అజ్ఞాతవాసి అగుపడేనిదిగో నీ ఆనవాలు

అజ్ఞాతవాసి అగుపడేనిదిగో నీ ఆనవాలు నును సిగ్గుల ఎరుపెక్కే చెలి చెక్కిలి ఆనవాలు ముద్ద మందారపు మాటున చిక్కేనిదిగో అజ్ఞాతవాసి అగుపడేనిదిగో నీ ఆనవాలు వలపుల గాలం విసిరే నీ వాలు కనుల సోయగం మత్స్యకన్య కంటి మెరుపులో కనబడేనిదిగో అజ్ఞాతవాసి అగుపడేనిదిగో నీ ఆనవాలు ముత్యపు మెరుపుల వరుసను ప్రతిఫలించె నీ నవ్వుల కిలకిలల జాడ గలగలా సాగే సెలయేటి సవ్వడులలో దొరికేనిదిగో

అజ్ఞాతవాసి అగుపడేనిదిగో నీ ఆనవాలు హొయలొలికించె నెచ్చెలి నడక వాన మబ్బుకు మురిసి నాట్యమాడే నెమలి నడకలో దాగేనిదిగో అజ్ఞాతవాసి అగుపడేనిదిగో నీ ఆనవాలు పిరుదులపై నాట్యమాడే నీలి కురుల వలపు పాశం బుస కొట్టే నాగు పడగలో నవ్వేనిదిగో అజ్ఞాతవాసి అగుపడేనిదిగో నీ ఆనవాలు చమట గంధం అలుముకున్న నీ దేహ సౌరభం మల్లెల పరిమళాల లో ఒదిగెనిదిగొ అజ్ఞాతవాసి అగుపడేనిదిగో నీ ఆనవాలు నీ ఆనవాలుకై అచట నిచట వెదికి అలసిన మది నా గుండె గూటిలో ఒదిగిన నిన్ను చూసి సేదతీరేనిదిగో

హే క్రిష్ణా

హే క్రిష్ణా నా మనసమనే మడుగులోకి దూకేదెన్నడో కాముడనే కాళిందిని మదించుటెప్పుడొ కాలం కాయం కరిగిపోతున్నవి కాని నా మనసు మాత్రం నీ పాదాలను పట్టలేకున్నది నీవు నిత్యమూ సత్యము అన్న నిజం తెలిసిన అలుసేమో నీ పట్ల ఇవి తాత్కాలికము అశాశ్వతము అనే భయమూ పొతే దొరకవేమొనన్నా బెంగ నిన్ను ఇప్పుడు కాకపొతే ఇంకేపుడైనా పట్టుకొవచ్చులేనన్న అలసత్వం

ఆనందానికి ఆనందపు బ్రాంతి కి తేడా తెలుసుకోలేని మూర్ఖత్వం నీ పాదపద్మపు మకరందం గ్రోలలేని నిస్సార జీవన గమనం లోకి నన్ను నేట్టివేస్తున్నవి క్రిష్ణా నీవు మాత్రం నీ దయావర్షాన్ని నాపై కురిపించాటాన్ని వాయిదా వేయబోకు వెన్నుకు దన్నుగా నిలచిన నీ చైతన్యాన్ని హృదయాన్ని తాకకుండా హృదయ పద్మం వికసించకుండా చేయటంలో కామ సర్పం సఫలమైతే దాని నల్లని గరళం శరీరమంతా వ్యాపించకుండా నల్లనయ్య పాదాలను పట్టుకోవటంలో బుద్ధి విఫలమైనది వ్యాధులతో శరీరం వ్యాకులతతో మనసు సతమతమవుతున్నా మాయతో కప్పబడిన బుధ్ధి నిన్ను స్మరించలేకున్నది నిన్ను వదలి మలిన దేహాలవైపు పరుగులుతీస్తున్నది మాయకు సోదరుడవు మాయాతీతుడవు మాయతో కప్పబడిన మా మనస్సనే యమునలో విహరించు మాయను ఛేదించు ఈ దేహాన్ని బృందావనం చేయి నీ ప్రేరణతో ఉదరం లో ఉద్భవించే అక్షరాలను పారిజాతాలుగా ధరించు ఉపిరి లో వేణుగానాలను ఆస్వాదించు ఉచ్చ్వాస నిశ్వాస లలో ఊయల లూగు నా కంటి పాపలనే కాంతులీను మణులుగా ధరించు నన్నుద్ధరించు ఉద్దవ బాంధవా

