పులిహోర

నమ్మకమనే నూనెలో ప్రేమ పూర్వక పలకరింపుల పోపు వేసి కమ్మని భావాల కరివేపాకు కలిపి అలిగిన వేళ మనసు పలికించు ఎండు మిరప ఘాటును తగిలించి బంగారు వన్నె నిగ నిగ ల మేని చాయను పొసుపు పొడిగా అద్ది చిలిపి ఊహల చింత పులుపులో నానిన ఆత్మీయతల అన్నపు పలుకులలో మనసులో పొంగు ఆప్యాయత అరచేతిలో అమృత బిందువు కాగా కలిపి కలబోసి నీవందించిన పులిహోర రుచి ఏమని వర్ణించను అము జన్మ జన్మలకు నీ ప్రేమామృత ధారలలొ తడిసి ముద్దవ్వాలని తపించటం తప్ప

నీలి వర్ణపు సోయగం

నీలి వర్ణపు సోయగం నీలి కాంతుల పంచె కట్టిన ఆకాశరాజు చూసి భూకాంత బుగ్గపై పూచిన నును సిగ్గు మొగ్గలు  నీలి వర్ణపు మయూరములై హొయలొలికించిన  ముచ్చటతోడ   దట్టమైన నల్లమబ్బు తునకల  మరులు గొని  గగనాధీశుడు ప్రేమ జల్లుల  విరులు కురిపించగా చిరుజల్లుల తాకిడితో ఎద పొంగిన వసుధ  మేని గంధపు సువాసనల  మురిసిన మయూరం పురివిప్పి కప్పిన ఆకు పచ్చని శోభలతో కీంకారపు ధ్వనులతో ఆవని పరవశించే  గగన సీమయే పురుషుడు భూమాతయే ప్రకృతి కాంత  ఇరువురి ప్రేమపూర్వక సమాగమమే  విశ్వమున  శోభిల్లు లక్ష్మీ కళ 

