చనుమొనలు మోచేతులు చేతి మణికట్టులు మోకాళ్ళు వృషణములు పిరుదులు  చేతులు కాళ్ళు పిరుదుల పైభాగం ఇవి ఎవరికి సమముగా వుండునో అతడు ప్రభువు అగును )

25) స్నిగ్ధవర్ణుడు (మెరుపు వర్ణము కలవాడు ఆకర్షణీయమైన వర్ణం కలవాడు ; కనుల యందలి మెరుపు సౌభాగ్యాన్ని; దంతములు యందలి మెరుపు భోజన సౌఖ్యాన్ని , చర్మము యొక్క మెరుపు శయ్యాసౌఖ్యాన్ని , పాదముల యందలి మెరుపు వాహన సౌఖ్యాన్ని సూచిస్తుంది )

26) ప్రతాపవాన్ ( తేజస్సు తో అలరారువాడు )

27) పీనవక్షుడు ( బలమైన వక్షస్థలం కలవాడు )

28) విశాలాక్షుడు ( తామర రేకులవంటి విశాలమైన కనులు కలవాడు)

29) లక్ష్మీవాన్ ( సర్వాంగ సుందరుడు )

30) శుభ లక్షణః ( సమస్తమైన శుభ లక్షణములు కలవాడు)

31) ధర్మజ్ఞుడు (శరణు కోరిన వారిని వదలని స్వభావం కలవాడు )

32) సత్య సంధుడు  ( ఆడిన మాట తప్పనివాడు )

33) ప్రజలకు హితం చేయుట యందు ఆసక్తి కలవాడు 

34) యశస్వీ ( ఆశ్రయించిన వారిని రక్షించుటలో గొప్ప కీర్తి కలవాడు )

35) జ్ఞానసంపన్నుడు

 36) శుచి (మంగళకరమైన పవిత్రమైన వాటికి కూడా మంగళత్వాన్ని పవిత్రతను చేకూర్చగల పరిశుద్ధమైన నడవడిక కలవాడు)

37) వశ్య ( ఆశ్రయించినవారికి లోబడివుండువాడు )

38 ) స్సమాధిమాన్ ( ఆశ్రయించినవారిని రక్షించు ఆలోచనయే ఆదిగా కలవాడు )

  39) ప్రజాపతి సమ (బ్రహ్మ సమానుడు )

40) శ్రీమాన్ ( శ్రీమంతుడు )

41) ధాత  (సర్వ జీవులను పోషించువాడు )

42) రిపు నిషూదనః  (శత్రువులను సంహరించువాడు)

43) జీవ లోకమును రక్షించువాడు 

44) ధర్మమును రక్షించువాడు 

45) స్వధర్మ రక్షకుడు

46) స్వజనులను రక్షించువాడు

 47) వేద వేదాంగ తత్వజ్ఞుడు 

48) ధనుర్వేదము (విలువిద్య) నందు నిష్ఠ ప్రావీణ్యము కలవాడు

 49) సర్వ శాస్త్రములు యొక్క అర్ధము రహస్యములు తెలిసినవాడు 

50) స్మృతిమంతుడు (జ్ఞానము నందు  మరుపు   లేనివాడు)

51) ప్రతిభావంతుడు 

52) సర్వ లోక ప్రియుడు 

53) సాధువు

 54) అదీనాత్మా ( దైన్యము లేని వాడు )

55) విచక్షణా జ్ఞానము కలవాడు 

56) నదులు సముద్రమును చేరు నట్లు సత్పురుషులచే ఎల్లప్పుడూ పొందబడువాడు 

57) ఆర్యుడు (పూజించదగినవాడు )

58) సర్వ సముడు (అందరిని సమ భావంతో చూచువాడు)

59) సదైక ప్రియ దర్శనుడు ( చూడగానే ప్రియము కలిగించువాడు)

60) సర్వ గుణోపేతుడు (సకల కల్యాణ గుణములు కలవాడు )

61) కౌసల్యానంద వర్ధనుడు ( కౌసల్య యొక్క ఆనందమును పెంపొందించువాడు )

62) సముద్రము వంటి గాంభీర్యము కలవాడు (తనలోని సంపదను సముద్రుడు ఎట్లు బయటకు కనబడనీయకుండునో అట్లే తనలోని భావాలను బయటకు వ్యక్తం కానీయనివాడు ) 