అజ్ఞాతవాసి

ఓ అజ్ఞాతవాసి జ్ఞాతం లోకి పయనించు పలకరింపులనే తొలకరింపులను మాపై చిలకరింపు ఎదురుచూపులతో ఎండిన కనులకోలనులలో కలువలు పూయించు ఓ అజ్ఞాతవాసి జ్ఞాతం లోకి పయనించు తడి తడి తళుకులతో అలరారు లేలేత చిగురుటాకుల పెదవులపై చిరునవ్వులు కురిపించు ఆప్తుని ఆదరం లేక అవిసిపోయిన అధరాలపై ఆనందపు జల్లులు కురిపించు

ఓ అజ్ఞాతవాసి జ్ఞాతం లోకి పయనించు జ్ఞాపకాల దొంతరలను కదిలించి తీపి గురతుల ఆనవాళ్ళను పెకలించి మోడువారిన గుండె గూటిలో నీ చిలిపి అల్లరుల చిరుగజ్జెలు మోగించు ఓ అజ్ఞాతవాసి జ్ఞాతం లోకి పయనించు చేతిలో చేతిని కలిపి చూపులో చూపుని నిలిపి నీడను కాను నీలో సగాన్ని అని నాలో నిలిచిపో

మాయ చాలా చిన్న పదం చాలా లోతైన పదం అందరికి అనువైన పదం ఎవ్వరికి అంతుబట్టని పదం ఎవ్వరు అతీతులు కాని పదం ఈ జగం లోని జనులందరిచే ఆ జగన్నాటక సూత్రదారి జనార్ధనుడు ఆడించే ఆటకు ఆయువుపట్టు ఈ మాయ మాయ చేతికి చిక్కని వాళ్ళు మాయకు లొంగని వాళ్ళు లోకం లో లేనే లేరు కొందరిని రూప లావణ్యాలతోను లో మరికొందరిని సిరి సంపదల రూపంలోనూ ఇంకొందరిని అధికార దర్పం రూపం లోను , ఇలా నానా రకాల జనులను నానా రకాలుగా మోహ పరచి వారి పలు రకాల వింత చేష్టలను వినోదంగా వీక్షిస్తుందీ మాయ అంతటి శక్తివంతమైంది ఈ మాయ అసలు ఇంతకూ ఏమిటి ఈ మాయ ? ఎవరు ఈ మాయ , ఈ లోకంలో అత్యంత శక్తివంతులెవ్వరు ......ఇంకెవ్వరు.....నారాయణుడు ........నారాయణి ఆ నారాయణి అంశ ......మాయ నారాయణి మరో పేరు దుర్గ మాత తానే మాయా స్వరూపం కనుక దుర్గమ్మ కను సన్నలలో మాయ చరిస్తూ వుంటుంది ఆ నారాయణుడికి సోదరిగా బృందావనంలో మహా మాయగా అవతరించింది కనుక ఆ క్రిష్ణునికి విధేయంగా వుంటుంది సకల శుభదాయకుడు ఆ శివునికి సగమై సర్వమంగళ గా శుభాలు కలిగించేది ఈ దుర్గమ్మ కనుక ఆ మాయ ఈ పరమేష్టిని కూడా చేరదు కనుక మాయను దాటాలంటే మాయాతీతులైన ఈ మువ్వురి ఆరాధన మనకు తప్పనిసరి . అందుకే ముఖ్యమైన మాసాలన్ని కుడా హరి హర పూజకు అనువుగా వుంటాయి. కార్తీకం లో శివ పూజ ఎంతటి విశేషమో దామోదరుడి పూజ కూడా అంతే ఆవశ్యకం హరిహరులను సేవిద్దాం మాయను చేదిద్దాం