దేవీ నారాయణీయం దశకం -2

1. అసురుల యుద్ధంలో ఓడించి సంబరాలలో మునిగిన దేవతలు విజయ చిహ్నంగా యజ్ఞం చేయదలచి పరమ శివుని బ్రహ్మను తోడుగా చేసుకొని యజ్ఞ పురుషుడు  అడ్డులేని శౌర్యం కల విష్ణువు చెంతకు బయలుదేరిరి  2  బలమైన పదునైన వింటి నారి తో బిగించబడిన విల్లు పై తన చుబుకం నుంచి నిద్రావశుడై వున్న  విష్ణువు ను ఆశ్చర్యంతో చూస్తూ వుండిపోయిరి మంచి నిద్రలో వున్నవారిని నిదురలేపుట పాపమని తలచి మౌనంగా చేస్తూ వుండిపోయిరి  3 బ్రహ్మ మాయచే కల్పింపబడిన తెల్ల చీమల కొండ వలన కలిగిన చిరాకుతో  విష్ణువు తన చుబుకాన్ని వింటినారి కి  బలంగా నొక్కటం చేత  తెగిన వింటినారి వంపుగా వున్నా వింటి ని ఒక్క ఒడుపున నిటారుగా చేయటం చేత   ఆ విల్లు వేగంగా విష్ణువు యొక్క కంఠాన్ని తాకటం చేత ఆయన శిరస్సు తెగిపడింది  4.  దేవతలందరు చూచుచుండఁగా  ముర అను రాక్షసుని సంహరించిన మురారి శిరస్సు ఎగిరి వెళ్లి సముద్రమునందు పడినది. విషణ్ణ వదనంతో  నిశ్చేష్టితులై హాహా కారాలు చేస్తూ దేవతలు విచారంలో మునిగిపోయారు  5 విష్ణువు యొక్క తల పడటం చూసి ఇది ఎలా జరిగింది  ఎవరు చేశారు అని తమలో తాము చర్చించుకుంటున్న దేవతలతో బ్రహ్మ కారణం లేకుండా ఎట్టి కార్యము జరుగదు . విధి ఎంతో బలీయమైనది కదా అని పలికెను  6  కరుణార్ధ్ర చిత్తము కలిగి  బ్రహ్మాండ సృష్టి అంతకు కారణభూతురాలైన దేవిని ధ్యానించండి .  సర్వగుణములు కలిగినట్టిది ఏ గుణములు అంటనట్టిది సర్వ కార్యములు నిర్వర్తించుటలో సర్వ సమర్థురాలగు ఆ తల్లి అవసరమైన కార్యాన్ని నిర్వర్తిస్తుంది అని బ్రహ్మ పలికెను  7 ఈ విధంగా బ్రహ్మ చే ప్రోత్సహించబడిన దేవతలు వేదములు దేవి ని స్తుతించిరి సంతోషం పొందిన దేవి ఆకాశమున నిలిచి దేవా సమూహమును చూస్తూ ఈ విధంగా పలికెను... ఈ విధంగా పడివున్న హరి వలన మీకు సర్వ శుభములు కలుగును  8  హయగ్రీవుడను బలవంతుడగు రాక్షసుడు నానుండి వరములు పొందినవాడై భయము వీడి వేదములను మునులను పీడించుచున్నాడు . నామ రూపములలో తనను పోలిన  (గుఱ్ఱము శిరసు కలిగి హయగ్రీవుడను పేరు కల ) వాడి చేతిలోనేమరణం పొందుదునన్న వరం కోరెను  9  విధి వశాత్తు విష్ణువు యొక్క శిరము తెగిపడినది . తలలేని హరి శరీరమునకు గుఱ్ఱపు శిరస్సు అతికించినచో మురారి హయగ్రీవ నామధేయుడై హయగ్రీవుడను అసురుడిని వేగంగా సంహరింపగలడు  10 ఈ విధంగా తెలిపి దేవి అదృశ్యరాలాయెను . వెంటనే త్వష్ట గుర్రపు శిరస్సును మురారి దేహమునకు అనుసంధించెను . దేవతలందరు ఉల్లాసముతో చూస్తుండగా హయాననుడగు శ్రీహరి ప్రాదుర్భవించెను  11 ఓ దేవి నీయొక్క ఆశీస్సులతో హయ వదనుడైన మురారి రణమునందు  హయగ్రీవుడను రాక్షసుని సంహరించెను . జగత్తునకు సర్వ మంగళములు కలిగించు ఓ దేవి ఎల్లప్పుడూ నా శిరముపై నీ దయా వర్షం కురిపించు 

దేవీ నారాయణీయం ప్రథమ దశకం

దేవీ నారాయణీయం ప్రథమ దశకం 1. విశ్వమంతయు దేనినుండి పుట్టుచున్నదో , ఈ విశ్వమంతయూ దేనిని ఆధారంగా చేసుకుని నిలిచి యున్నదో , మన కంటికి అగుపడు సమస్త విశ్వముకన్న ముందుగా ఏది యున్నదో , మన కంటికి అగుపడు సమస్త విశ్వజాలము నందు అంతర్లీనంగా ఏది ప్రకాశిస్తూవున్నదో, మన మనసు మాట కు అందని  అట్టి ఆది పరాశక్తి కి నమస్కారములు  2. ఓ ఆది  పరాశక్తి! నీవు   స్త్రీ పురుష దేవ అసుర నర భూత మొదలగు జీవజాలముకు చెందిన దానవు కాదు  నీకు కర్మ గుణాదులు లేవు . నీవు తుది మొదలు లేనిదానవు కాల గమనం అనుసరించి