63) హిమవంతునివలె ధైర్యము కలవాడు (వర్షములు పిడుగులతో కొట్టబడుచున్నప్పటికీ గిరులు చలించనట్లు ఆపదలు  చుట్టిముట్టినను ధైర్యము కోల్పోని స్వభావం)

64) విష్ణువుతో సముడైన వీర్యము కలవాడు

65) చంద్రుని వలె చూడగానే ఆహ్లాదం కలిగించువాడు 

66) క్రోథమునందు కాలాగ్ని సముడు 

67) క్షమాగుణంలో పృథ్వి సముడు 

68) త్యాగమునందు కుబేరుని వంటి వాడు 

69) సత్యమునందు అపర ధర్మ దేవత వంటివాడు 

పదహారు లక్షణాలు కల మానవుడి గురించివాల్మీకి మహర్షి అడిగితే  అరువది తొమ్మిది లక్షణాలు కల పరిపూర్ణుడైన శ్రీరాముని చూపించారు నారద మహర్షి  

రాముని చరితం దివ్యమైనట్టిది అట్టి రాముని చరితను తెలిపే నూరు శ్లోకాల సంక్షిప్త రామాయణం నెలకోమారు పారాయణం చేసినా ఊహించని ఉత్పాతాల నుండి రక్షణ దొరుకుతుంది 

ముద్దమందారమా

 తూరుపు కాంత సిగలో మురిసే అతసీ పుష్పమే
నీ వదనం
వజ్రపు వెలుగుల వెన్నెల తురక అద్దిన సంపెంగ
సొగసిరి నీ నాశిక
పండిన దొండపండుపై వాలిన చెరకు వింటిలా
ముచ్చట గొలుపు అధరద్వయం
నిర్మల సరోవరమున విరిసిన కలువల వోలే
చల్లని చూపుల మల్లెలు రువ్వే ఆ కనులు
ముద్దమందారమా ముగ్ధ సింధూరమా
చెదిరిపోదు నీ రూపు హసిత చంద్రమా

సదానందుడు

 శిఖమున పింఛము దాల్చి పీతాంబరములు కట్టి
చందనాదులతో మెరయు దేహముతో గోకులాన  
ఆనంద తరంగాల తేలియాడు సదానందుడు 
వేణుగాన తరం

గాల జగతి కి ఆనందలహరులూదే 

పచ్చని పైరు పైటేసిన

 ముడుచుకున్న నుదుటి కమలాన్ని విప్పార్చే
 నులివెచ్చని తొలి పొద్దు కాంతి రేఖలా 
ఇంకిన కనుల కొలనులో అనురాగపు చిరుజల్లులు 
కురిపించే మేఘమాలికలా 
పొడిబారిన పెదవులపై చిరునగవుల తళుకులద్దు 
తారకల మాలికలా 
 వడగాల్పు సెగలకు కమిలిన దేహాన్ని పులకింపచేయు 

చల్లని చిరుగాలి తరగలా 
పచ్చని పైరు పైటేసిన ప్రకృతి కాంతలా మోమున 
మధువులొలుకుచున్నది హసితచంద్రిక  

యుగాది /ఉగాది

 యుగాది /ఉగాది 

ఉగాది అనగానే ఉగాది పచ్చడి  పంచాంగ శ్రవణం ప్రత్యేకం 

చాలామందికి తమ రాశి ఫలాల గురించి ఆసక్తి అవి ఆశాజనకం గా

లేకపోతే ఆందోళన వుంటాయి 

మాది సింహరాశి మా రాశి  గురించి ఎప్పటి నుండో ఊదరగొట్టేస్తున్నారు 

అష్టమ శని ఇక వీళ్ళ పని ముగిసిపోయినట్లే అని 

నిజంగా అంత భయపడాల్సిన అవసరం వుందా ! కాలం యొక్క ప్రతికూలత 

తగ్గించుకుని అనుకూలత పొందటానికి వున్న కొన్ని తేలిక మార్గాలు తెలుసుకుందాం 

ఈ సంవత్సరానికి అధిపతి సూర్యభగవానుడు . ప్రత్యక్ష నారాయణుడైన సూర్యునకు 

రోజు శ్రీ సూర్యాయ నమః అని  నమస్కరించుకోవటం ఆదిత్య హృదయం చదువుకోవటం ద్వారా కాలం యొక్క అనుకూలత పొందవచ్చు