మీకు తెలియనిది ఏమున్నది

నారాయణా  మీకు  తెలియనిది  ఏమున్నది

కాల స్వరూపులు , కర్మసాక్షి అయిన  ప్రత్యక్ష సూర్యనారాయణులు

జీవిని  బంధించు త్రిగుణ స్వరూపము మీరే

నరులను తమ చిత్తం వచ్చినట్లు ఆడించు మాయకు యజమానులు

 మీకు  తెలియని  విషయమేమున్నది

 అయినా మీ  పాద పద్మముల  చెంత నిలబడి  నా  వేదన  విన్నవించుకుంటున్నాను

కొంచెం  కరుణా స్వభావం  తో  వినండి

 ఒక్కసారి  నా  జీవితాన్ని వెనుదిరిగి చూస్తే  కాస్త లోకజ్ఞానం తెలసిననాటి  నుండి నేటి వరకు నన్ను వీడక దహించి వేస్తున్న దావాగ్ని నుండి పుట్టిన కొన్ని ఫలాలు

 

తొలినాళ్ళలో మదురమైన ఊహలలో  విహరింపజేసి నేడు  సాధారణ  దాహార్తి  కూడా

తీర్చుకోవటానికి  పనికిరాని ఎండమావుల  పాల్జేసినావు

 

ఆనాడు  దైవ  సమానులైన  గురువు పట్ల కూడని కార్యాన్ని చేయించి

నేడు  ఆ  కర్మ ఫలాన్ని బహు చక్కగా  అనుభవింపచేస్తున్నావు  .

నాకు  తెలుసులే  కృష్ణా  నీకు  అర్ధమయ్యిందని  మరి  వివరంగా చెప్పించాలనుకోకు  

 చదువును పక్కన పెట్టి పెద్దల నమ్మకాన్ని వమ్ము చేసి నాడు సాగించిన ఘనకార్యపు ఫలితం నేడు నమ్మి చేయి పుచ్చుకున్నవారికి తీరని వేదనగా మారి పరిహాసించుచున్నది పరంధామా

 

పరమపవిత్రమైన ధామంలో  నీ పాద పద్మముల చెంత కనులు ముసుకుపోయి ప్రవర్తించిన ఫలం నేడు నా జీవితాన్ని అపహాస్యం చేస్తున్నది కృష్ణా

 

ఏనాటి కర్మఫలమో నేడు ఇతరుల ధనం పట్ల తీరని ఆసక్తిని కలిగించి

అగ్ని చేత ఆకర్షించబడిన మిణుగురులు దహించుకుపోయినట్లుగా నా  జీవితాన్ని

దగ్ధం చేస్తున్నది  రామా

 

ఇంకా నాడు  రైలు ప్రయాణంలో వృద్దుని  పట్ల  నా తీరు , తల్లి  తండ్రుల  పట్ల  బాధ్యతారాహిత్య  ప్రవర్తన  

 

ఇవన్ని  నారాయణా నీ  కృపతో  నే  సంపాదించిన  ఆస్తులు

ఇక చాలు చాలు  ముకుంద  వీటి  భారమిక  నే మోయలేను

 

నా ఆస్తులన్నిటిని  సర్వ హక్కులతో  నీకు ధారాదత్తం చేస్తున్నాను

బలి  నుండి  మూడడుగుల నేల కోరి తృప్తి పొందిన  వామనా

నా ఈ  కొద్దిపాటి  ఆస్తులను  కూడా  ప్రేమతో  స్వీకరించు

--
OM NAMO BHAGAVATE VAASUDEVAAYA

ఆనందకరమైన హొలీ

వెండికొండపై  తెల్లని  వర్ణంలో  ప్రకాశించు  

సదాశివుడు సకల శుభాలు నోసగుగాక  

 