సంభవించే ఎట్టి మార్పులు నీ దరి చేరవు . ఈ సకల చర అచర జగత్తు యంతయు నీ విభవము ప్రకాశిస్తున్నది  3   తల్లీ నీవు రూప రహిత వైననూ  నీ మాయచే ఈ విశ్వమను రంగస్థలమున బహు సుందరమైన నర్తకి రూపం ధరించి నీవు చేయు విశ్వక్రీడా నృత్యమును నీ భక్తులైన వారు  బహు ఉత్సుకత తో చూస్తూ ఆ నాట్య భంగిమలయందు లీనమైన మనస్సు కలవారై కొన్ని యుగములను సైతం నిమిషములవలె గడుపుచుంటిరి ఏమి చిత్రమిది ! 4 తల్లీ నీవు రూప గుణములకు తగ్గ నామములతో విరాజిల్లుదువు . వివేకులు నిన్ను దేవీ దేవ స్వరూపములతో కాంచుదురు . దేవీ స్వరూపమున భాసిల్లునపుడు ఉమా, లక్ష్మీ , సరస్వతీ మున్నగు నామములు ధరించదువు . దేవ రూపమున భాసిల్లు నపుడు షణ్ముఖ , శివ , అచ్యుత మున్నగు నామములు ధరించుదువు  5 నీవే బ్రహ్మ తల్లియగు  శక్తి  నీవే  విష్ణు  నీవే రుద్ర స్వరూపము  ఈ జగత్తు అంతటికి మహా రాణి వలే నీ శాసనముల ద్వారా  సృష్టి పోషణ సంహారము అనే కార్యములను నిర్వర్తిస్తున్నావు . నీవు తప్ప అన్యమెరుగని నీ భక్తులపై దయావర్షం కురిపించి సంరక్షిస్తున్నావు  6 తల్లి తన సంతతికి శుభములను చేకూర్చు కార్యములు చేయును. వారు పురోగతి పొందినపుడు సంతోషించును వారు జీవితమున వెనుకబడినచో దుఃఖమును పొందును . అట్లే ఈ జగత్తు అంతకు తల్లి అయిన నీవు మాత్రము జీవుల కర్మలకు తగిన ఫలములను ప్రసాదించుచు ఎట్టి దుఃఖ భావనలను కర్మ  ఫలములను పొందక నిర్వికారముగా ఉండెదవు .  7. ఓ తల్లీ ఈ జగత్తు అంతయు నీ దయావర్షపు బిందువులతో తడిపెదవు . ఎవరు నీ పాదముల పట్ల నిర్మల భక్తి కలిగివుందురో అట్టివారు చక్కని విత్తనం మొలకెత్తి ఫల పుష్పాదులు యిచ్చినట్లు తమ జీవన గమనంలో ఉద్ధరింపబడుదురు . ఎవరు నీపట్ల విముఖులో వారు చేదు విత్తనం నశించినట్లు నశించిపోదురు . ఓ తల్లీ నీవు నిర్గుణవు , పరిపూర్ణమైన దయాస్వరూపము కల దానవు  8 అమృత సముద్ర మధ్యమున వివిధములైన ప్రాకారాల నడిమి భాగాన మూడు లోకములకు గొడుగువలె నీ నివాస స్థానమైన మణిద్వీపం విరాజిల్లుతూ వున్నది . అమ్మా పార్వతీ  ఆ ద్వీపమునందు శ్రీచక్రమున సుస్మితమందహాసారవిందయై వెలుగొందుచుంటివి  9  ఎవరు సిగ్గు విడచి నీ గుణ కీర్తనములు హెచ్చు స్వరముతో చేసెదరో ఎవరు తమను తాము మీపాదాలకు సమర్పించుకుందురో అట్టి వారి పాపములను సూర్యుడు చీకట్లను తరిమి నట్లు తరిమివేసెదవు  10 ఎవరు ఇంద్రియ భోగముల పట్ల నిరాసక్తులై వుంటారో వారు నిన్ను సగుణ నిర్గుణ రూపములుగా తెలిసియుందురు . ఎవరు ఇంద్రియభోగములకు లాలసులై వుందురో వారు నిన్ను తెలుసుకొనలేరు . ఓ తల్లీ ఈ క్షణమే నీ గురించి తెలుసుకొనగోరుతున్నాను . ఈ సంసార దుఃఖములనుండి నన్ను విముక్తుడను చేయి. నీ పాద పద్మముల పట్ల అమితమైన భక్తి ని ప్రసాదించు . ఓ అమ్మా నా రక్షణ భారం వహించు నా కోరికలు నెరవేర్చు  