ఆదిత్య హృదయం చదవటానికి సుమారు 4.నిమిషాల 25 సెకండ్ల కాలం పడుతుంది

సమయం లేదనటం పెద్ద అబద్దం

శ్రీరాముడు సూర్యవంశ సముద్భవుడు

అమ్మ లలిత భానుమండల మధ్యస్థా, భైరవీ, భగమాలినీ

అమ్మ లలిత భానుమండలంలో భగమాలినీ శక్తి రూపంలో వుంటుంది

వార్తా పత్రికల్లొ చదువుతుంటాం వేసవి లో....భానుడి భగ భగ అని ఈ తెలుగు నుడికారం వెనుక మర్మం ఇదే

అట్టి ప్రత్యక్ష దైవమైన సూర్యభగవానునకు నమస్కరించుకోవటం సర్వశ్రేయోదాయకం

అలాగే లలితా సహస్రనామం అనేక నామాల సమాహారంతో కూడుకుని ఉంటుంది 

అలాంటి నామాల సమాహారం ఓ పూలగుత్తివలె ఆహ్లాదకరంగా ద్రాక్ష గుత్తి వలె 

మధురంగా వుంటుంది . ఒక్కో గుత్తి ఒక్కో ఫలాన్ని అందిస్తుంది 

అందులోని ఒక గుత్తి : శ్రీమాత్రే నమః 

భవదావసుధావృష్టి: =సంసారమనెడి దావాగ్ని ని శాంతింపచేయు అమృతవర్ష స్వరూపరాలు 

పాపారణ్యదవానలా =పాపమనెడి అరణ్యమును దహించివేయు దావాగ్ని 

దౌర్భాగ్యతూలవాతూలా=దౌర్భాగ్య

మనెడి దూది ని చెదరగొట్టు సుడిగాలి వంటిది 

జరాధ్వాంతరవిప్రభా  =ముసలితనము యొక్క భాధలను తొలగించు సూర్యకాంతి వంటిది

భాగ్యభ్దిచంద్రికా = భాగ్యములనెడి సముద్రమును పొంగించు వెన్నెల

భక్తచిత్తకేకిఘనాఘనా =భక్తుల మనసనెడి నెమలికి ఆహ్లదమిచ్చు వానమబ్బు వంటిది

రోగపర్వతధంభోలి =రోగములనెడి పర్వతములను ధ్వంసం చేయు వజ్రాయుధం

మృత్యుదారుకుఠారికా =మృత్యువను చెట్టును నరుకు గొడ్డలి వంటిది

శ్రీమాత్రే నమః 

 ఈ నామాలను పదే పదే   మననం చేయటం వలన మనకు కలిగే అష్టకష్టముల నుండి ఉపశమనం కలుగుతుంది

   మనిషి జీవితాన్ని బాగా ప్రభావితం చెసే అవయవం నోరు అది లోపలికి తీసుకునే ఆహారం ద్వారా మానసిక శారీరక ఆరోగ్యం ప్రభావితమవుతుంది. అది బయటకు పంపే అక్షరం ద్వారా మన జీవన గమనం ప్రభావితమవుతుంది అట్టి నోటిని (పెదవుల నుండి కంఠం వరకు) ఆధారం చేసుకుని వేయి లలితా నామాలను లోకానికి అందించిన వశిన్యాది వాగ్దేవతలు ఉంటారు వీరి నామాలు నిత్యం మననం చేయుట ద్వారా చక్కని ఆరోగ్యం వాక్శుద్ధి దక్కుతాయి.వీరు సాక్షాత్ లలితా దేవి పరిపూర్ణ అవతారములు

శ్రీమాత్రే నమః

 వశిని కామేశ్వరీ మోదినీ విమల అరుణ  జయినీ సర్వేశ్వరీ కౌళినీ  

శ్రీమాత్రే నమః

చైత్రనవరాత్రులు శ్రీరాముని ఆరాధనకు లలితా అమ్మవారి ఆరాధనకు విశేషమైనట్టివి  చైత్రశుక్ల నవమి మధ్యాహ్నం పునర్వసు నక్షత్రంలో 12గంటలకు రాముని పుట్టుక అయితే అర్ధరాత్రి 12గంటలకు మృగశీర్షా నక్షత్రంలో పార్వతీ దేవి జననం  