నల్లనివాడు పద్మనయనంబులవాడగు నారాయణుడు

సదా మనలను గాచుగాక

 

ఎర్రని వర్ణంతో  శోభిల్లు  సర్వమంగళను సగభాగంగా  కలిగి

వున్న శంకరుడు సర్వమంగళకరమగు  జీవితమొసగుగాక

 

పసుపుపచ్చని పసిడి  పీతాంబరదారియగు  విష్ణువు  అష్టైశ్వర్యాలు

ప్రసాదించునుగాక

 

ఆకుపచ్చని  ప్రకృతికాంతను తన  ఆధీనంలో వుంచుకున్న పశుపతి

మనసుకు  ఆహ్లాదమొసగుగాక

 

నీలవర్ణపు తారకలను  బ్రమింపజేయు పాలకడలి అలలబిందువులతో

నిండిన దేహం కల  నాగ శయనుడు మనలకు తన పాదపద్మముల కడ చోటునోసగుగాక

 

కాషాయాంబరధారి   కాశీ విశ్వనాధుడు  మనకు  మోక్షమొసగును   గాక

 

అందరికి  ఆనందకరమైన   హొలీ  శుభాకాంక్షలు

--
OM NAMO BHAGAVATE VAASUDEVAAYA

సద్గురు

                                    మహా గణపతయే నమః

 

సద్గురు సాయి లీలలను ప్రత్యక్షంగా చవిచూసిన ఒక భక్తుని అనుభవాల సంపుటికి ఆ భక్తుని కుమారుడు ఆంగ్లంలో అక్షరబద్ధం చేయగా  వాటిని  చదివి 

సంబ్రమాశ్చర్యాలకు  లోని  తెనుగించ  సంకల్పించి  చేసిన  చిన్ని  ప్రయత్నమిది  

 

ముంబై  నుండి బయలుదేరిన మన్మాడు రైలు నాసిక్ రోడ్ స్టేషన్ దాటి పరుగులుపెడుతుంది .  ఉన్నత శ్రేణికి చెందిన బోగీలో  కొందరు  పెద్ద  మనుషులు పేకాటతో  కాలక్షేపం  చేస్తున్నారు .

 ఇంతలో  తెల్లని వస్త్రాన్ని తలకు చుట్టుకున్న ఫకీరు ఒకడు వారిలో ఒక పెద్దమనిషి ముందు భిక్ష కోసం చేయి చాచాడు .

 అతని పరిస్థితికి జాలి  పడిన ఆ పెద్ద మనిషి ఖరీదైన తన కోటు జేబులోకి చేయి పోనిచ్చి వెండి రూపాయి తీసి అతనికి  ఇచ్చి ప్రక్కకు తొలగమని ఆటకు అడ్డురావద్దని  చెప్పాడు

 ఆ నాణెం  తీసుకున్న ఫకీరు దానిని పరికించి చూడసాగాడు . ఎందుకంటే 1908 కాలం  నాటి  విషయం  కదా . ఆ రోజుల్లో  రూపాయి అంటే చాలా  పెద్ద  మొత్తం

అది గమనించిన ఆ  పెద్ద మనిషి  నీవేమి  సందేహించనవసరం  లేదు . అది   స్వచ్చమైన  వెండితో  చేయబడిన జార్జ్  5 చిహ్నం కలిగి ,1905 వ  సంవత్సరంలో   చేయబడినది , ఇక  ప్రక్కకు తప్పుకో  అని  గట్టిగా చెప్పాడు . ఆ  ఫకీరు అక్కడనుండి   ప్రక్కకు  వెళ్ళిపోయాడు

మరునాడు  వేకువ ఝాముకు షిర్డీ చేరుకున్నారు . ఆ ప్రాంతాన్ని బాగుగా తెలిసియున్న  అతని  కుమారుడు , భార్య  సూచనలను  పాటిస్తూ ఆ పెద్దమనిషి స్నానాదికాలు పూర్తి చేసి   పూజా సామాగ్రితో ద్వారకామాయి  లోకి  అడుగుపెట్టారు.