అమ్మా భవానీ

ఉదయం 3 గంటల నుంచి సుమారు 100 కి మీ  దూరం నుండే రోడ్ల మీద యువకుల గుంపుల కోలాహలం చేతిలో కాగడాలు ధరించి పరుగులు తీస్తూ కొందరు బైక్ సవారీ చేస్తూ కొందరు  వారిని చూస్తూ ఆశ్చర్యపోతూ నేను  అందరి గమనం ఒకచోటకే ....... అదే  ఆత్మశక్తి స్వరూపిణి భవానీ మాత కొలువైన కొండ ..తుల్జాపూర్ భవానీ క్షేత్రం  శయనముద్ర లో యోగనిద్ర లో వున్న అమ్మ భవానీ దర్శనం చేసుకుని అక్కడ నుండి పండరీపురం చేరుకున్నాం  తొలిసారి ప్రేమలో పడ్డ యువతీ యువకులు ఒకరి రూపం పట్ల మరొకరు ఎంత తన్మయ భావంతో వుంటారో  అంతలా ఎంతసేపు చూసినా ఎన్నిసార్లు చూసినా తనివితీరని రూపం మా ఇష్ట సఖుడు ఆ విఠలుడి పాదాలకు నమస్కరించి కొల్హాపుర మహాలక్ష్మి ధామం చేరుకున్న  ఉదయం 6 . 30 కి క్యూ లైన్ లోకి చేరిన.  అక్కడ క్యూ లైన్ లోకి చేరాక మనసులో పుట్టిన  ఆలోచనల అక్షర రూపం భవానీ మందిరంలో క్యూ లైన్  హైదరాబాద్ ఆర్డినరీ సిటీ బస్సుల్లో , కాలేజీ టైమింగ్స్ లో  ఫుట్ బోర్డు ప్రయాణాలను మరిపించేలా     ఓ అరటి పండు, కొన్ని మురమరాలు,  చుట్ట చుట్టి పడగ విప్పి వున్న  పాము ను తలపించేలా వస్త్రం తో చేయబడిన దీపపు వత్తిని కొద్దిసేపు వెలిగించి తరువాత  తరువాత దాని ఆర్పి మసి అంచుతో వున్న ఆ వత్తి    వీటిని వెదురు బుట్టల్లో పెట్టుకుని ఆ  వెదురు బుట్టలు నెత్తిన పెట్టి  జడలు కట్టిన జుట్టుతో  ముతక చీరలు కట్టి  పక్కా  మాస్ అనిపించేలా తోసుకుంటూ పోతున్న  స్త్రీల గుంపు  కొల్హాపూర్ క్యూలైన్   రద్దీ వున్నా అలసట తెలియనీయని హైదరాబాద్ మెట్రో ప్రయాణంలా  దివి నుండి దిగివచ్చారా అన్నట్లు పాల మీగడ వంటి మేని కాంతులతో గుబాళించే సెంటూ స్ప్రేల తో తళుకు బెళుకుల చీరలు కట్టి పట్టుకుంటే కందిపోతాయా అనిపించే ఆ సుకుమారమైన చేతుల్లో  అప్పుడే కొన్న స్టీల్ ప్లేట్స్ లో ఓ చీర ,పూలు గాజులు పెట్టి అలవోకగా అలానడిచి వెళుతుంటే అనేక రాజ హంసల సమూహం పక్కనుండి సాగిపోతున్నట్లు  వెళ్ళింది అమ్మను చూడటానికా అమ్మాయిలను చూడటానికా అని అనుకోకండే ఆడవాళ్ళ గురించే కానీ మగ పుంగవుల గురించి చెప్పటానికి ఏమీ లేదిక్కడ .  ద్వాపరం వరకు స్త్రీ పురుషుడిని అనుసరిస్తూ సాగింది . తగ్గట్టుగా ధర్మము వర్ధిల్లింది కలి ... స్త్రీని అనుసరిస్తూ పురుషుడు సాగుతున్నాడు ... ఎక్కువ చర్చ చేయటం మంచిదికాదు వదిలేద్దాం  పురుషుడు జఢమ్ స్థిర స్వభావి . స్త్రీ ప్రకృతి స్వరూపిణి  చలన శీలి  ప్రకృతి పురుషుడిని ఆలంబనగా చేసుకుని సాగితే అది స్థిర చలనం ఆనంద కారకం అందుకు విరుద్ధంగా జరిగితే అది దుఃఖ కారకం  భవానీ మందిరంలో క్యూ లైన్ జై జై భవానీ ... ఓ యువకుడి పెనుకేక జై జై శివాజీ .... ప్రతిగా ఓ పదిమంది యువకుల గుంపు స్పందన చెవుల్లో తుప్పు వదిలేలా  భవానీ..  అమ్మ ... ఆత్మ శక్తి ప్రతిరూపం ఆ తల్లి ఆ ఆత్మ శక్తి ని పుణికి పుచ్చుకున్న వీర తనయుడు శివాజీ మహారాజా  ఆ యోధుడి పట్ల ఇప్పటికి మరాఠా యువతలో వున్న గాఢమైన ఆ ప్రేమ బంధం అమోఘం  కావాల్సిందల్లా వారి  ఉత్సాహాన్ని సమాజానికి ఉపయోగపడేలా తీర్చిదిద్దగల సమర్ధ రామదాసు వంటి గురువు .  కానీ అలాంటి యోగ్యులు ఇపుడు కరువు  మరి మన తెలుగోళ్లకు శివాజీ వంటి యోధులు లేరా.. ?శాతవాహనులు , శ్రీకృష్ణ దేవరాయలు ... వీరి పట్ల మనకున్న గౌరవభావం ఏపాటిది  కొల్హాపూర్ క్యూలైన్ వచ్చింది అమ్మ దర్శనానికీ చేస్తుంది ఐఫోన్స్ లో సాంగ్స్ వింటూ వీడియో గేమ్స్ ఆడుకుంటూ క్రికెట్ చూస్తూ.... ఒకరివెనుక ఒకరు బుద్ధిమంతుల్లా తలలు ఫోనుల్లో పెట్టి అలా సాగిపోతూ.. ధనం మూలం ఇదం జగత్ అన్నదానికి నిదర్శనంలా  ఆహా భవానీ మాత ఆ తల్లికి తగ్గట్టుగానే అక్కడి భక్త సమూహం కొల్హాపూర్ మహాలక్ష్మి ఈ తల్లికి తగ్గట్టుగా ఇక్కడి భక్త జనం  ఇవన్నీ కాదు కానీ  ఓ వైపు శక్తి స్వరూపిణి  కాళికామాత  మరోవైపు జ్ఞాన స్వరూపిణి సరస్వతి మాత  నడుమ ఐశ్వర్య ప్రదాయిని అమ్మ మహాలక్ష్మి  ఆ కొల్హాపుర ధామ వైభవం అద్భుతం  మహాకాళీ మహాలక్ష్మీ మహాసరస్వతీ ప్రభా ఇష్టకామేశ్వరీ కుర్యాత్ విశ్వశ్రీ: విశ్వమంగళం  