ఇక శని అంటే ఈరోజు మనం చేసిన కర్మకు కాలం యొక్క  ప్రతిస్పందన అంతే

ఎపుడో మనకు తెలియకుండా జరిగి పోయిన తప్పుల వలన కలిగే ప్రతిచర్యల ముప్పు తగ్గాలంటే పైన చెప్పిన వాటితో పాటు 

వికలాంగులకు పేదలకు ఆహారం అందించటం వీధి కుక్కలకు (ఇంటి యందు కుక్కలు పెంచరాదు  దోషకారకం) ఆహారం నీరు

అందేలా చూడటం గోవులను పోషించటం ఉపయుక్తమైన పనులు

జైశ్రీరామ్

శంఖుపుష్ప

 శంఖుపుష్ప లతలతో అల్లుకున్న 
చామంతి మోముపై విరిసిన మల్లె 
మొగ్గల చిరునవ్వు చంద్రికలు 
మనసును ముప్పిరిగొన 

అరవిచ్చిన నల్ల కలువ కనుల 
మురిపెపు కాంతులు చామంతి 
మోముపై తళుకులీనుతూ 
మనసును రంజింప 

ఓ హసిత చంద్రికా నీవు నిలచిన
 తావు ఆనంద సరాగాల సంద్రమాయెనే 

హసిత చంద్రమా

 ఇంద్రనీలమణుల కాంతులతో మెరయు 
కనుల కొలనులో విరిసే ప్రేమ సుమాలు 
మదిని మీట 
మార్గశీర్షోదయాన గులాబీ రెక్కలపై మెరిసే 
మంచుబిదువుల్లా లేత ఎరుపు పెదవుల నడుమ 
పూచే హసిత చంద్రికలు మనసు న  ముప్పిరిగొన 
మరకత కుండలపు కాంతులతో చెంపల కెంపులు 
వింతశోభల మెరియ 
విప్పారిన నవకమలంలా ఆ వదనం హృదిలో 
చిత్రించుకుపోయెనే

హసిత చంద్రమా 

జగమంతయు జగన్నాధుని

 నిర్మల సరోవరంబున ప్రతిబింబించు కలువలరేడు

రూపు  కని కోటిచంద్ర ప్రభాసమానమైన గోపికామానస చోరుడని బ్రమసి మకరందపు మాధుర్యము కొరకు బ్రమించు బ్రమరము వలే

పరవశమొంది సరోవర కమలపు రెక్కపై వాలె

  జగమంతయు జగన్నాధుని కాంచు గోపికాబృంగమొకటి

శ్రీరంగపతీ

 వేడుక తోడ గోపకులమంతయు అద్దిన 
రంగుల తో నేలకు దిగివచ్చిన హరివిల్లాయని 
ముచ్చటగొలుపు మోముతో హరి కడు విలాసముతో 
ఢమ్ ఢమ్ ఢమ్ యనుచు చేసిన ఢమరుక ధ్వనులతో 
గోపాంగనల గుండెలు ఝల్లుమన మోములు ఎరుపెక్కే 
కంసాదుల గుండెలు దడ దడలాడే మోములు నల్లబడే 
ఇంద్రాదుల గుండెలు ఉప్పొంగ మోములు తెల్లబడే 
ప్రకృతి కాంత  పులకింతలతో   ఆకుపచ్చని కాంతులీనే 
 సంబరపు ధ్వనులతో అంబరం నీలివర్ణపు సొబగులద్దుకునే  
ఢమ ఢమ సవ్వడులు సోకి భగభగ లాడు భానుడు పసిడి కాంతుల 
సోముడాయే 
ఏడు రంగుల పూబాలలు ఎదను విచ్చి సువాసనలు వెదజల్లుతూ 
బాల క్రిష్ణుని మురిపించే 
జీవితమే రంగులమయం శ్రీరంగపతీ నీవు తోడుంటే 