ఆ పెద్దమనిషి , అతని భార్య బాబా ను చూసి ఆయన పాదాలకు నమస్కరించారు . అప్పుడు   బాబా అతనితో  " ఓ  పెద్దాయనా ! మా  అమ్మ , సోదరుడు ఎంతో  నచ్చ  చెప్పినమీదట   కాని , ఇక్కడకు  రావటానికి  నీవిష్టపడలేదు నన్ను గుర్తుపట్టావా " అని  అడిగారు.

 లేదు  అన్నది అతని సమాధానం.

 పోనీ దీనిని గుర్తించావా తాను ధరించిన కఫ్నీ జేబు లోనుండి జార్జ్ 5 బొమ్మ ముద్రించిన   వెండి రూపాయి తీసి చూపిస్తూ అడిగారు బాబా .

 తెల్లబోవటమే సమాధానమయ్యింది . రాత్రి  రైలులో జరిగిన ఘటన గుర్తుకు రాసాగింది.

 రాత్రి నీదగ్గరకు వచ్చిన ఫకీరు నేనే  సందేహనివృత్తి  చేసారు బాబా  

 ఒక్కసారిగా దిగ్బ్రమకు లోనయ్యారు . వెంటనే  తేరుకుని రాత్రి తన ప్రవర్తనకు  క్షమాపణ   కోరి, బాబా పాదాలకు నమస్కరించారు .  బాబా గురించి తన భార్య కుమారుడు  చెప్పిన   మాటల్లో ఎంతమాత్రము అసత్యం  లేదు . వీరు నిజంగా దేవుని యొక్క దూత  అని  మనసులో  తలంచసాగారు  

 ఆ  పెద్దమనిషిలో పరివర్తన జరిగిపోయింది . ప్రార్ధనా సమాజం నుండి విడివడి బాబా యొక్క  సేవకు తన జీవితం అంకితం చేసారు. ప్రతి  ముఖ్యమైన పని బాబాను సంప్రదించిన   తరువాతే మొదలు పెట్టేవారు . బాబా పట్ల అమితమైన ప్రేమభావం పెంచుకున్నారు అంతేకాక బాబాకు నూలు వస్త్రం  పంపిస్తుండేవారు . దానితో బాబా కఫ్ని   కుట్టించుకునేవారు.  పెట్రోమాక్స్ దీపాన్నికూడా ఇచ్చారు . సాయంత్రపు    వేళ ద్వారకామాయిలో దానిని  ఉపయోగించేవారు . షిర్డీ లో  ఉన్నప్పుడు ఆ దీపం    తానే వెలిగించి  నిర్దిష్టమైన  ప్రాంతంలో ఉంచేవారు

భగవంతుడు సర్వవ్యాపి . ఆయన ఎప్పుడైనా ఎ  రూపంలోనైన సంచరించగలరు

ఇందుకు తార్కాణాలు అనేకం . దత్తాత్రేయులు వారు కూడా అనేక రూపాలు ధరించి  భక్తుల   వద్ద భిక్ష స్వీకరిస్తుంటారు ఇప్పటికి కూడా . ఆయన ఎప్పుడైనా  ఎ  రూపంలోనైన  రావచ్చు . కొన్నిసార్లు  కుష్టువ్యాధి గ్రస్తుని వలె వచ్చి భక్తులను పరీక్షించేవారు . అందుకే  భిక్ష  కోరి   వచ్చిన వారిని  భగవత్ స్వరుపులుగా  ఆదరించవలె  .

--
OM NAMO BHAGAVATE VAASUDEVAAYA