వానాకాలం నాడు నేడు  ఆకాశపు చెలికాడు చిటపట చినుకులు రాలుస్తుంటే  సూరీడి చురుక్కు చూపులతో వేడెక్కి వేదన పడుతున్ న భూకాంత ఎద చెమ్మగిల్లి వెలువరించే గంధపుగాలుల ఆస్వాదన లో నా మేని పులకరించే నాడు  ఎండ వేడిమికి పుడమి ఎండి  వానొచ్చే సమయమొచ్చిన చినుకురాలక రైతు గుండె ఎండి  ఇరువురి వేదన  వరదలై  నిలువ నీడలేక  ఉక్కిరిబిక్కిరవుతున్న ప్రాణుల చూచి మనసు మూగపోయే నేడు    ఇంటి చురుల జాలువారి కాలువ కట్టిన వాననీటిలో కాగితపు పడవనెక్కి వేయించిన కారపు వేరుశనగ గుళ్లను గుటుక్కుమనిపిస్తూ పక్కింటి పాప చేయి పట్టి చిందులేసి మురిసిపోతి నాడు  రహదారులలో ధార లా పారుతున్న జలధారలో పొంగిపొరల ుమురుగులో తెలియని దారులలో మరపడవల పై తాపోజాలక పక్కనోడినీ పోనీయక చిరాకు సణుగులు తింటూ సాగిపోయే అయోమయపు జీవుల చూచి జాలిచెందితి నేడు 