ఆనంద రస గుళికలు

 పరుగులెడుతున్నది మధుర ఫలమని 
పక్షులు భ్రమింప 

కదులుచున్నది మకరందపు తుట్టెయా 
యని తుమ్మెదలు తృళ్లిపడ 

ఈ సుందర కుసుమమే లోకాల పుష్పించేనో  
యని పుష్ప బాలలు సిగ్గుచెంద 

ఈ సుకుమారుని పాదమెంతటి సుతిమెత్తనో యని 
లేలేత గరిక అచ్చెరువొంద 

కలువ కనుల సూర్య తేజపు  కాంతులీన  

లేలేత పగడపు పెదవులపై ఆనందపు రస 

గుళికలు జాలువార 

బృందావన వీధుల తిరుగాడు ముగ్ధమనోహర 
బాలముకుందుని గని ప్రౌఢగోపికల వలువలు 

వదులాయే 

చిన్ని క్రిష్ణా నీ ఈ రూపం మా హృదిలో స్థిరపడి 
 కడలి అలల వలే ఎగసిపడే మా చిత్తంబులకు 
కుదురుతనం కూర్చుగాక 

రంగోళి

       

తనపై  మక్కువ పెంచుకున్న మగువల 

మనంబుల సంతసంబుల సన్నజాజుల 

పూయించ రాధాసఖుడాడే రంగోళి ఫల్గుణ 

పూర్ణిమనాడు బృందావన వీధులలో వేడుకగా 

సహజ పరిమళాల ఒప్పారు ఇష్టసఖి రాధ 

కుంతలముల నీలవర్ణ కాంతులే  గోపికల 

కనురెప్పల కాటుకగా తీర్చిదిద్దే నల్లనయ్య 

వృషభానుసుత ముత్తెపు దంత పంక్తి శ్వేత 

కాంతులే తెల్లని మల్లియలుగా గోపాంగనల 

కొప్పుల చుట్టే కొంటెతనమున క్రిష్ణుడు 

ప్రాణసఖి రాధ శశివదనపు పసిడి వర్ణపు 

సోయగమే గొల్లభామల మేనిపై చందనపు 

పూతగా అద్దె  ఆదరమున  అచ్యుతుడు

కిశోరుని తలపులతో ఎరుపెక్కిన కిశోరీ 

గల్లపు మెరుపులే  గొల్లకాంతల బుగ్గలపై 

కెంపులుగా అలదే యశోదానందనుడు 

బృందావనపు యువరాణి చూపుల చల్లదనం

సోకి  హరిత వర్ణపు శోభలతో అలరారు ప్రకృతి 

 పచ్చదనమే గొల్లెతల పైటగా చేసే గరుడ వాహనుడు 

క్రిష్ణ ప్రేయసి రాధికా ముక్కెర ధూమల వర్ణపు సొబగులే 

గోపికల హస్త భూషణములుగా అలంకరించే నంద నందనుడు 

కలువబాల రాధ కంటి కొలను నీలివర్ణపు దయాజలధి 

తన కంటిలో నింపుకుని గోపకాంతల దేహమెల్లా తడిపే

రాధారమణుడు సంతత ధారలా ప్రేమ మీరగా  

ప్రేమ స్వరూపులు రాధాకృష్ణుల రసరమ్యపు రాస కేళీ 

విలాసములే   సప్తవర్ణ శోభిత హరివిల్లుల కాంతులై 

 లక్ష్మీకిరణుల హృదయ బృందావనిలో  నిరతము 

వెల్లివిరుయుగాక 

నిత్యహోళీ

జగముల క్షేమంబు కోరి గొంతున 

గరళము దాచిన గోపీశ్వరునకు 

రాధేశ్వరుడొనరించె రసరమ్యపు 

రంగుల అభిషేకంబు కన్నుల పండువగా 

 పన్నగ భూషణుడౌ పశుపతిని పసుపు ధారల పరవశింప చెసే 

 వెండికొండల కైలాసవాసునకు తెల్లని విరజాజుల తోరణము కట్టే 

దిగంబరునకు నీలి వర్ణపు నీరవముల అంబరము లద్దే తాండవమాడు రుద్రునకు రక్తవర్ణపు రుద్రాక్షువుల మాలలద్దే 

మంగళకరుడగు ముక్కంటికి ఆకుపచ్చని పకృతికాంత సొబగులద్దే 

 శాంతమే తానైన సాంబునకు కాషాయాంబరపు కమలాల మాల తొడిగే 

హరిహరుల కలయికయే సప్తవర్ణాల హరివిల్లై 

లోకంబుల నిత్యహోళీ కేళి సంబరంబులాయే

శ్రీమన్నగర నాయికా

జగత్తును పాలించు శ్రీవత్సాంకితుని వాత్సల్యభావమున

లాలించుచున్నది జగదంబిక అలసట హరి దరి చేరనీయక

ఈ లాలన మరీ మరీ కోరెనేమో హరి యశోదయై కౌసల్యయై

కోరి భువికి చేరె భువనేశ్వరి మాతృభావపు మధురిమలు వెదజల్ల 

విశ్వరచనా సృజనలో తలమునకలైన విరంచి వేలుపట్టి ఆడుచున్నది 

విశ్వమాత  విసుగు విరామపు తలంపులేవీ విధాత దరిచేరనీయక

రుద్రుని ప్రళయకాల వీరభద్రుని భుజగ భూషణుని 

సదాశివునిగా లోకముల కీర్తి నొందించ భుజమున

పట్టి వెన్నుతట్టి తల్లితనపు చల్లదనముతో సాంబుని

అణువణువు నింపుచున్నది మాతృమూర్తి లలితాంబిక  

 

అయ్యలగన్న యమ్మ ముగ్గురయ్యల మూలపుటమ్మ

మా మనంబుల నిత్యనివాసినియై ఆనందసంద్రపు అలలపై

మా జీవన నౌక పయనింప చేయుమా శ్రీమన్నగర నాయికా 

లక్ష్మీ కిరణు ప్రియ తనూజా శ్రీరాజరాజేశ్వరీ మాతా 

రతీపతి జనకుని

 కాళింది మడుగులో కాళిందుని శిరములపై 

నాట్యమాడు చిన్ని శిశువుని గని  దుఃఖపు 

భారమున తల్లడిల్లు గోపాంగనల హృది తేట 

పరచ బృందావన వీధుల చిందేసే చిన్ని క్రిష్ణుడు 

బృందావన వీధుల చిందేసే చిన్నిక్రిష్ణుని గని

పాలిండ్ల పొంగు మధురభావనలతో బరువెక్కిన 

హృదయపు భారము దించనెంచిన గొల్లభామలు 

ఆడిపాడిరి ఆనందనిలయుడగు అచ్యుతుని గూడి 

ఆనందనిలయుడగు అచ్యుతుని  పదరంజీవముల

ఝనత్ క్వణత్ ధ్వనులతో ఉల్లము ఝల్లుమన

పూలతలవోలే అల్లుకొనే గోపీకుంజారావముల్ రతీపతి జనకుని జన్మజన్మల రాగబంధమతిశయించ

ఆత్మబంధు

 జనన మరణ చక్రభ్రమణంలో నాది నావారలను 
వ్యామోహపు మకరముల పాల్బడి విలవిలలాడుచును 
నిర్మోహత్వంబు పొందదు  నా మనంబు నీ కృప లేకను
కలిసి తిరిగితిమి కాలచక్రమంతయు దేహదారినై నేను 
ఆత్మలింగమై నీవు  ప్రతి కదలికలో వేదన చెందితి  నేను  
వేడుక చూసితి నీవు ఆటలు చాలిక ఆత్మబంధు నిర్మల 
జ్ఞానమొసగి దయ చూపు దక్షిణా

మూర్తి స్వరూపా  శ్రీకాళహస్తీశ్వరా 

పద్మసుందరీ ప్రియుని

 

పంకజాక్షుని పాద పంకజ నాట్యవిలాసముల రేగిన 
పృధివీపంకజ పరాగం గోపికాంగానల మేని గంధమై మెరియ      

పుండరీకవరదుని కాలి అందియల  మువ్వల సవ్వడులు 

గోపికారమణుల హృదయము రాగరంజితము చేయ 

 