సింహావలోకనం

మనల్ని మనం ఆవిష్కరించుకోవాలంటే నిజాయితీ కావాలి . సత్యం చూడటానికి భగభగ మండే నిప్పు కణికలా ఉంటుంది పట్టుకున్నవాడికే తెలుస్తుంది దాని చల్లదనం మనం మహాత్మా గాంధీ ( ఇక్కడో విషయం ...గాంధీ ని విమర్శించటం నేడు సమాజంలో గొప్ప విషయంగా భావిస్తుంటారు చాలా మంది అలాంటి  నిందల జోలికి వెళ్ళకండి ) . అంత గొప్పోళ్ళం ఏమి కాదు కాబట్టి వివాదాస్పద విషయాల జోలికి పోకుండా గుర్తుకు తెచ్చుకున్నప్పుడలా మనసుకు ఆహ్లాదం కలిగించే విషయాలనే నెమరువేసుకుందాం.  వెనుతిరిగి చూస్తే  ముందుగా మదిలొకదిలేది చిన్ననాటి తూఫాన్ జ్ఞాపకాలు  నాటికి ఊరంతా రెండే డాబా ఇళ్ళు . మిగిలినవన్నీ తాటాకు కప్పులు . తుఫాను నాటి రాత్రి పక్కన ఉన్న డాబా ఇంటిలో తలదాచుకోవటం  ఎందుకో బాగా గుర్తుండిపోయింది  ఆ తరువాత మా చావిడి... అక్కడో రావి చెట్టు ..ఆ చెట్టు ఎక్కి దూకుతూ ఆడిన ఆటలు  చావిడిలో ఒకటి పెద్దరికాన్ని ఒలకబోస్తూ తెల్లగా మెరిసిపోతూ ,  ఇంకోటి  నలుపు తెలుపుల కలబోతతో చూపుల్లోనే ఉక్రోషాన్ని ప్రదర్శిస్తూ .. ఆ ఎద్దుల జంట రెంటిని చూస్తుంటే అదో తృప్తి  పచ్చని పైరందాలను చూస్తూ పొలం గట్లపై సాగిపోతూ పంట కాలవల్లో పారే నీటిని దోసిలితో తాగుతూ (ఆ నీటి రుచి తరువాతి కాలంలో ఎప్పుడు చూడలేదు మళ్ళీ చాలా కాలం తరువాత మల్లూరు లక్ష్మీ నృసింహుడి దర్శనానికి వెళ్ళినపుడు అక్కడ కొండల్లో జారే నీరు రుచి.. ఆ తీయదనం .. ఎవరైనా వెళ్లాలనుకుంటే వెళ్ళేటపుడు ఒక డబ్బా తీసుకుపోండి నీళ్లు ఇంటికి తెచ్చుకుని కొన్ని రోజులు త్రాగవచ్చు.  వరంగల్ నుండి భద్రాచలం వెళ్ళేదారిలో ఏటూరునాగారం దాటాక వస్తుంది మల్లూరు  ) తిరిగిన రోజులు  మా నాయనమ్మ చేసే రోటి పచ్చడి పచ్చిమిర్చి చింతపండు కలిపిచేసే పచ్చి మిరప పచ్చడి వేడి వేడి అన్నంలో నేయి వేసుకుతింటుంటే ఆహా ఏమి రుచి   అనరా  మైమరచి ఉలవచారు లో వెన్న కలుపుకుతింటుంటే ఆ తృప్తే వేరు  మా అమ్ముమ్మ ఇంటి దగ్గర ఉన్న సీమతుమ్మ చెట్టు కాయలు లేత ఎరుపు రంగులో పంచదార తీపితో వేసవి వస్తే చాలు ఆ కాయలకోసం ఒకటే పోటీ  ఆరుబయట నులక మంచం వేసుకుని పక్కనే ఆకాశవాణి  పెట్టుకుని జనరంజని కార్యక్రమంలో తెలుగు పాటలు ఆస్వాదిస్తూ ఆకాశంలో చుక్కలు లెక్కిస్తూ నిదురలోకి జారుకున్న రాత్రిళ్ళు  చదువంటే చిరాకు . అదే తరగతులకు  సంబంధంలేని పుస్తకాలంటే తగని మక్కువ . యండమూరి , మల్లాది , సూర్యదేవర , కొమ్మూరి , మధుబాబు ,ఆర్ సంధ్యాదేవి , యద్దననపూడి , అరెకపూడి ఇలా బహుశా చదవని నవల లేదేమో అలా మా వూరి గ్రంథాలయం బాగా నచ్చిన చోటు  హిందూపురం నుండి సాగించిన రైలు ప్రయాణం నల్లమల అడవులగుండా వెన్నెల రాత్రి భోగీ తలుపు దగ్గర మెట్ల మీద కూర్చుని.. అడవి కాచిన వెన్నెలను ఆ వెన్నెల లో అడవి అందాన్ని చూస్తూ.. (ఓ రహస్యం .. రోజు వెన్నెల కాంతిలో ఒక ఇరువది నిముషాలు తిరుగాడితే మేని బంగారు వన్నె పొందుతుంది . కాణి ఖర్చు లేని సహజ ఫెయిర్ అండ్ లవ్లీ ) హిందూపురంలో ఇంటర్ చదివే రోజుల్లో కాలేజీ ప్రక్కనే  చింత వెలగ చెట్ల తోపు ఉండేది సాయంత్రాలు అందులోకి వెళ్లి వెలగ పండ్లు తింటూ పుస్తకాలు తిరగేస్తువుండేవాళ్ళం . ఆ సమయంలోనే  రోజూ  ఓ పడుచుపిల్ల పాలిటెక్నిక్ చ