పద్మనాభుని హృదయసీమపై నాట్యమాడు జాజీ చంపక మల్లికాదుల 

అలమిన చెమటగంధపు విరిజల్లులు అంగనామణుల అధరసుధలై విరియ 

పూర్ణసోముని మోముతో ముద్దు గొలుపు నల్లనయ్య ఆధారాలపై పూచిన 

చిరు నగవు కెంపులు లలనామణుల నునుబుగ్గ సిగ్గుమొగ్గలై అరయ 

పద్మసుందరీ ప్రియుని సుందర నాట్యవిలాసములు లక్ష్మీ కిరణుల 

హృదయబృందావనిలో నిరతము సందడి చేయుగాక 

నవద్వీప సుధాకరా

 చైతన్య కృష్ణచైతన్యో గౌరంగో ద్విజనాయకః 

యతీనం దండినాత్ చైవ న్యాసినాద్ చ శిరోమణిః

 రక్తంబరధరః శ్రీమాన్ నవద్వీప-సుధాకరః 
ప్రేమభక్తి ప్రసాదశ్చైవ శ్రీశచీ నందన స్తథా 

ద్వాదశైతాని  నమాని త్రి-సంధ్యం యః పఠన్ నరః  

తస్య వాంచ-సుసిద్ధిః స్యాత్ భక్తిః శ్రీల పదాంబుజే

చైతన్య : జీవ శక్తి ప్రదా

కృష్ణ చైతన్యా : సర్వ ఆకర్షణా సర్వశక్తిప్రదా 

గౌరంగా : సుందరమైన శరీరం కలిగినట్టి వారు 

ద్విజ నాయక : బ్రహ్మణులకు నాయకుడు 

యతీనాం శిరోమణీ : యతులలో (స్వేచ్ఛగా చరించు వారు) శ్రేష్ఠుడు

దండినాం శిరోమణీ : దండధారులలో శ్రేష్ఠుడు

న్యాసినాద్ శిరోమణీ : సర్వమును త్యజించినవారిలో శ్రేష్ఠుడు

రక్తామ్భారధర : ఎర్రని వస్త్రములు ధరించినవారు 

శ్రీమాన్ :  సర్వోత్కృష్టుడైన ఐశ్వర్యవంతుడు 

నవద్వీప సుధాకరా : నవద్వీపం లో అమృతాన్ని పంచేవారు 

ప్రేమభక్తి ప్రదా : పారవశ్యంతో కూడిన ప్రేమపూర్వక భక్తి ప్రసాదించువారు 

శ్రీశచీ నందన : శచీ దేవి యొక్క ప్రియమైన పుత్రుడు 

 

ఓ ముద్దబంతి

 బంతి ఓ ముద్దబంతి

రవివర్మకే అందని

నా మనసు కు అందిన ఒకే ఒక అందానివో

రవి చూడని

నే కాంచిన కాంచన శిల్పానివో

బ్రమరం చేరని

నా చూపులు తాకిన పుష్ప

మాలికవో

ఎవరివో నీవెవరివో

దివిలోని తారకవో

భువి పైని పూబాలికవో

సాగరమందున స్వాతిముత్యానివో

సమిరంలో సుగంధాలు నింపు సన్నజాజివో

ఆకాశాన సప్తవర్ణాల హరివిల్లువో

అచలాగ్రాన ప్రకాశించు రత్న రాశివో

తూరుపు దిక్కున అరుణారుణిమ వర్ణానివో

పడమటి సంద్యారాగానివో

కవి హృదయాన కావ్య కన్యకవో

చిత్రకారుడి కుంచెలో ఒదిగిన సజీవ సౌందర్య మూర్తివో

నివెవరైతేనేం

నిన్ను ప్రేమించటం మాత్రమే తెలిసిన ఈ సామాన్యుడి

గుండె చప్పుడు నీవు

ఆలోచనల ఆది నీవు

ఆనందాల ప్రోది నీవు

ఊపిరి నీవు

 బంతి  ఓ ముద్దబంతి

 

నిజం నీవు
నీడను నేను

విచలితం

 నల్లని  పొడుగైన  ఉంగరాలు  తిరిగిన  ఆ   చిన్ని  కృష్ణుని

కేశాలు  తల్లి  యశోదకు  నయనానందకరం  కాగా
వాటిని  నెమలి  పింఛం  తోను , సువాసనలు  వేదజల్లేడు పూలతోను
అలంకరించి  మురిసిపోతున్నది
 
నవమి  నాటి  చంద్రుని  పోలిన  విశాలమైన  కృష్ణుని  ఫాల  భాగం
బ్రమరాలను  ఆకర్షింపచేయుచున్న  పూల  వలె , చిరుగాలికి  
నుదుటి  పైకి  జారిన ముంగురులతో  గోపికలకు  ముద్దుగొల్పుచున్నది .

 
కృష్ణుని   అధరామృతాన్ని  నింపుకున్న  వేణు  గానం  సమస్త  జీవకోటికి
చైతన్యం  కలిగిస్తున్నది
 
ఆ  లావణ్యమైన  కృష్ణుని  ముఖారవిందం   గోపికల  మనస్సులను
మదనుని  వలపు  బాణాల  తాకిడికి  చలించిపోతున్న  ప్రేమికుల  మనోరధం
వలె  విచలితం  చేస్తున్నది

మురళీవిలాస  ముగ్ధ  ముఖామ్బుజంతో  విరాజిల్లు  చిన్ని  కృష్ణుని
ముఖ  సౌందర్యాన్ని  వీక్షిస్తూ  ముల్లోకాలు  కూడా  అద్బుత  ఆశ్చర్యాలకు
లోనవుతున్నాయి
 
ఎర్రని  దొందపండ్ల  వంటి  లేత  పెదవులపై  మురళి  ని  అటునిటు  విలాసంగా  తిప్పుతూ విశాలమైన  విలోచనాలలో  మదుర  భావనలు  పలికిస్తూ  గోపికలతో  ముచ్చటిస్తున్న  తీరును  చూసి  పరవశులవని    వారెవరైనా  వుంటారా
 
అట్టి  కృష్ణుని  సౌందర్యాన్ని  చూడజాలని  కనులు  నెమలి  పించముపై  అందంగా  తీర్చబడిన  కనులవలె  ఎంత  సుందరములైనప్పటికి  వ్యర్ధములే  కదా

ఓ దేహధారీ

 గెలుపోటములు పట్టని విరాగి

బూడిద ధారణలో మురియు భైరాగి

కడుపే కైలాసంబుగా నర్తించు కామారి

పుక్కిలి వారణాశి గా నెంచి విహరించు 

విశ్వనాధుడు

తానున్న తావు శివం

తాను విడచిన తావు శవం

తోడు రమ్మని అడుగుటెందుకు ఓ దేహధారీ

కనుగొనలేవా నీవే తానైన లింగరూపి ని

మురళీవిలాస

 నల్లని  పొడుగైన  ఉంగరాలు  తిరిగిన  ఆ   చిన్ని  కృష్ణుని

కేశాలు  తల్లి  యశోదకు  నయనానందకరం  కాగా
వాటిని  నెమలి  పింఛం  తోను , సువాసనలు  వేదజల్లేడు పూలతోను
అలంకరించి  మురిసిపోతున్నది
 
నవమి  నాటి  చంద్రుని  పోలిన  విశాలమైన  కృష్ణుని  ఫాల  భాగం
బ్రమరాలను  ఆకర్షింపచేయుచున్న  పూల  వలె , చిరుగాలికి  
నుదుటి  పైకి  జారిన ముంగురులతో  గోపికలకు  ముద్దుగొల్పుచున్నది .

 
కృష్ణుని   అధరామృతాన్ని  నింపుకున్న  వేణు  గానం  సమస్త  జీవకోటికి
చైతన్యం  కలిగిస్తున్నది
 
లలితా  లావణ్యమైన  కృష్ణుని  ముఖారవిందం   గోపికల  మనస్సులను
మదనుని  వలపు  బాణాల  తాకిడికి  చలించిపోతున్న  ప్రేమికుల  మనోరధం
వలె  విచలితం  చేస్తున్నది

మురళీవిలాస  ముగ్ధ  ముఖామ్బుజంతో  విరాజిల్లు  చిన్ని  కృష్ణుని
ముఖ  సౌందర్యాన్ని  వీక్షిస్తూ  ముల్లోకాలు  కూడా  అద్బుత  ఆశ్చర్యాలకు
లోనవుతున్నాయి
 
ఎర్రని  దొందపండ్ల  వంటి  లేత  పెదవులపై  మురళి  ని  అటునిటు  విలాసంగా  తిప్పుతూ విశాలమైన  విలోచనాలలో  మదుర  భావనలు  పలికిస్తూ  గోపికలతో  ముచ్చటిస్తున్న  తీరును  చూసి  పరవశులవని    వారెవరైనా  వుంటారా
 
అట్టి  కృష్ణుని  సౌందర్యాన్ని  చూడజాలని  కనులు  నెమలి  పించముపై  అందంగా  తీర్చబడిన  కనులవలె  ఎంత  సుందరములైనప్పటికి  వ్యర్ధములే  కదా