దుకునేది కాలేజీ కి వచ్చి ఇంటికి వెళుతుండేది ఆ తోపులోనుండి . వెళుతూ వెళుతూ వెన్నెల జలపాతంలా ముసిముసినవ్వుల పువ్వులు విసిరి వెళుతుండేది   కాలేజీ లో ఆడపిల్లల కోసం రక్తం కారేలా కొట్టుకుంటున్న తింగరి వెధవలను చూశాక , పైగా అప్పటికే జీవితమంటే ఈ చదువులు డబ్బు సంపాదన కాదు ఇంకేదో అసలైన అర్ధం వుంది అటువైపుకు మళ్ళాలి అన్న ఆలోచన పెరుగుతున్న సమయం అందుకే ఆ నవ్వులను పలకరింపుల దాకా రానివ్వక చూపులకు మాత్రమే పరిమితం చేసితి  అందుకే అది నొప్పి కలిగించని జ్ఞాపకం లా మిగిలిపోయే    ఇలా ఎన్నెన్నో జ్ఞాపకాల దొంతరలు . వాటిలో కేవలం గుర్తుకు తెచ్చుకుంటే మనసుకు ఆహ్లాదాన్ని ఇచ్చేవి  మాత్రమే పదిలపరుచుకోవాలి . ఇబ్బంది కలిగించేవాటిని మరచిపోవాలి . అపుడే గమనం ప్రశాంతగా సాగిపోతుంది